អ្នកបោះពុម្ពសៀវភៅតៃវ៉ាន់ ជាប់អង្កេតពីបទបង្ក “គ្រោះថ្នាក់ដល់សន្តិសុខជាតិចិន”
ចាប់ខ្លួនដោយសម្ងាត់នៅក្រុងសៀងហៃ អ្នកបោះពុម្ពសៀវភៅជាតិតៃវ៉ាន់ លីយ៉ានហេ (Li Yanhe) ត្រូវជាប់អង្កេត ពីបទសង្ស័យ “បង្កគ្រោះថ្នាក់ដល់សន្តិសុខជាតិចិន”។ នេះបើតាមសេចក្តីជូនដំណឹងរបស់អាជ្ញាធរចិន នៅព្រឹកថ្ងៃពុធទី ២៦មេសា២០២៣។ ដំណឹងនេះធ្លាក់មក តែមួយថ្ងៃក្រោយពីតុលាការចិនទើបធ្វើការចោទប្រកាន់ជាផ្លូវការអ្នកនយោបាយតៃវ៉ាន់ម្នាក់ពីបទផ្តាច់ខ្លួននិយម។
ចុះផ្សាយនៅថ្ងៃ៖
ស្តាប់ - ០១:៥៣
សកម្មជននិងអ្នកសារព័ត៌មានតៃវ៉ាន់បានស្រែក តាំងពីដើមខែថា លោក លី យ៉ានហេ ត្រូវបានអាជ្ញាធរចិនចាប់ខ្លួន យ៉ាងសម្ងាត់ នៅពេលលោកធ្វើដំណើរទៅសួរសុខទុក្ខគ្រួសារនៅក្រុងសៀងហៃ។ កាលពីសប្តាហ៍មុន ក្រុមប្រឹក្សាទទួលបន្ទុកកិច្ចការចិនដីគោកដែលជាស្ថាប័នប្រតិបត្តិរបស់តៃវ៉ាន់ បានធានារ៉ាប់រងនិងប្រាប់គ្រួសារថា លោក លី មានសុវត្ថិភាពទេ។
នៅថ្ងៃនេះ អ្នកនាំពាក្យការិយាល័យកិច្ចការតៃវ៉ាន់ប្រចាំក្រុងប៉េកាំង បានចេញមុខ ប្រកាសនៅចំពោះមុខអ្នកសារព័ត៌មាន តែម្តងថា លោក លី យ៉ានហេ ដែលជាប្រធានរោងបោះពុម្ពGusa ស្ថិតក្រោមការអង្កេតរបស់ស្ថាប័នសន្តិសុខជាតិ ពីបទសង្ស័យធ្វើសកម្មភាពបង្កឱ្យមានគ្រោះថ្នាក់ដល់សន្តិសុខជាតិចិន។ ប៉ុន្តែភាគីពាក់ព័ន្ធបានទទួលការការពារនិងសិទ្ធិជាមូលដ្ឋាន ស្របតាមច្បាប់របស់ចិន។ ច្បាប់ចិន ស្តីពីសន្តិសុខ ចែងហាមឃាត់ ដោយប្រើពាក្យបែបទូទៅខ្លាំងណាស់ រាប់បញ្ចូលទាំង សកម្មភាពផ្តាច់ខ្លួន និងវិទ្ធង្សនាផង។
សូមបញ្ជាក់ថា រោងពុម្ព Gusa របស់លោកលី មានបោះផ្សាយសៀវភៅប្រវត្តិសាស្ត្រ និងសៀវភៅរិះគន់នយោបាយរបស់គណបក្សកុម្មុយនិស្តចិន ព្រមទាំងសៀវភៅនិយាយអំពីការគាបសង្កត់លើជនជាតិភាគតិចអ៊ុយហ្គួរ នៅស៊ីនជាំង ឬ អំពីការឃោសនាមនោគមវិជ្ជាចិននៅអន្តរជាតិផង។
សេចក្តីប្រកាសបើកអង្កេតប្រឆាំងនឹងលោកលី ធ្វើឡើងតែមួយថ្ងៃក្រោយការចោទប្រកាន់ជាផ្លូវការលើរូបអ្នកនយោបាយតៃវ៉ាន់ លោក Yang Chig-yuan ដែលជាប់ឃុំឃាំងក្នុងប្រទេសចិនតាំងពីឆ្នាំមុន ពីបទចង់ផ្តាច់ខ្លួន។ ជាអនុប្រធានគណបក្សតូចមួយ ដែលមានគោលការណ៍នយោបាយការពារឯករាជ្យឱ្យតៃវ៉ាន់ លោក យង ត្រូវបានអាជ្ញាធរចិនចាប់ខ្លួនពេលធ្វើដំណើរទៅកាន់ក្រុង Wenzhou ភាគខាងកើតប្រទេសចិន កាលពីខែសីហាឆ្នាំ២០២២។ សម្រាប់ចិន លោក យង បានញុះញង់ឱ្យមានភាពតានតឹងរវាងតៃវ៉ាន់និងប៉េកាំង ដោយបានរៀបចំព្រឹត្តិការណ៍ជាច្រើនដើម្បីទាមទារឯករាជ្យតៃវ៉ាន់។ លោក ក៏ជាសកម្មជនគាំទ្រឯករាជ្យហុងកុងទៀត។
ចិនបានចាប់ខ្លួនសកម្មជនតៃវ៉ាន់ជាច្រើននាក់។ ល្បីខ្លាំងជាងគេ នារយៈពេលប៉ុន្មានឆ្នាំចុងក្រោយនេះ គឺការចាប់ខ្លួនសកម្មជនប្រជាធិបតេយ្យ លី មីងឆេ Lee Ming-Che ដែលត្រូវតុលាការចិនដាក់ទោសឱ្យជាប់ពន្ធនាគារ៥ឆ្នាំពីបទបង្កសកម្មភាពប៉ះពាល់ដល់សន្តិសុខជាតិ និងទើបត្រូវបានដោះលែងកាលពីឆ្នាំមុន។ នៅឆ្នាំ២០១៥ បណ្ណាគារក្សហុងកុង៥នាក់ បានបាត់ខ្លួនដែរ បន្ទាប់ពីចេញលក់សៀវភៅរិះគន់ប៉េកាំង។ ទាំង៥នាក់ ត្រូវជាប់ពន្ធនាគារ និងព្រមសារភាពតាមកញ្ចក់ទូរទស្សន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ