យោធាថៃ ប្តេជ្ញាថានឹងមិនធ្វើរដ្ឋប្រហារនៅក្រោយការបោះឆ្នោត
នៅប្រទេសថៃ ថ្ងៃសុក្រ ឧត្តមសេនីយ៍យោធាថៃ ប្រកាសប្តេជ្ញាថានឹងមិនធ្វើរដ្ឋប្រហារនៅក្រោយការបោះឆ្នោត។ លោកឧត្តមសេនីយ៍ ណរង្គផាន់ ជីតកេវថេ មានប្រសាសន៍ «មិនគួរមានរដ្ឋប្រហារទៀតទេ។ ចំពោះខ្ញុំ ពាក្យនេះ គួរតែត្រូវលុបចោលពីវចនានុក្រម។»។ ដំណឹងនេះ ប្រកាសឡើងតែ ២ ថ្ងៃប៉ុណ្ណោះ មុនការបោះឆ្នោតជាតិ។ ពោលគឺនៅថ្ងៃអាទិត្យ ទី១៤ឧសភា ដែល ប្រជាពលរដ្ឋថៃ ប្រមាណ ៥២លាននាក់ ត្រូវចេញទៅបោះឆ្នោត។
ចុះផ្សាយនៅថ្ងៃ៖
ស្តាប់ - ០២:២៩
ការប្រកាសរបស់ថ្នាក់ដឹកនាំយោធាបែបនេះ បន្ទាប់ពីមានក្តីបារម្ភ និង ក្តីមន្ទិសសង្ស័យជាទូទៅ ថា ពួកយោធាថៃ ទំនងជាអាចនឹងធ្វើរដ្ឋប្រហារទៀត ប្រសិនបើ គណបក្សកាន់អំណាច ចាញ់ឆ្នោតមែននោះ។ នៅស្រុកថៃ ក្តីបារម្ភពីរដ្ឋប្រហារយោធា គឺពុំមានជារឿងចម្លែកពេកទេ ដ្បិតថា រយៈពេល ៩០ ឆ្នាំ ចុងក្រោយនេះ ប្រទេសថៃបានជួបរដ្ឋប្រហារ ជាញឹកញយ ពោលគឺ រដ្ឋប្រហារ បានសម្រេច ១២ដង ហើយ ចេតនាបម្រុងធ្វើរដ្ឋប្រហារ ជិត២០ដង។ រដ្ឋប្រហារ «បានសម្រេច» ចុងក្រោយបំផុត គឺនៅឆ្នាំ ២០១៤ ទម្លាក់អ្នកស្រីនាយករដ្ឋមន្ត្រី យីងឡាក់ ស៊ីណាវ៉ាត់ ពីសំណាក់លោក ប្រាយុទ្ធ ចាន់អូចា អតីតឧត្តមសេនីយយោធា និងជានាយករដ្ឋមន្ត្រីផុតអាណត្តិ។
ផលវិបាកប៉ះពាល់ពីរដ្ឋប្រហារចុងក្រោយនេះ គឺធ្វើឲ្យបណ្តាអ្នកនយោបាយស្និទ្ធនឹងពួកយោធា បានដឹងខ្លួនច្បាស់ថា ជះឥទ្ធិពលអវិជ្ជមានច្រើនសម្បើមណាស់។ ជាក់ស្តែង ការសន្ទង់មតិចុងក្រោយ ក៏សឲ្យឃើញដែរថា គណបក្សកាន់អំណាច គឺគណបក្សផាឡាំងប្រាឆារ៉ាត់ ធ្លាក់សំឡេងគាំទ្រ ហើយនិងគណបក្សរួបរួមជាតិថៃ របស់លោក ប្រាយុទ្ធ ចាន់អូចា ក៏មិនសូវជាមានសំឡេងគាំទ្រច្រើនដែរ។ ផ្ទុយទៅវិញ ក្រុមគណបក្សប្រឆាំង កំពុងតែមានសំឡេងនាំមុខ។ បក្សប្រឆាំង ២ ដែល កំពុងតែមានសំឡេងគាំទ្រច្រើន តាមការសន្ទង់មតិ នោះគឺ គណបក្សភឿថៃ ហើយបក្សប្រឆាំងដ៏លេចធ្លោមួយទៀត គឺ «បក្សបោះពួយទៅមុខ» របស់លោក ពិថា លិមចៈរើនរ៉័ត (ពិធា លីមចម្រើនរតន៍) ដែលមានប្រជាប្រិយប្រិយភាពខ្លាំងនៅក្នុងចំណោមយុវជនថៃ។
គណបក្សភឿថៃ ដឹកនាំដោយអ្នកស្រី ភែថងថាន ស៊ីណាវ៉ាត់ ជាកូនស្រីរបស់ អតីតនាយករដ្ឋមន្ត្រី ថាក់ស៊ីន ស៊ីណាវ៉ាត់។ ការបោះឆ្នោតលើកនេះ បក្សភឿថៃ បញ្ចេញគោលការណ៍ទាក់ចិត្តពលរដ្ឋថៃ ជាខ្លាំង។ នោះគឺការសន្យាដំឡើងប្រាក់ខែអប្បបរិមា ផ្តល់សេវាធានារ៉ាប់រ៉ង់សុខភាពសម្រាប់ពលរដ្ឋគ្រប់រូប កាត់បន្ថយតម្លៃធ្វើដំណើរដឹកជញ្ចូន ហើយជំរុញកំណើនជីវភាពប្រជាជនក្រីក្រ។ ទន្ទឹមនឹងនឹងគ្នានេះ ការប្រកាសវិលចូលស្រុកវិញនៅខែកក្កដា ក្រោយនិរទេសខ្លួន១៧ឆ្នាំ របស់លោក ថាក់ស៊ីន ក៏ទំនងជាកាន់តែជំរុញ ឲ្យអ្នកគាំទ្របក្សភឿថៃ សប្បាយចិត្តកាន់តែខ្លាំង ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ