ជប៉ុន៖នាយករដ្ឋមន្រ្តីត្រូវបានកម្លាំងសន្តិសុខជម្លៀសបន្ទាប់ពីមានសំឡេងផ្ទុះ
នៅក្នុងប្រទេសជប៉ុន នាយករដ្ឋមន្ត្រីលោកហ្វូមីអូ គីស៊ីដាត្រូវបានកម្លាំងសន្តិសុខជម្លៀសចេញភ្លាមៗដោយសុវត្ថិភាព បន្ទាប់ពីមានការផ្ទុះគ្រាប់បែកផ្សែងក្នុងថ្ងៃសៅរ៍ ទី១៥ មេសា។ ការផ្ទុះនេះបានកើតឡើងនៅពេលដែលលោកគីស៊ីដាកំពុងចូលរួមនៅក្នុងវេទិកាឃោសនាបោះឆ្នោតរៀបចំនៅកំពង់ផែនេសាទមួយក្នុងតំបន់វ៉ាកាយ៉ាម៉ាដែលមានចម្ងាយប្រមាណជា ៦៥គីឡូម៉ែត្រពីទីក្រុងអូសាកា។ មួយវិញទៀត ឧប្បត្តិហេតុនេះបានកើតមានឡើងក្នុងពេលដែលជប៉ុនកំពុងធ្វើជាម្ចាស់ផ្ទះរៀបចំកិច្ចប្រជុំថ្នាក់រដ្ឋមន្រ្តីនៃក្រុមប្រទេស G៧។
ចុះផ្សាយនៅថ្ងៃ៖
ស្តាប់ - ០២:០៨
គឺនៅកំពង់ផែនេសាទក្នុងតំបន់វ៉ាកាយ៉ាម៉ាដែលនាយករដ្ឋមន្ត្រីជប៉ុនលោកហ្វូមីអូ គីស៊ីដាត្រូវឡើងថ្លែងសុន្ទរកថាដើម្បីគាំទ្របេក្ខជនម្នាក់របស់គណបក្សលោកសម្រាប់ការបោះឆ្នោតសភាមួយភាគនាពេលខាងមុខ។ តែមុននឹងឡើងថ្លែងសុន្ទរកថា លោកគីស៊ីដាបានចូលរួមភ្លក់អាហារប្រចាំតំបន់ និងដែលនៅពេលនោះ មានស្នូរផ្ទុះមួយបានលាន់ឮឡើងដោយមានផ្សែងពណ៌ ស។ តាមមធ្យោបាយឃោសនាមហាជនក្នុងស្រុក ស្នូរផ្ទុះនោះជាគ្រាប់បែកផ្សែងដែលជនដៃដល់បានគប់សំដៅលើលោកគីស៊ីដា។ ភ្លាមៗ លោកគីស៊ីដាត្រូវបានក្រុមអ្នកការពារជម្លៀសខ្លួនចេញដោយសុវត្ថិភាព។
ព្រឹត្តិការណ៍មួយនេះមិនបានបណ្តាលឲ្យមានអ្នកស្លាប់ និងរបួសឡើយ។ ចំណែកជនដៃដល់ត្រូវបានប៉ូលិសចាប់ខ្លួនភ្លាមៗដែលជាបុរសវ័យ ២៤ឆ្នាំ។ តែគេនៅមិនទាន់ដឹងពីមូលហេតុដែលជនដៃដល់រូបនេះបានធ្វើនៅឡើយទេ។ ក្រោយហេតុការណ៍ដ៏ភ្ញាក់ផ្អើល និងភ័យស្លន់ស្លោនេះ លោកគីស៊ីដាមិនបានផ្អាកសកម្មភាពឃោសនាបោះឆ្នោតរបស់លោកទេ។ គួរបញ្ជាក់ថា ឧប្បត្តិហេតុមួយនេះនាំឲ្យគេនឹកឃើញដល់ឃាតកម្មបាញ់សម្លាប់អតីតនាយករដ្ឋមន្រ្តីលោកស៊ីនហ្សូ អាបេកាលពីខែកក្កដា ឆ្នាំ ២០២២។ កាលណោះ គឺក្នុងពេលដែលលោកអាបេកំពុងឈរថ្លែងសុន្ទរកថាឃោសនាបោះឆ្នោត។
តាំងពីពេលនោះមក កម្លាំងប៉ូលិសបានបង្កើនវិធានការការពារចំពោះថ្នាក់ដឹកនាំ។ គួរបញ្ជាក់ថា ជប៉ុនជាប្រទេសមួយដែលអំពើហិង្សានយោបាយកម្រកើតមានណាស់។ អ្វីជាការកត់សម្គាល់ ព្រឹត្តិការណ៍ថ្មីក្នុងថ្ងៃសៅរ៍ ទី១៥ មេសានេះបានកើតឡើង ចំពេលដែលជប៉ុនកំពុងរៀបចំកិច្ចប្រជុំថ្នាក់រដ្ឋមន្រ្តីបរិស្ថាន និងការបរទេសនៃក្រុមប្រទេសមហាអំណាចឧស្សាហកម្មទាំង ៧ ក្នុងលោកហៅកាត់ G៧ នាចុងសប្តាហ៍នេះ។ បន្ទាប់មកនៅពាក់កណ្តាលខែឧសភាខាងមុខ ជប៉ុននឹងបន្តរៀបចំកិច្ចប្រជុំកំពូលនៃប្រមុខរដ្ឋ និងប្រមុខរដ្ឋាភិបាលG៧ នៅទីក្រុងហ៊ីរ៉ូស៊ីម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ