អាមេរិក-បារាំង៖តៃវ៉ាន់ និងសង្រ្គាមអ៊ុយក្រែនជាប្រធានបទសំខាន់នៃកិច្ចសន្ទនាតាមទូរស័ព្ទរវាងលោកបៃដិន និងលោកម៉ាក្រុង
ប្រធានាធិបតីអាមេរិកលោកចូ បៃដិន និងសមភាគីបារាំងលោកអេម៉ានុយអែល ម៉ាក្រុងបានជួបជជែកគ្នាតាមទូរស័ព្ទក្នុងថ្ងៃព្រហស្បតិ៍ ទី២០ មេសា។ ក្រៅពីប្រធានបទស្តីពីកិច្ចសហប្រតិបត្តិការទ្វេភាគីអាមេរិក និងបារាំង លោកបៃដិន និងលោកម៉ាក្រុងបាននិយាយពីសង្រ្គាមអ៊ុយក្រែន និងរឿងតៃវ៉ាន់។ រឿងតៃវ៉ាន់នេះហាក់កំពុងក្លាយជារឿងដែលមានភាពខ្វែងគំនិតគ្នាបន្តិចរវាងបារាំង និងអាមេរិកនៅក្រោយទស្សនកិច្ចរបស់លោកម៉ាក្រុងនៅចិន។ គួរបញ្ជាក់ថា លោកបៃដិន និងលោកម៉ាក្រុងធ្លាប់បានជួបគ្នាតាមទូរស័ព្ទម្តងនៅមុនទស្សនកិច្ចរបស់លោកម៉ាក្រុងនៅចិន។
ចុះផ្សាយនៅថ្ងៃ៖
ស្តាប់ - ០២:២០
នៅក្រោយកិច្ចសន្ទនាតាមទូរស័ព្ទរវាងលោកបៃដិន និងលោកម៉ាក្រុង សេតវិមាន និងវិមានអេលីហ្សេបានចេញសេចក្តីប្រកាសព័ត៌មានរៀងខ្លួន។ សេចក្តីប្រកាសព័ត៌មានរបស់សេតវិមានបានលើកឡើងដោយខ្លីថា មេដឹកនាំទាំងពីរបាននិយាយពីដំណើរទស្សនកិច្ចថ្មីៗរបស់លោកម៉ាក្រុងនៅចិន និងពីកិច្ចប្រឹងប្រែងក្នុងការបន្តលើកកម្ពស់វិបុលភាព សន្តិសុខ តម្លៃរួម និងសណ្តាប់ធ្នាប់អន្តរជាតិដោយផ្អែកលើនីតិរដ្ឋនៅក្នុងតំបន់អាស៊ីប៉ាស៊ីហ្វិក។ រឿងសង្រ្គាមអ៊ុយក្រែនត្រូវបានសេចក្តីប្រកាសព័ត៌មានរបស់សេតវិមានបញ្ជាក់ថា លោកបៃដិន និងលោកម៉ាក្រុងបានបញ្ជាក់ជាថ្មីពីការគាំទ្រអ៊ុយក្រែនដោយគ្មានដកដៃប្រឈមនឹងការឈ្លានពានរបស់រុស្ស៊ី។
ចំណែកសេចក្តីប្រកាសព័ត៌មានរបស់វិមានអេលីហ្សេដែលមានភាពលំអិត និងវែងជាងបានបញ្ជាក់ថា លោកបៃដិន និងលោកម៉ាក្រុងបានឯកភាពលើសារៈសំខាន់នៃការបន្តដាក់បញ្ចូលចិនឲ្យចូលរួមស្វែងរកដំណោះស្រាយបិទបញ្ចប់ជម្លោះនៅអ៊ុយក្រែន។ បារាំងយល់ថា ចិនមានតួនាទីដែលត្រូវបំពេញដោយសារតែចិនជាសម្ព័ន្ធមិត្តរបស់រុស្ស៊ី។ ទាក់ទងនឹងរឿងតៃវ៉ាន់ត្រូវបានវិមានអេលីហ្សេអះអាងថា លោកម៉ាក្រុងបានបញ្ជាក់ជាថ្មីជាមួយលោកបៃដិនពីឆន្ទៈដែលចង់ឃើញអឺរ៉ុបបន្តពង្រឹងខ្លួនឯងដើម្បីធានាការទទួលខុសត្រូវរបស់ខ្លួនក្នុងការចែករំលែកសន្តិសុខអាត្លង់ទិក។
គួរបញ្ជាក់ថា នៅក្នុងដំណើរទស្សនកិច្ចថ្មីៗរបស់លោកម៉ាក្រុងនៅចិន លោកម៉ាក្រុងបានបង្កឲ្យមានភាពភ្ញាក់ផ្អើល និងមិនយល់ចំពោះអាមេរិក និងចិនដោយបានលើកឡើងថា អឺរ៉ុបមិនគួរមានជំហរ និងដើរតាមផ្លូវរបស់អាមេរិក និងចិនពាក់ព័ន្ធនឹងបញ្ហាតៃវ៉ាន់ទេ។ អ្វីដែលលោកម៉ាក្រុងចង់មានន័យនេះគឺថា អឺរ៉ុបត្រូវមានជំហរ និងការទទួលខុសត្រូវរបស់ខ្លួនចំពោះវិបត្តិក្នុងលោក និយាយជារួម និងបញ្ហាតៃវ៉ាន់ និយាយដោយឡែក។ បញ្ហាតៃវ៉ាន់ដែលប្រមុខការទូតចិនបានបញ្ជាក់ក្នុងថ្ងៃសុក្រ ទី២១ មេសាថា ចិននឹងមិនធ្វើសមទានណាមួយដាច់ខាត និងបានចាត់ទុកការរិះគន់ លូកដៃរបស់បស្ចិមលោកថាជារឿងមិនទំនងដែលអាចបង្កឲ្យមានផលវិបាកដ៏គ្រោះថ្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ