អ្នកជំនាញ៖ ចិននឹងបរាជ័យមិនអាចវាយគ្រប់គ្រងតៃវ៉ាន់ បើសិនមានការលូកដៃរបស់អាមេរិក និងជប៉ុន
ចិននឹងមិនអាចជោគជ័យក្នុងការឈ្លានពានកាន់កាប់តៃវ៉ាន់ បើសិនអាមេរិកចេញមុខជួយការពារកោះតៃវ៉ាន់។ តាមការវាយតម្លៃរបស់វិទ្យាស្ថានដើម្បីយុទ្ធសាស្រ្តនិងការសិក្សាអន្តរជាតិដែលមានទីស្នាក់ការនៅទីក្រុងវ៉ាស៊ីនតោន ការឈ្លានពានណាមួយរបស់ចិនទៅលើកោះតៃវ៉ាន់នឹងជួបបរាជ័យ ប៉ុន្តែ ជាមួយគ្នានោះ សង្រ្គាមឈ្លានពានតៃវ៉ាន់នឹងធ្វើឲ្យគ្រប់ភាគីពាក់ព័ន្ធទាំងអស់ត្រូវខាតបង់យ៉ាងធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០២:៥៣
ប្រមូលផ្តុំទៅដោយក្រុមអ្នកជំនាញយោធាអាមេរិក វិទ្យាស្ថានដើម្បីយុទ្ធសាស្រ្ត និងការសិក្សាអន្តរជាតិ (CSIS)កាលពីថ្ងៃចន្ទ បានសិក្សាទៅលើសេណារីយ៉ូចំនួន២៤ ស្តីពីលទ្ធភាពធ្វើសង្រ្គាមរបស់ចិនដើម្បីឈ្លានពានកាន់កាប់តៃវ៉ាន់ ពីពេលនេះ រហូតដល់ឆ្នាំ ២០២៦។
តាមការវាយតម្លៃរបស់អ្នកជំនាញអាមេរិក តៃវ៉ាន់នឹងអាចធ្លាក់ចូលក្នុងកណ្តាប់ដៃគ្រប់គ្រងរបស់ចិនក្នុងរយៈតែ ៣ខែ បើសិនគ្មានអាមេរិកលូកដៃជួយតៃវ៉ាន់។ ផ្ទុយទៅវិញ ចិននឹងមិនអាចសម្រេចជោគជ័យដើម្បីឈ្លានពានកាន់កាប់តៃវ៉ាន់ បើសិនអាមេរិកចេញមុខជួយការពារ។
កម្រិតជោគជ័យនៃជំនួយអន្តរាគមន៍របស់អាមេរិកទៀតសោត ក៏អាស្រ័យទៅលើឆន្ទៈប្រយុទ្ធរបស់តៃវ៉ាន់ដើម្បីវាយបណ្តេញកងទ័ពចិន ហើយនិងការបើកភ្លើងខៀវរបស់ជប៉ុន ដើម្បីអនុញ្ញាតឲ្យអាមេរិកអាចបើកការវាយប្រហារចេញពីមូលដ្ឋានទ័ពរបស់អាមេរិកនៅជប៉ុន។
តាមអ្នកជំនាញ នៅក្នុងសេណារីយ៉ូមួយដែលទំនងអាចកើតចេញរូបរាងច្រើនជាងគេ ចិនអាចចាប់ផ្តើមដំបូងគេដោយការបាញ់កម្ទេចទីតាំងសំខាន់ៗរបស់កងទ័ពជើងទឹក និងកងទ័ពអាកាសរបស់តៃវ៉ាន់ ក្នុងរយៈពេលតែប៉ុន្មានម៉ោង។ បន្ទាប់មក ចិនអាចបាញ់មីស៊ីលបំផ្លាញនាវាដឹកយន្តហោះរបស់អាមេរិកចំនួន២ នៅក្បែរតៃវ៉ាន់។ ចិននឹងអាចបាញ់ពន្លិចផងដែរ នាវាចម្បាំងរបស់អាមេរិក ពី ១០ ទៅ២០គ្រឿង ព្រមទាំងបើកការវាយប្រហារទៅលើមូលដ្ឋានទ័ពរបស់អាមេរិកនៅជប៉ុន និងនៅកោះហ្គាំ Guam។
តាមការគន់គូររបស់អ្នកជំនាញ ការវាយប្រហាររបស់ចិនទៅលើកប៉ាល់ចម្បាំងអាមេរិក និងមូលដ្ឋានទ័ពអាមេរិកនៅជប៉ុននឹងមិនធ្វើឲ្យចិនជោគជ័យក្នុងការឈ្លានពានកាន់កាប់តៃវ៉ាន់ ព្រោះថា ក្រៅតែពីមានជំនួយវាយបករបស់នាវាមុជទឹក និងយន្តហោះចម្បាំងអាមេរិកដែលប្រចាំការនៅមូលដ្ឋានទ័ពនៅជប៉ុន កងទ័ពថ្មើជើងរបស់តៃវ៉ាន់នឹងដើរតួនាទីសំខាន់ ដើម្បីរង់ចាំប្រយុទ្ធទប់ទល់មិនឲ្យកងទ័ពចិនអាចឡើងដីគោក។
ជារួម អ្នកជំនាញរបស់វិទ្យាស្ថានដើម្បីយុទ្ធសាស្រ្ត និងការសិក្សាអន្តរជាតិ បានទាញការសន្និដ្ឋាន២។ ទី១ នៅគ្រប់កាលៈទេសៈទាំងអស់ ចិនមិនទទួលជោគជ័យនៅក្នុងប្រតិបត្តិការវាយចូលកាន់កាប់តៃវ៉ាន់ បើសិនអាមេរិកលូកដៃអន្តរាគម។ ទី២ គ្រប់ភាគីដែលចូលរួមក្នុងសង្រ្គាមដូចជា ចិន តៃវ៉ាន់ អាមេរិក និងជប៉ុន នឹងត្រូវខាតបង់ធ្ងន់ធ្ងរ ដោយសារសង្រ្គាម ជាពិសេស អាមេរិក។ តាមអ្នកជំនាញ សង្រ្គាមឈ្លានពានតៃវ៉ាន់នឹងធ្វើឲ្យអំណាចរបស់បក្សកុម្មុយនិស្តចិនត្រូវរង្គោះរង្គើ ប៉ុន្តែ សម្រាប់អាមេរិកឯណោះវិញ ការខាតបង់ដ៏ធ្ងន់ធ្ងរដោយសារការលូកដៃធ្វើសង្រ្គាមជួយការពារតៃវ៉ាន់ នឹងធ្វើឲ្យអាមេរិកជួបការលំបាកជាច្រើនឆ្នាំ។ តើប្រជាជនអាមេរិកនឹងយល់ព្រមឲ្យរដ្ឋាភិបាលលូកដៃជួយតៃវ៉ាន់ដែរឬទេ។ តើអាមេរិកនឹងអាចប្រើអាវុធនុយក្លេអ៊ែរ នៅក្នុងករណីប៉ះទង្គិចធ្វើសង្រ្គាមផ្ទាល់ជាមួយចិន? នេះជាសំណួរគ្មានចម្លើយ ដែលនៅតែអាថ៌កំបាំងសម្រាប់អ្នកជំនាញអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ