ប្រមុខការទូតអឺរ៉ុប អំពាវនាវហៅកងទ័ពជើងទឹក ឲ្យចាប់ផ្តើមល្បាតនៅច្រកសមុទ្រតៃវ៉ាន់
នៅថ្ងៃអាទិត្យ ប្រមុខការទូតសហភាពអឺរ៉ុប លោក ហ្សូសេព បូរែល បានអំពាវនាវយ៉ាងចំហ ហៅកងទ័ពជើងទឹក នៃ ប្រទេសសមាជិកសហភាពអឺរ៉ុប ឲ្យចាប់ផ្តើមអន្តរាគមន៍ ឃ្លាំមើល ល្បាត ការពារសន្តិសុខ នៅច្រកសមុទ្រតៃវ៉ាន់។ ការថ្លែងដូច្នេះ ធ្វើឡើងនៅក្នុងកាសែតបារាំងចេញផ្សាយថ្ងៃអាទិត្យ និងស្របពេលដែល សហភាពអឺរ៉ុប កំពុងបើកកិច្ចប្រជុំស្តីពីប្រទេសចិន។
ចុះផ្សាយនៅថ្ងៃ៖
ស្តាប់ - ០២:០៨
«អឺរ៉ុប ត្រូវតែមានវត្តមាននៅច្រកសមុទ្រតៃវ៉ាន់ ដែលជាសំណុំរឿងដ៏សំខាន់ពាក់ព័ន្ធទៅនឹងគម្រោងយុទ្ធសាស្ត្រខាងសេដ្ឋកិច្ច ពាណិជ្ជកម្ម និងបច្ចេកវិទ្យា»។ នេះគឺសម្តីរបស់ប្រមុខការទូត សហភាពអឺរ៉ុប ហ្សូសេព បូរែល (Josep Borrell ) នៅក្នុងកាសែត Le Journal du Dimanche ដោយបញ្ជាក់ទៀតថា អាស្រ័យដោយហេតុដូច្នេះ ទើបរូបលោក អំពាវនាវឲ្យ កងទ័ពជើងទឹករដ្ឋសមាជិកសហភាពអឺរ៉ុប ល្បាត ឃ្លាំមើលនៅច្រកសមុទ្រតៃវ៉ាន់ ហើយនេះ គឺជាសេរីភាពនាវាចរណ៍ស្របតាមច្បាប់អន្តរជាតិ។
ម្តងហើយម្តងទៀត ប្រមុខការទូតសហភាពអឺរ៉ុប បញ្ជាក់ថា តំបន់ច្រកសមុទ្រតៃវ៉ាន់ គឺជាផ្នែកមួយនៃដែនយុទ្ធសាស្ត្រដ៏សំខាន់របស់សហភាពអឺរ៉ុប ដើម្បីសន្តិភាព និងដើម្បីផលប្រយោជន៍របស់អឺរ៉ុប។ ជាការកត់សម្គាល់ សម្តីអំពាវនាវរបស់ប្រមុខការទូតសហភាពអឺរ៉ុប យ៉ាងដូច្នេះ គឺធ្លាក់មក ២ សប្តាហ៍ក្រោយ ពីប្រសាសន៍របស់ប្រធានាធិបតីបារាំង ដែលក្នុងពេលបំពេញទស្សនកិច្ចកិច្ចនៅប៉េកាំង លោក ម៉ាក្រុង ថ្លែងថា ក្នុងសំណុំរឿងតៃវ៉ាន់ អឺរ៉ុប មិនត្រូវដើរតាមចិន ឬតាមអាមេរិក ទេ។
ដោយឡែក ចំពោះការធ្វើនាវាចរណ៍នៅច្រកសមុទ្រតៃវ៉ាន់ គឺពីរថ្ងៃក្រោយលោកម៉ាក្រុងទៅចិន នាវាចម្បាំងរបស់បារាំង បានបើកពីវៀតណាម ទៅ កូរ៉េខាងត្បូង ដោយឆ្លងកាត់ច្រកសមុទ្រតៃវ៉ាន់ ដែលនេះ ត្រូវអគ្គមេបញ្ជាយោធាបារាំង បញ្ជាក់ថា ដំណើរឆ្លងកាត់ផ្លូវសមុទ្រនេះ បានត្រៀមទុកជាយូរមកហើយ និងថា នេះជាការធម្មតាសមស្របតាមសិទ្ធិសេរីភាពនាវាចរណ៍ និងស្របតាមច្បាប់សមុទ្រអន្តរជាតិ។
ករណីសំណុំរឿងតៃវ៉ាន់នេះ បង្កក្តីបារម្ភជាច្រើន ខណៈពេលដែល សហរដ្ឋអាមេរិក បង្កើនសកម្មភាពសមយុទ្ធនៃក្បែរកោះតៃវ៉ាន់ ពិសេសការបង្កើតមូលដ្ឋានយោធាបន្ថែមទៀត នៅហ្វីលីពីន។ ហ្វីលីពីន ដែលនៅកៀកក្បែរកោះតៃវ៉ាន់ជាងគេ។ កាលពីថ្ងៃ សុក្រកន្លងទៅនេះ រដ្ឋមន្ត្រីការបរទេសចិន លោក ជី កង បានធ្វើដំណើរទស្សនកិច្ចដ៏កម្រ ទៅប្រទេសហ្វីលីពីន ដើម្បីពិភាក្សាពីសំណុំរឿងសន្តិសុខក្នុងតំបន់និងពីផលប្រយោជន៍រួម រវាង ហ្វីលីពីន និងចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ