ជប៉ុនឃាត់ខ្លួនជនជាតិចិនម្នាក់ពីបទសង្ស័យលួចផ្ទេរបច្ចេកវិទ្យារសើបៗ
គេធ្លាប់និយាយច្រើនអំពីការចាប់ខ្លួនបរទេស (អាមេរិក កាណាដា ជប៉ុន) នៅក្នុងប្រទេសចិនក្រោមលេសចារកិច្ច។ តែនៅថ្ងៃព្រហស្បតិ៍ទី ១៥មិថុនា ២០២៣ ក្នុងបរិបទនៃការប្រកួតប្រជែងបច្ចេកវិទ្យានៅលើពិភពលោក ជប៉ុនបានចាប់ខ្លួនអ្នកស្រាវជ្រាវជាតិចិនម្នាក់ ពីបទជាប់សង្ស័យលួចផ្ទេរបច្ចេកវិទ្យារសើបៗទៅក្រុមហ៊ុនព័ត៌មានវិទ្យាចិន។ នេះបើតាមសេចក្តីប្រកាសរបស់ប៉ូលិសជប៉ុន។
ចុះផ្សាយនៅថ្ងៃ៖
ស្តាប់ - ០១:៥៤
មានអាយុ៥៩ឆ្នាំ ធ្វើការនៅវិទ្យាស្ថានស្រាវជ្រាវជប៉ុន បុរសជនជាតិចិនទំនងជាបានរំលោភច្បាប់ ប្រឆាំងនឹងការប្រកួតប្រជែងដោយខុសច្បាប់។ អ្នកនាំពាក្យប៉ូលិសជប៉ុនបានអះអាងទៀតថា នៅឆ្នាំ២០១៨ ជនសង្ស័យចិននេះ ទំនងជាបានផ្ទេរព័ត៌មានបច្ចេកវិទ្យា ទាក់ទងនឹងការធ្វើសំយោគភ្លុយអ័រFluor ទៅឱ្យក្រុមហ៊ុនព័ត៌មានវិទ្យាមួយនៅក្នុងប្រទេសចិន តាមរយៈអ៊ីមែលអាជីព នៅវិទ្យាស្ថានជាតិឧស្សាហកម្ម វិទ្យាសាស្ត្រនិងបច្ចេកវិទ្យាទំនើប។ ប៉ុន្តែប៉ូលិសជប៉ុនមិនបង្ហាញអត្តសញ្ញាណជនជាប់សង្ស័យរូបនេះទេ។
សហរដ្ឋអាមេរិកនិងសម្ព័ន្ធមិត្ត មានជាអាទិ៍ជប៉ុន ប្រុងប្រយ័ត្ននិងព្រួយបារម្ភខ្លាំងណាស់ទាក់ទងនឹងការផ្ទេរបច្ចេកវិទ្យាទំនើបចុងក្រោយទៅប្រទេសចិន ដែលល្បីខាងចាំលួចចម្លង។ នៅឆ្នាំ២០២២ វ៉ាស៊ីនតោន បានថែមទាំងដាក់បម្រាមមិនឱ្យចិនអាចរកទិញបន្ទះឈីបមានគុណភាពខ្ពស់និងសម្ភារៈបរិក្ខារសម្រាប់ផលិតសឺមីកុងឌុចទ័រ ក្រោមហេតុផលថាខ្លាចនាំឱ្យប៉ះពាល់ដល់សន្តិសុខជាតិ។ សហរដ្ឋអាមេរិកក៏បានលើកឡើងថាខ្លួនមិនចង់ឃើញកងកម្លាំងយោធាចិននិងភ្នាក់ងារចារកិច្ចចិន អាចមានបច្ចេកវិទ្យាសម្រាប់អភិវឌ្ឍន៍សព្វាវុធទំនើបៗទេ។
សហរដ្ឋអាមេរិកចាត់វិធានការដោយផ្ទាល់ខ្លួនឯងហើយ បានស្នើសុំឱ្យប្រទេសជាសម្ព័ន្ធធ្វើតាមដែរ។ រហូតមកទល់ពេលនេះ ដោយមិនបញ្ជាក់ដោយចំៗ ការហាមលក់ទៅឱ្យចិនប្រទេសហូឡង់ និងជប៉ុន បានប្រកាសកំរិតការនាំចេញបច្ចេកវិទ្យាផលិតបន្ទះឈីប ដែរហើយ ដែលជាហេតុធ្វើឱ្យចិនមិនសប្បាយចិត្តទេ។
ចិន ដែលកំពុងចំណាយទុនរាប់ពាន់លានដុល្លារ នារយៈពេល១០ឆ្នាំចុងក្រោយនេះ ដើម្បីអភិវឌ្ឍផលិតកម្មសឺមីកុងឌុចទ័រខ្លួនឯង បានដាក់ពាក្យបណ្តឹងនៅអង្គការពាណិជ្ជកម្មពិភពលោក ប្រឆាំងនឹងវិធានការរបស់អាមេរិក។ នៅឆ្នាំ២០២១ ចិនបាននាំចូលសឺមីកុងឌុចទ័រ ក្នុងតម្លៃច្រើនជាងការចំណាយទិញប្រេងទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ