កូរ៉េខាងជើងបាញ់សាកល្បងមីស៊ីលបាលីស្ទិកពីរគ្រាប់ ទំនងដោយប្រើប្រព័ន្ធចំហេះថ្មី
នៅថ្ងៃអាទិត្យទី ១៨ ធ្នូ នេះ កូរ៉េខាងជើង ទំនងជាបានបាញ់សាកល្បងមីស៊ីលបាលីស្ទិករយៈចម្ងាយមធ្យមចំនួនពីរគ្រាប់។ ការសាកល្បងនេះប្រព្រឹត្តទៅតែប៉ុន្មានថ្ងៃក្រោយពីព្យុងយ៉ាងបានប្រកាសធ្វើតេស្តប្រព័ន្ធមីស៊ីលប្រើចំហេះរឹងសម្រាប់អភិវឌ្ឍប្រព័ន្ធសព្វាវុធថ្មី បានសម្រេច។
ចុះផ្សាយនៅថ្ងៃ៖
ស្តាប់ - ០២:០២
មីស៊ីលបាលីស្ទិករយៈមធ្យម ពីរគ្រាប់ មានដំណើរផ្លូវហោះខ្ពស់បំផុត និងបានចម្ងាយប្រមាណយ៉ាងតិច ៥០០គីឡូម៉ែត្រ បានបាញ់ចេញពីតំបន់តុងចង់រី នៅថ្ងៃអាទិត្យនេះសំដៅទិសសមុទ្ទខាងកើតឬ សមុទ្ទជប៉ុន នៅរវាងម៉ោង១១និង១៣នាទី និងម៉ោង១២និង៥នាទី ម៉ោងនៅក្នុងស្រុក។ នេះបើតាមសេចក្តីថ្លែងការណ៍របស់ទីបញ្ជាការអន្តរយោធាកូរ៉េខាងត្បូង ដោយលម្អិតថា ភ្នាក់ងារចារកិច្ចកូរ៉េខាងត្បូង និងអាមេរិក វិភាគការបាញ់មីស៊ីលនេះ ដើម្បីអាចវែករកពន្លឺជុំវិញព័ត៌មានថ្មីស្តីពីការអភិវឌ្ឍន៍មីស៊ីលរបស់កូរ៉េខាងជើង។
កាលពីថ្ងៃព្រហស្បតិ៍ ព្យុងយ៉ាងប្រកាសសាកល្បងបានជោគជ័យ ម៉ាស៊ីនប្រើចំហេះរឹង មានមហិទ្ធិរិទ្ធខ្លាំង ដែលប្រព័ន្ធឃោសនារដ្ឋ KCNA កូរ៉េខាងជើង ចាត់ទុកជាតេស្តដ៏សំខាន់មួយ សម្រាប់អភិវឌ្ឍប្រព័ន្ធសព្វាវុធប្រភេទថ្មី។ មានន័យថា មីស៊ីលបាលីស្ទិក រយៈមធ្យមបាញ់នៅថ្ងៃនេះ ជាការសាកល្បងប្រព័ន្ធមីស៊ីលបាលីស្ទិកថ្មីដោយប្រើម៉ាស៊ីនមានចំហេះរឹងថ្មីសាករួចកាលពីថ្ងៃទី១៥ធ្នូ។ នេះបើតាមការសន្និដ្ឋានរបស់អ្នកជំនាញកូរ៉េខាងត្បូង។
សូមរំលឹកថា ការបាញ់សាកល្បងមីស៊ីលបាលីស្ទិកអន្តរទ្វីបរបស់កូរ៉េខាងជើងកន្លងមក តែងប្រើប្រព័ន្ធមីស៊ីលបាលីស្ទិកចំហេះរាវ ដែលពិបាកធ្វើប្រតិបត្តិការ និងត្រូវការពេលវេលារៀបចំយូរមុននឹងបាញ់បង្ហោះបាន ជាហេតុធ្វើឱ្យសត្រូវអាចចាប់សញ្ញានិងងាយបំផ្លាញបាន។ ឯប្រព័ន្ធមីស៊ីលបាលីស្ទិកប្រើចំហេះរឹង ងាយស្រួលប្រើ និងអាចចល័តបាន ត្រូវការពេលវេលារៀបចំខ្លីជាង ហើយពិបាកចាប់សញ្ញាណាស់ បើមិនទាន់ឆេះ។
ការអភិវឌ្ឍប្រព័ន្ធមីស៊ីលចំហេះរឹងនេះ ជាអាទិភាពយុទ្ធសាស្ត្រដែលប្រមុខដឹកនាំកូរ៉េខាងជើង លោក គីម ជុងអ៊ុន បានបង្ហើបឱ្យដឹងកាលពី២០២១ ក្នុងការឈានឆ្ពោះទៅផលិតមីស៊ីលទំនើបៗ អាចបាញ់ចេញពីដីគោកក៏បាន ពីក្រោមសមុទ្ធក៏បាន។ ទិសដៅនយោបាយ ២០២៣ ដែលទំនងជាឆ្នាំប្រវត្តិសាស្ត្រសម្រាប់លោក គីមជុងអ៊ុន នឹងត្រូវប្រកាសចុងខែធ្នូនេះ នាឱកាសជំនួបប្រជុំបក្ស មិនមែនក្នុងសុន្ទរកថាថ្ងៃទី ១មករាឆ្នាំថ្មី ដូចទម្លាប់មុនៗទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ