លោកណារិន្ទ្រ ម៉ូឌី ទៅប៉ាពូអាស៊ីនូវែលហ្គីណេ ដើម្បីពង្រឹងឥទ្ធិពលប្រជែងនឹងចិន
ចប់ពីជំនួបកំពូលជាមួយក្រុមប្រទេសឧស្សាហកម្មនាំមុខ G7 លោកណារិន្ទ្រ ម៉ូឌី បានធ្វើដំណើរទៅដល់ប្រទេសប៉ាពូអាស៊ី នូវែលហ្គីណេ កាលពីថ្ងៃអាទិត្យម្សិលមិញ។ ជាមួយនឹងទស្សនកិច្ចជាលើកទី១ ដែលមានរយៈពេល២ថ្ងៃនេះ លោកនាយករដ្ឋមន្ត្រីឥណ្ឌា មានបំណងស្វែងរកច្រកផ្លូវ ដើម្បីពង្រឹងឥទ្ធិពលឥណ្ឌា នៅតាមប្រទេសដែនកោះប៉ាស៊ីហ្វិក ខណៈតំបន់នេះកំពុងស្ថិតនៅក្នុងរង្វង់ឥទ្ធិពលរបស់ចិន កាន់តែខ្លាំងឡើងៗ។
ចុះផ្សាយនៅថ្ងៃ៖
ស្តាប់ - ០២:១០
តាមធម្មតា ដោយយោងតាមប្រពៃណី ប្រទេសប៉ាពូអាស៊ីនូវេលហ្គីណេ មិនមានទំលាប់ទទួលភ្ញៀវដែលជាថ្នាក់ដឹកនាំបរទេស នៅក្រោយពេលថ្ងៃលិចនោះឡើយ។ តើលើកនេះ ប៉ាពូអាស៊ីណូវែលហ្គីណេ បានទទួលជាលក្ខណៈពិសេស ដោយលោកណារិន្ទ្រ ម៉ូឌី នាយករដ្ឋមន្ត្រីឥណ្ឌា បានចុះជាន់ដីជាលើកទី១ នៅយប់ថ្ងៃអាទិត្យទី ២១ឧសភា។
ទៅដល់ភ្លាម លោក ណារិន្ទ្រ ម៉ូឌី បានជួបជាមួយលោក James Marape នាយករដ្ឋមន្ត្រីប៉ាពូអាស៊ី ។ ហើយនៅថ្ងៃចន្ទទី២២ឧសភានេះ លោកណារិន្ទ្រ ម៉ូឌី នឹងចូលរួមបើកសម្ពោធវេទិកាលើកទី៣ ដើម្បីដែនកោះតំបន់ឥណ្ឌូប៉ាស៊ីហ្វិក ដែលនឹងមានប្រទេសក្នុងតំបន់នេះចូលរួម ចំនួន១៤ប្រទេស។
គួរបញ្ជាក់ថា ប៉ាពូអាស៊ីនូវែលហ្គីណេ គឺជាប្រទេសស្ថិតនៅក្នុងចំណោមលំដាប់លេងរៀងចុងក្រោយ ស្តីអំពីការអភិវឌ្ឍន៍ធនធានមនុស្ស ថ្វីបើប្រទេសនេះ គឺជាប្រទេសដ៏ធំជាងគេ ក្នុងចំណោមប្រទេសតំបន់ប៉ាស៊ីហ្វិក។ សម្រាប់ឥណ្ឌា ទំនាក់ទំនងជាមួយប្រទេសនេះ មានតម្លៃយុទ្ធសាស្រ្តខ្ពស់ផ្នែកការទូត។
ផ្អែកតាមលោក Harsh Pant អនុប្រធានវិទ្យាស្ថានភូមិសាស្ត្រនយោបាយ ORF ប្រចាំនៅក្រុងញូដេលី គឺបច្ចុប្បន្ននេះ ចិនបានប្រគល់នូវជំនួយជាច្រើនទៅឲ្យប្រទេសប៉ាពូអាស៊ី នូវែលហ្គីណេ ដោយរាប់ទាំងការសាងសង់ហេដ្ឋារចនាសម្ព័ន្ធជាដើម។ លោកពន្យល់ថា ប្រទេសប៉ាពូអាស៊ីនូវែលហ្គីណេ ទំនងជាមិនចង់យកខ្លួនទៅពាក់ព័ន្ធជាមួយនឹងការប្រជែងឥទ្ធិពលគ្នា រវាងចិននិងឥណ្ឌាពិតមែន ក៏ប៉ុន្តែ ឥណ្ឌាអាចធ្វើខ្លួនឲ្យក្លាយជាដៃគូ ដែលគួរជាទីចាប់អារ្មណ៍របស់ប្រទេសនេះ។
យោងតាមលោក Harsh Pant រដ្ឋាភិបាលឥណ្ឌា កាន់តែសកម្មខ្លាំងឡើង នៅក្នុងតំបន់ប៉ាស៊ីហ្វិកខាងត្បូង តាមរយៈការផ្តួចផ្តើមគំនិតបង្កើតវេទិកាប្រទេសតំបន់ឥណ្ឌូប៉ាស៊ីហ្វិក នៅឆ្នាំ២០១៤។ ក្នុងឱកាសវេទិកានេះ ឥណ្ឌានឹងនឹងនិយាយអំពីគម្រោងវិនិយោគថ្មីៗ ជាពិសេសក្នុងវិស័យថាមពលបៃតង និងផ្នែកបច្ចេកវិទ្យាព័ត៌មានវិទ្យា។
ចេញពីប៉ាពូអាស៊ីនូវែលហ្គីណេ លោកណារិន្ទ្រ ម៉ូឌី នឹងបន្តដំណើរទៅកាន់ប្រទេសអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ