ប្រទេសចំនួន៤៣ ទាមទារឲ្យចិនគោរពសិទ្ធិជនជាតិអ៊ុយហ្គួរ
នៅឯកិច្ចប្រជុំអង្គការសហប្រជាជាតិកាលពីថ្ងៃព្រហស្បតិ៍ ទី២១ តុលាម្សិលមិញ ប្រទេសចំនួន ៤៣ ដែលភាគច្រើនជាប្រទេសលោកខាងលិចបានរិះគន់ចិនចំពោះការធ្វើទុក្ខបុកម្នេញលើជនជាតិអ៊ុយហ្គួរនៅតំបន់ស៊ីនជាំង។ តាមរយៈសេក្តីថ្លែងការណ៍រួមមួយ ប្រទេសទាំងនោះបានទាមទារឲ្យចិនគោរពសិទ្ធិជនជាតិអ៊ុយហ្គួរ និងជនជាតិភាគតិចដទៃទៀតដែលរស់នៅរងការធ្វើទារុណកម្ម និងការបង្ក្រាបពីអាជ្ញាធរចិន។
ចុះផ្សាយនៅថ្ងៃ៖
ស្តាប់ - ០២:១៣
សេចក្តីប្រកាសទាមទារដែលចុះហត្ថលេខាដោយសហរដ្ឋអាមេរិក ប្រទេសសហភាពអឺរ៉ុប និងប្រទេសអាស៊ីមួយចំនួន ព្រមទាំងប្រទេសផ្សេងទៀតបានបណ្តាលឲ្យទីក្រុងបេកាំងផ្ទុះកំហឹងសាជាថ្មីទៀតទាក់ទងសំណុំរឿងជនជាតិអ៊ុយហ្គួរ។
នៅឯកិច្ចប្រជុំរបស់អង្គការសហប្រជាជាតិកាលពីថ្ងៃព្រហស្បតិ៍ម្សិលមិញ ប្រទេសទាំង ៤៣ បានចោទប្រកាន់ចិនពីបទរំលោភសិទ្ធិមនុស្សធ្ងន់ធ្ងរទៅលើជនជាតិអ៊ុយហ្គួរ រួមមានការធ្វើទារុណកម្ម សកម្មភាពបង្ក្រាប និងការចាប់បង្ខំឲ្យក្រៀវជាដើម។
តាមរយៈសេចក្តីថ្លែងការណ៍រួមមួយ ក្រុមប្រទេសទាំងនោះបានអំពាវនាវឲ្យចិនឆាប់អនុញ្ញាតឲ្យក្រុមអ្នកសង្កេតការណ៍ឯករាជ្យ និងឧត្តមស្នងការសិទ្ធិមនុស្សអង្គការសហប្រជាជាតិអាចចូលទៅកាន់តំបន់ស៊ីនជាំងបានដោយគ្មានការរឹតត្បិតខ្លាំង។
ក្រោយបានស្តាប់ឮការប្រកាសខាងលើ ទីក្រុងប៉េកាំងបានបញ្ចេញប្រតិកម្មតបដោយកំហឹងភ្លាមមួយរំពេច។ ឯកអគ្គរដ្ឋទូតចិនប្រចាំអង្គការសហប្រជាជាតិលោក ចាង ជុន (Zhang Jun) បានបដិសេធយ៉ាងម៉ឺងម៉ាត់នៅថ្ងៃព្រហស្បតិ៍ដដែលនោះ ថាការលើកឡើងរបស់ក្រុមទាំងជាង៤០ នោះ គឺជាពាក្យកុហកភូតភរ និងជាផែនការធ្វើឲ្យចិនរងគ្រោះ។
ហើយក៏ដូចសព្វមួយដងដែរ មន្ត្រីចិនបានអះអាងថាគ្មានទង្វើរំលោភបំពានសិទ្ធិមនុស្សឡើយនៅស៊ីនជាំង ប៉ុន្តែប្រជាជននៅទីនោះកំពុងរស់នៅដោយរីករាយចំពោះការអភិវឌ្ឍន៍ ពួកគេមានសេរីភាព ហើយមានមោទនភាពចំពោះភាពរីកចម្រើនក្នុងតំបន់។
ក្នុងពេលថ្លែងទៅកាន់អ្នកយកព័ត៌មាន ឯកអគ្គរដ្ឋទូតចិនប្រចាំអង្គការសហប្រជាជាតិ និយាយថាប្រទេសចិនមានឆន្ទៈក្នុងការបើកផ្លូវទទួលស្វាគមន៍ដំណើរទស្សនកិច្ចប្រកបដោយមិត្តភាព នៅក្នុងតំបន់ស៊ីនជាំង។ ប៉ុន្តែចិនមិនយល់ព្រមនោះទេចំពោះការស៊ើបអង្កេតរបស់ឧត្តមស្នងការសិទ្ធិមនុស្សនៃអង្គការសហប្រជាជាតិ។
បន្ថែមលើនេះ មន្ត្រីរដ្ឋាភិបាលចិនក៏បានឆ្លៀតវាយបកប្រទេសលោកខាងលិចវិញដែរពីរឿងរំលោភសិទ្ធិមនុស្ស។ នៅក្នុងសេចក្តីថ្លែងការណ៍មួយ ទីក្រុងប៉េកាំងបានចោទអាមេរិកពី “បទបោសសម្អាតជនជាតិភាគតិច” ប្រឆាំងជនជាតិដើមអាមេរិក និងបានចោទបារាំងផងដែរថាបានប្រព្រឹត្ត “ឧក្រិដ្ឋកម្មប្រឆាំងមនុស្សជាតិ” នៅក្នុងអតីតអាណានិគមរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ