សហភាពអឺរ៉ុប និងបារាំងបានសម្តែងក្តីបារម្ភពីបញ្ហាសិទ្ធិមនុស្សធ្លាក់ចុះខ្លាំងនៅចិន
ថ្ងៃសុក្រ ទី៧ មេសាជាថ្ងៃទី៣ និងថ្ងៃចុងក្រោយនៃដំណើរទស្សនកិច្ចប្រធានាធិបតីបារាំងលោកអេម៉ានុយអែល ម៉ាក្រុង និងប្រធានគណៈកម្មការអឺរ៉ុបលោកស្រីអួរស៊ូឡា វ៉ុនឌែរ ឡេយែននៅក្នុងប្រទេសចិន។ នៅក្នុងជំនួបជាមួយប្រធានាធិបតីចិនលោកស៊ី ជីនពីង លោកម៉ាក្រុង និងលោកស្រីវ៉ុនឌែរ ឡេយែនបានលើកយកប្រធានបទសំខាន់ចំនួនពីរទៅនិយាយ ទី១ សង្រ្គាមរុស្ស៊ីឈ្លានពានអ៊ុយក្រែន និងទី២ បញ្ហាសិទ្ធិមនុស្សនៅចិន។
ចុះផ្សាយនៅថ្ងៃ៖
ស្តាប់ - ០២:២៤
ជំនួបត្រីភាគីចិន បារាំង និងសហភាពអឺរ៉ុបបានធ្វើឡើងនៅក្រោយជំនួបទ្វេភាគីចិន បារាំង។ តែទោះជានៅក្នុងជំនួបមួយណាក៏ដោយ សង្រ្គាមរុស្ស៊ីឈ្លានពានអ៊ុយក្រែនជាប្រធានរឿងមួយមិនអាចខ្វះបាន។ ខណៈដែលប្រធានាធិបតីបារាំងលោកម៉ាក្រុងបានរំពឹងលើចិនឲ្យជួយស្វែងរកដំណោះស្រាយដើម្បីបិទបញ្ចប់សង្រ្គាម និងកសាងសន្តិភាពមួយយូរអង្វែង ប្រធានគណៈកម្មការអឺរ៉ុបលោកស្រីអួរស៊ូឡា វ៉ុនឌែរ ឡេយែនបានព្រមានចិនពីការផ្តល់អាវុធឲ្យរុស្ស៊ីជាយថាហេតុ។ ថ្លែងនៅក្នុងសន្និសីទកាសែតរួមជាមួយលោកម៉ាក្រុង និងប្រធានាធិបតីចិនលោកស៊ី ជីនពីង លោកស្រីវ៉ុនឌែរ ឡេយែនបានថ្លែងថា សហភាពអឺរ៉ុបរំពឹងលើចិនមិនផ្តល់អាវុធឲ្យរុស្ស៊ីដោយផ្ទាល់ ឬដោយប្រយោល។
ប្រធានគណៈកម្មការអឺរ៉ុបរូបនេះដដែលបានបន្ថែមដោយរម្លឹកជាទូទៅថា ការផ្តល់អាវុធឲ្យអ្នកឈ្លានពានគេជារឿងផ្ទុយនឹងច្បាប់អន្តរជាតិ ហើយបើចិនហ៊ានធ្វើដូចនេះមែននឹងនាំឲ្យមានផលវិបាកធ្ងន់ធ្ងរដល់ទំនាក់ទំនងរវាងចិន និងសហភាពអឺរ៉ុប។ ក្រៅពីសង្រ្គាមរុស្ស៊ីឈ្លានពានអ៊ុយក្រែន បញ្ហាសិទ្ធិមនុស្សនៅចិនជារឿងមួយមិនអាចខ្វះបានសម្រាប់ថ្នាក់ដឹកនាំបស្ចិមលោក និយាយជារួម និងសម្រាប់សហភាពអឺរ៉ុប និយាយដោយឡែក។ នៅក្នុងរឿងសិទ្ធិមនុស្សនៅចិននេះ លោកស្រីវ៉ុនឌែរ ឡេយែនបានសម្តែងក្តីបារម្ភខ្លាំងពីស្ថានភាពជនជាតិភាគតិចអ៊ុយហ្គួរអ្នកកាន់សាសនាអ៊ីស្លាមនៅក្នុងខេត្តស៊ីងជាំង។
លោកស្រីវ៉ុនឌែរ ឡេយែនយល់ថា វាជារឿងសំខាន់ដែលគេត្រូវបន្តជជែកលើបញ្ហានេះ។ ពីចំណែកប្រធានាធិបតីបារាំង លោកម៉ាក្រុងមិនបានភ្លេចនិយាយពីរឿងសិទ្ធិមនុស្សនៅចិនដោយត្រង់ៗជាមួយលោកស៊ីទេ។ តែលោកចង់ឲ្យមានការគោរពគ្នាទៅវិញទៅមកដើម្បីធ្វើយ៉ាងណា កុំឲ្យភាគីម្ខាងចាត់ទុកការលើករបស់ភាគីម្ខាងទៀតថាជាការផ្តល់មេរៀន។ គួររម្លឹកថា ការលើកពីបញ្ហាជនជាតិភាគតិចអ៊ុយហ្គួរក៏ព្រោះតែក្រុមអ្នកការពារសិទ្ធិមនុស្ស និងក្រុមអ្នកជំនាញអង្គការសហប្រជាជាតិបានអះអាងថា មានពួកអ៊ុយហួរយ៉ាងតិច ១លាននាក់ត្រូវបានរដ្ឋអំណាចចិនឃុំនៅក្នុងជំរំលុតដំ ធ្វើទារុណកម្មមួយក្នុងខេត្តស៊ីងជាំង។ តែចិនបានបញ្ជាក់ច្រើនដងថា ជំរំនោះមិនមែនជាជំរំលត់ដំទេ តែជាមជ្ឈមណ្ឌលអប់រំវិជ្ជាជីវៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ