កូរ៉េខាងជើង៖រូបភាពផ្កាយរណបបានបង្ហាញពីសកម្មភាពមមាញឹកនៅមជ្ឈមណ្ឌលនុយក្លេអ៊ែរយ៉ុងយ៉ុន
យោងតាមអង្គការ think-tank រូបភាពផ្កាយរណបដែលបានថតពីថ្ងៃទី៣ ដល់ថ្ងៃទី១៧ មីនាបានបង្ហាញពីសកម្មភាពមមាញឹកនៅមជ្ឈមណ្ឌលនុយក្លេអ៊ែរយ៉ុងយ៉ុនក្នុងទឹកដីកូរ៉េខាងជើង។ តាមរយៈរូបភាពផ្កាយរណបនេះនាំឲ្យគេលើកឡើងថា ការកសាងម៉ាស៊ីនប្រតិកម្មមួយកំពុងឈានដល់ទីបញ្ចប់។ ការទម្លាយរូបភាពផ្កាយរណបនេះបានធ្លាក់មក ក្រោយពីមេដឹកនាំកូរ៉េខាងជើងលោកគីម ជុងអ៊ុនអំពាវនាវកាលពីថ្ងៃទី២៨ មីនាឲ្យបង្កើនការផលិតសម្ភារៈបរិក្ខារនុយក្លេអ៊ែរយោធា។
ចុះផ្សាយនៅថ្ងៃ៖
ស្តាប់ - ០១:៤៧
នៅក្នុងរូបភាពផ្កាយរណបថតចន្លោះថ្ងៃទី៣ និងថ្ងៃទី១៧ មីនាបានបង្ហាញសកម្មភាពសំខាន់ចំនួន ២ នៅមជ្ឈមណ្ឌលនុយក្លេអ៊ែរយ៉ុងយ៉ុនរបស់កូរ៉េខាងជើង ទី១ ការសាងសង់ម៉ាស៊ីនប្រតិកម្មកំពុងជិតរួចរាល់ និងទី២ ការជួសជុលអាគារមួយបានចាប់ផ្តើម ខណៈដែលមានវត្តមានលំហូរទឹកចេញពីប្រព័ន្ធធ្វើឲ្យត្រជាក់ម៉ាស៊ីនប្រតិកម្ម។ ក្រៅពីនេះ និងបើតាមរូបភាពផ្កាយរណបដដែល ម៉ាស៊ីនប្រតិកម្មមួយកម្លាំង ៥មេហ្កាវ៉ាត់កំពុងដំណើរការ ហើយមានការសាងសង់ថ្មីបានចាប់ផ្តើមនៅជុំវិញរោងចក្រចម្រើនធាតុអ៊ុយរ៉ាញ៉ូម។
ការអភិវឌ្ឃន៍ និងសកម្មភាពទាំងនេះហាក់បានឆ្លុះបញ្ចាំងពីការណែនាំនាពេលថ្មីៗនេះរបស់មេដឹកនាំកូរ៉េខាងជើងលោក គីម ជុងអ៊ុនក្នុងការបង្កើនការផលិតសម្ភារៈបរិក្ខារនុយក្លេអ៊ែរយោធាដើម្បីពង្រឹងអាវុធនុយក្លេអ៊ែរ នេះបើតាមការវិភាគរបស់អង្គការ think-tank។ យោងតាមក្រុមអ្នកជំនាញ អាវុធនុយក្លេអ៊ែរតាក់តិកជាសញ្ញាមួយបង្ហាញថា កូរ៉េខាងជើងសម្រេចបាននូវបច្ចេកវិទ្យាជឿនលឿន និងហាក់បញ្ជាក់ពីការត្រៀមខ្លួនរបស់ប្រទេសក្នុងការសាកល្បងនុយក្លេអ៊ែរលើកទី៧។
ពីខាងកូរ៉េខាងត្បូង និងអាមេរិកវិញ ក្រុងសេអ៊ូល និងវ៉ាស៊ីនតោនព្រមានពីការសាកល្បងនុយក្លេអ៊ែរជាថ្មីរបស់ក្រុងព្យុងយ៉ាងតាំងពីដើមឆ្នាំ ២០២២។ ទន្ទឹមនឹងការព្រមានដោយសម្តី អាមេរិក និងកូរ៉េខាងត្បូងក៏បានបន្ត និងពង្រឹងការធ្វើសមយុទ្ធរួមគ្នាដែរ។ សមយុទ្ធនេះត្រូវបានកូរ៉េខាងជើងចាត់ទុកជាការរៀបចំជើងព្រួលចូលឈ្លានពានខ្លួន និងបានឆ្លើយបកវិញតាមរយៈការបាញ់សាកល្បងមីស៊ីលជាបន្តបន្ទាប់ក្នុងខែមីនាកន្លងទៅថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ