បោះឆ្នោតថៃ៖គណបក្សប្រឆាំងទទួលបានសំឡេងនាំមុខ និងកំពុងត្រៀមខ្លួនឆ្ពោះទៅបង្កើតរដ្ឋាភិបាលស៊ីវិលចម្រុះ?
នៅក្នុងប្រទេសថៃ លទ្ធផលបណ្តោះអាសន្ននៃការបោះឆ្នោតសភានាថ្ងៃអាទិត្យ ទី១៤ ឧសភាបានឲ្យដឹងថា គណបក្សប្រឆាំងសំខាន់ចំនួនពីរ គឺ Move Forward ឬហៅជាភាសាថៃ កាវក្លៃ និងភឿថៃទទួលបានសំឡេងនាំមុខគេក្នុងលំដាប់ទី១ និងទី២។ ចំណែកគណបក្សរួមថៃសាងឆាតរបស់នាយករដ្ឋមន្រ្តីផុតអាណត្តិលោកប្រាយុទ្ធ ចាន់អូចាបានធ្លាក់ដល់លំដាប់ទី៥។ នៅក្នុងសន្និសីទកាសែត ប្រធានគណបក្សកាវក្លៃ លោកភិថា លីមចៈរើនរ៉ាត់បានបោះដៃរកគណបក្សភឿថៃរបស់អ្នកស្រីភែថងថាន ស៊ីណាវ៉ាត់ដើម្បីបង្កើតរដ្ឋាភិបាលស៊ីវិលចម្រុះដែលមាន ៦គណបក្ស។
ចុះផ្សាយនៅថ្ងៃ៖
ស្តាប់ - ០២:២២
យោងតាមលទ្ធផលបណ្តោះអាសន្នចុងក្រោយ គណបក្ស Move Forward ឬហៅជាភាសាថៃគណបក្សកាវក្លៃរបស់លោកភិថា លីមចៈរើនរ៉ាត់ជាគណបក្សដែលទទួលបានអសនៈច្រើនជាងគេរហូតដល់ ១៥១អសនៈនៅក្នុងសភាដែលមានអសនៈសរុបចំនួន ៥០០អសនៈ។ គណបក្សដែលទទួលបានអសនៈច្រើនលំដាប់ទី២ គឺគណបក្សភឿថៃរបស់អ្នកស្រីភែថងថាន ស៊ីណាវ៉ាត់ដោយទទួលបាន ១៤១អសនៈ។ ចំណែកគណបក្សរួមថៃសាងឆាតរបស់នាយករដ្ឋមន្រ្តីផុតអាណត្តិលោកប្រាយុទ្ធ ចាន់អូចាបានធ្លាក់ដល់លំដាប់ទី៥ ដោយទទួលបានតែ ៣៦អសនៈ។
ដោយមិនបង្អង់យូរ លោកភិថា លីមចៈរើនរ៉ាត់បានបោះដៃរកគណបក្សភឿថៃរបស់អ្នកស្រីភែថងថាន ស៊ីណាវ៉ាត់ដើម្បីបង្កើតរដ្ឋាភិបាលស៊ីវិលចម្រុះដែលមាន ៦គណបក្ស។ ដោយមិនបង្អង់យូរ អ្នកស្រីភែថងថាន ស៊ីណាវ៉ាត់ដែលជាកូនស្រីរបស់អតីតនាយករដ្ឋមន្រ្តីលោកថាន់ស៊ីន ស៊ីណាវ៉ាត់បានទទួលយកការបោះដៃរបស់លោកភិថា លីមចៈរើនរ៉ាត់។ បើគេបូកសរុបចំនួនអសនៈរបស់គណបក្សកាវក្លៃ និងគណបក្សភឿថៃ គឺមានចំនួន ២៩២អសនៈ។ តែដើម្បីអាចទទួលបានកៅអីនាយករដ្ឋមន្រ្តីបាន ក្រុមគណបក្សប្រឆាំងត្រូវការអសនៈសរុបចំនួន ៣៧៦អសនៈនៅក្នុងសភាដែលមាន ៥០០អសនៈ។
ហេតុផលនោះគឺថា រូបនាយករដ្ឋមន្ត្រីមិនមែនត្រូវបានតែងតាំងត្រឹមសំឡេងភាគច្រើនពីសមាជិកសភាទាំង ៥០០នាក់ប៉ុណ្ណោះទេ តែត្រូវបូកបន្ថែមសំឡេងពីសមាជិកព្រឹទ្ធសភាចំនួន ២៥០រូបដែលជ្រើសតាំងដោយកងទ័ពទៀត។ ដូច្នេះ សំឡេងភាគច្រើនដែលក្រុមប្រឆាំងត្រូវមាន គឺ ៣៧៦សំឡេង ពោលមិនមែន ២៥៦សំឡេងទេ។ ទោះជាយ៉ាងនេះក្តី ប្រធានគណបក្សកាវក្លៃលោកភិថា លីមចៈរើនរ៉ាត់ហាក់មិនញញើតថ្លែងថា លោកជាអនាគតនាយករដ្ឋមន្រ្តី និងបញ្ជាក់ថា ថ្ងៃនេះជាថ្ងៃថ្មីដែលលោកសង្ឃឹមនាំពន្លឺ និងក្តីសង្ឃឹមឲ្យប្រជារាស្រ្តដែលរងទុក្ខលំបាកយូរហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ