“បាឡុងចារកិច្ច” ប៉េកាំងបដិសេធមិននិយាយទូរស័ព្ទជាមួយអាមេរិក
រដ្ឋាភិបាលចិន បានបដិសេធមិនទទួលសំណើអាមេរិកកាលពីថ្ងៃសៅរ៍ សុំជជែកគ្នាតាមទូរស័ព្ទរវាងរដ្ឋមន្ត្រីក្រសួងការពារជាតិអាមេរិក លោក ឡូយដ៍ អូស្ទីន និងសមភាគីចិន លោក វៃ ហ្វេងហេទេ។ ការបដិសេធបានធ្វើឡើងក្រោយពីកងកម្លាំង Air Force អាមេរិកបានបាញ់ទម្លាក់បាឡុង “ចារកិច្ច” បានបន្តិច។ នេះបើតាមសេចក្តីជូនដំណឹងរបស់ក្រសួងការពារជាតិអាមេរិកនៅថ្ងៃអង្គារទី ៧កុម្ភៈ២០២៣។
ចុះផ្សាយនៅថ្ងៃ៖
ស្តាប់ - ០១:៥៣
ដោយយល់អំពីភាពសំខាន់ចាំបាច់ដែលយោធាទាំងពីរប្រទេសត្រូវនិយាយគ្នា ក្នុងពេលកំពុងមានសភាពតានតឹងខ្លាំង នៅថ្ងៃសៅរ៍ទី ៤ កុម្ភៈ ក្រោយពីបានបាញ់ បាឡុង “ចារកិច្ច” ទម្លាក់ភ្លាម ក្រសួងការពារជាតិអាមេរិក បានរៀបចំសំណើទាក់ទងតាមខ្សែទូរស័ព្ទសុវត្ថិភាព រវាងលោករដ្ឋមន្ត្រី ឡូយដ៍ អូស្ទីន និងសមភាគីលោកវៃ ហ្វេងហេ។ ប៉ុន្តែគួរឱ្យសោកស្តាយ បក្សកុម្មុយនីស្តចិន បដិសេធ។ នេះបើតាមការលម្អិតរបស់អ្នកនាំពាក្យមន្ទីរបញ្ចកោណ Pat Ryder។
អ្នកនាំពាក្យរូបនេះ បានទទួលស្គាល់ថា ការបដិសេធមិនឱ្យមានការជជែកថ្នាក់រដ្ឋមន្ត្រីការពារជាតិ បញ្ជាក់ថាទំនាក់ទំនងអាមេរិកចិន ពិតជាធ្លាក់ស្រុតខ្លាំងណាស់ ប៉ុន្តែអាមេរិកសន្យានៅតែបន្តបើកចំហបណ្តាញសម្រាប់ទាក់ទងគ្នាជានិច្ច។
ចំណែករដ្ឋាភិបាលចិនវិញ បានអះអាងនៅថ្ងៃចន្ទទី ៦កុម្ភៈថា ការបាញ់ទម្លាក់បាឡុង ដែលមានភារកិច្ចស៊ីវិល ស្រាវជ្រាវផ្នែកអាកាសធាតុ ប៉ះពាល់ធ្ងន់ធ្ងរនិងធ្វើឱ្យខូចខាតទំនាក់ទំនងរវាងប្រទេសទាំងពីរខ្លាំងណាស់។ ហើយនៅក្នុងថ្ងៃដដែលនោះ អាមេរិកបានប្រកាសរើសបានបំណែកខ្លះនៃបាឡុងចិន។ បើតាមមន្ទីរបញ្ចកោណ បាឡុងប្រវែង៦០ម៉ែត្រ មានយោង ឧបករណ៍ជាបន្ទុកទម្ងន់មួយតោន ដែលគេមិនទាន់ស្រង់បាននៅឡើយទេ។ អាមេរិកគ្មានចេតនា ប្រគល់បំណែកបាឡុងទៅឱ្យចិនវិញឡើយ ព្រោះនេះជាឱកាសល្អសម្រាប់អាមេរិក សិក្សា ហើយនឹងបានយល់កាន់តែច្បាស់ពីឧបករណ៍របស់ចិន។ នេះបើតាមសំដីរបស់អ្នកទទួលខុសត្រូវអាមេរិកម្នាក់។
សូមបញ្ជាក់ថាឧប្បត្តិហេតុ “បាឡុងចារកិច្ច” បានជំរុញឱ្យរដ្ឋមន្ត្រីការបរទេសអាមេរិក លុបចោលនៅនាទីចុងក្រោយ ដំណើរទស្សនកិច្ចនៅក្រុងប៉េកាំង ដែលមានកម្មវត្ថុស្តារទំនាក់ទំនងប្រទេសទាំងពីរ។ រដ្ឋបាលលោកបៃដិន ធានាថានឹងត្រូវរៀបចំទស្សនកិច្ចនេះជាថ្មីនៅពេលមានលក្ខខណ្ឌគ្រប់គ្រាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ