ថៃ៖គណបក្សកាវក្លៃបានបង្ខំចិត្តប្រគល់តំណែងប្រធានសភាទៅឲ្យគណបក្សប្រាឆាឆាត
នៅក្នុងប្រទេសថៃ គណបក្សកាវក្លៃរបស់លោកភិថា លីមចៈរើនរ៉ាត់ដែលបានឈ្នះឆ្នោតនាការបោះឆ្នោតសភាក្នុងខែឧសភាបានបង្ខំចិត្តដកបេក្ខភាពប្រធានសភាដោយបានប្រគល់តំណែងនេះទៅឲ្យប្រធានគណបក្សប្រាឆាឆាតលោកវ៉ាន់ មូហាម៉ាត់ ណរម៉ៈថា។ សម្បទាននេះជាលទ្ធផលបានមកពីការចរចារវាងគណបក្សកាវក្លៃ និងគណបក្សភឿថៃដែលបានឈ្នះឆ្នោតលំដាប់ទី២។ មួយវិញទៀត ការសម្រេចរបស់គណបក្សកាវក្លៃបានធ្វើឡើងនៅប៉ុន្មានម៉ោងមុនសភាថ្មីបើកសម័យប្រជុំលើកទី១ ក្នុងថ្ងៃចន្ទ ទី៤ កក្កដាក្រោមព្រះរាជាធិបតីរបស់ព្រះមហាក្សត្រមហា វជិរ៉ាឡុងកន។
ចុះផ្សាយនៅថ្ងៃ៖
ស្តាប់ - ០២:២៤
មួយថ្ងៃក្រោយការបើកសម័យប្រជុំសភាថ្មីលើកទី១ ក្រោមព្រះរាជាធិបតីរបស់ព្រះមហាក្សត្រ សមាជិកសភាថ្មីបានចាប់ផ្តើមការងាររបស់ខ្លួនលើកទី១ នាព្រឹកថ្ងៃអង្គារ ទី៤ កក្កដា។ គួរបញ្ជាក់ថានៅក្នុងការបោះឆ្នោតសភាកាលពីថ្ងៃទី១៤ ឧសភា គណបក្សកាវក្លៃដែលជាគណបក្សប្រឆាំងដឹកនាំដោយលោកភិថា លីមចៈរើនរ៉ាត់បានធ្វើឲ្យគ្រប់គ្នាភ្ញាក់ផ្អើលដោយទទួលបានសំឡេងនាំមុខ និងបន្តដោយគណបក្សភឿថៃដែលជាគណបក្សប្រឆាំងមួយទៀតដឹកនាំដោយអ្នកស្រីភែថងថាន ស៊ីណាវ៉ាត់។ គណបក្សកាវក្លៃ និងគណបក្សភឿថៃបានចាប់ដៃជាមួយគណបក្សចំនួន ៦ ទៀតដើម្បីបង្កើតរដ្ឋាភិបាលចម្រុះ។
តែមុននឹងឈានដល់គោលដៅមួយនេះ គណបក្សឈ្នះឆ្នោតនាំមុខទាំងពីរបានជួបចរចាគ្នាច្រើនដងដើម្បីនិយាយពីសមាសភាពក្នុងរដ្ឋាភិបាលចម្រុះថ្មីក៏ដូចជាតំណែងប្រធានសភា។ រហូតដល់នាទីចុងក្រោយ គណបក្សភឿថៃបានបដិសេធមិនគាំទ្របេក្ខភាពប្រធានសភារបស់គណបក្សកាវក្លៃទេ។ តែស្រាប់នៅយប់ថ្ងៃចន្ទ ទី៣ កក្កដា កិច្ចព្រមព្រៀងមួយត្រូវបានរកឃើញដោយគណបក្សកាវក្លៃសុខចិត្តដកបេក្ខភាពប្រធានសភា និងប្រគល់តំណែងនេះទៅឲ្យប្រធានគណបក្សប្រាឆាឆាតលោកវ៉ាន់ មូហាម៉ាត់ ណរម៉ៈថា។ « ខ្ញុំនឹងធ្វើការដោយអព្យាក្រឹត »នេះជាការធានារបស់ប្រធានសភាថ្មីលោកវ៉ាន់ មូហាម៉ាត់ ណរម៉ៈថានៅចំពោះមុខសមាជិកសភាថ្មី។
ចាប់ពីពេលនេះទៅ ប្រធានសភាថ្មីមានក្នុងដៃនូវសៀវភៅកត់កិច្ចការប្រចាំថ្ងៃ និងកាលវិភាគសម្រាប់ការងារសភា ពិសេសកំណត់ថ្ងៃបោះឆ្នោតជ្រើសរើសនាយករដ្ឋមន្រ្តីថ្មីនាពេលខាងមុខ។ ប្រធានគណបក្សកាវក្លៃលោកភិថា លីមចៈរើនរ៉ាត់ត្រូវបានគេមើលឃើញជានាយករដ្ឋមន្រ្តីថ្មី។ តែដើម្បីអាចទទួលបានតំណែងនេះបាន លោកភិថាត្រូវទទួលបានសំឡេងគាំទ្រភាគច្រើនបូករួមគ្នាពីសមាជិកសភាចំនួន ៥០០នាក់ និងពីសមាជិកព្រឹទ្ធសភាចំនួន ២៥០នាក់ដែលតែងតាំងដោយកងទ័ព។ ដូច្នេះចំនួនសំឡេងគាំទ្រភាគច្រើនដែលលោកភិថាត្រូវរកដើម្បីអាចក្លាយជានាយករដ្ឋមន្រ្តី គឺ ៣៧៦សំឡេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ