ចិនបានផ្ទុះកំហឹងប្រឆាំងអាមេរិកដែលបានបញ្ជូននាវាចម្បាំង USS Milius ទៅកាន់ច្រកសមុទ្រតៃវ៉ាន់
នៅថ្ងៃអាទិត្យ ទី១៦ មេសា កងទ័ពអាមេរិកបានបញ្ជាក់ពីដំណើរឆ្លងកាត់ច្រកសមុទ្រតៃវ៉ាន់របស់នាវាចម្បាំងឈ្មោះ USS Milius។ ចំណែកចិនដែលបានចាត់ទុកច្រកសមុទ្រតៃវ៉ាន់ជាដែនទឹករបស់ខ្លួនបានបញ្ចេញប្រតិកម្មក្នុងថ្ងៃចន្ទ ទី១៧ មេសាថា ខ្លួនបានតាមឃ្លាំមើលយ៉ាងយកចិត្តទុកដាក់ជាទីបំផុតពីដំណើរឆ្លងកាត់ច្រកសមុទ្រតៃវ៉ាន់របស់នាវាចម្បាំងអាមេរិកមួយនេះ។ នៅតៃវ៉ាន់ឯណោះវិញ ក្រសួងការពារជាតិបានអះអាងពីស្ថានភាពធម្មតានៅលើអាកាស និងនៅក្នុងសមុទ្រជុំវិញតៃវ៉ាន់នាពេលដំណើរឆ្លងកាត់របស់ USS Milius។
ចុះផ្សាយនៅថ្ងៃ៖
ស្តាប់ - ០២:១៩
គឺតាមរយៈសេចក្តីប្រកាសព័ត៌មានដែលកងទ័ពអាមេរិកបានប្រាប់ពីដំណើរឆ្លងកាត់ច្រកសមុទ្រតៃវ៉ាន់របស់នាវាចម្បាំង USS Milius។ តែអ្វីដែលសេចក្តីប្រកាសព័ត៌មានដដែលចង់សង្កត់ធ្ងន់ ការឆ្លងកាត់ច្រកសមុទ្រតៃវ៉ាន់របស់ USS Milius ជាទម្លាប់ដូចសព្វមួយដង និងថា កងទ័ពអាមេរិកមានសិទ្ធិហោះហើរនៅលើអាកាស មានសិទ្ធិធ្វើចរាចរណ៍នៅក្នុងសមុទ្រ និងមានសិទ្ធិធ្វើប្រតិបត្តិការនៅគ្រប់ទីកន្លែងទាំងអស់ដែលច្បាប់អន្តរជាតិអនុញ្ញាតឲ្យ។ តែចិនដែលបានទាមទារ និងបានចាត់ទុកច្រកសមុទ្រតៃវ៉ាន់ជាកម្មសិទ្ធិផ្តាច់មុខរបស់ខ្លួនមិនបានយល់ឃើញដូចអាមេរិកឯណា។
ក្រៅពីបានបញ្ជាក់ពីការតាមឃ្លាំមើលដំណើរឆ្លងកាត់ច្រកសមុទ្រតៃវ៉ាន់របស់នាវាចម្បាំងអាមេរិក USS Milius អ្នកនាំពាក្យកងទ័ពចិនលោកឈី យីបានប្រាប់ឲ្យដឹងក្នុងថ្ងៃចន្ទ ទី១៧ មេសានេះថា ទ័ពចិននៅក្នុងតំបន់បន្តរក្សាភាពប្រុងប្រយ័ត្នកម្រិតខ្ពស់ និងប្តេជ្ញាការពារយ៉ាងម៉ឺងម៉ាត់នូវអធិបតេយ្យភាព និងសន្តិសុខជាតិ រួមទាំងសន្តិភាព និងស្ថិរភាពនៅក្នុងតំបន់។ ប្រតិកម្មក៏មានពីក្រសួងការពារជាតិតៃវ៉ាន់ដោយធានាថា ស្ថានភាពនៅលើអាកាស និងនៅក្នុងសមុទ្រមានភាពធម្មតានៅជុំវិញកោះតៃវ៉ាន់នាពេលដំណើរឆ្លងកាត់ច្រកសមុទ្រតៃវ៉ាន់របស់នាវាចម្បាំងអាមេរិក USS Milius។
គួរបញ្ជាក់ថាកាលពីសប្តាហ៍កន្លងទៅ នាវាចម្បាំងអាមេរិក USS Milius ដូចគ្នានេះបានធ្វើដំណើរចូលក្បែរទីប្រជុំកោះ Spratleys ក្នុងសមុទ្រចិនខាងត្បូងដែលចិនបានទាមទារជាកម្មសិទ្ធិផ្តាច់មុខរបស់ខ្លួន។ កាលណោះ ក្រុងប៉េកាំងបានចេញមុខបរិហារអាមេរិកដោយចាត់ទុកជាទង្វើបំពានខុសច្បាប់។ អ្វីជាការកត់សម្គាល់ វត្តមាននាវាចម្បាំងអាមេរិក USS Milius នៅច្រកសមុទ្រតៃវ៉ាន់ពេលនេះបានកើតមានឡើង មួយសប្តាហ៍ក្រោយពីកងទ័ពចិនបានធ្វើសមយុទ្ធទ្រង់ទ្រាយធំរយៈពេល ៣ថ្ងៃនៅជុំវិញតៃវ៉ាន់។ មូលហេតុដែលបានជំរុញចិនឲ្យធ្វើសមយុទ្ធនេះ គឺក្រោយពីប្រធានាធិបតីតៃវ៉ាន់លោកស្រីសៃ អ៊ីងវេនបានចូលជួបប្រធានសភាអាមេរិកលោក Kevin McCarthy៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ