ហ្វ៊ូគូស្ហ៊ីម៉ា៖ នាយកAIEA អះអាងថាផែនការបង្ហូរទឹកកាកសំណល់ចូលសមុទ្រ បានគោរពស្តង់ដារសុវត្ថិភាពនុយក្លេអ៊ែរ
លោករ៉ាហ្វាអ៊ែល ហ្ក្រូស៊ី នាយកទីភ្នាក់ងារថាមពលនុយក្លែអ៊ែរអន្តរជាតិ (AIEA) កំពុងតែមានវត្តមាននៅប្រទេសជប៉ុន ដើម្បីពន្យល់ និងធានាអះអាងប្រាប់សាធារណៈមតិជប៉ុនថា គម្រោងនេះ ត្រូវបានគិតគូរយ៉ាងល្អិតល្អន់ ដោយគោរពទៅតាមស្តង់ដារសុវត្ថិភាពអន្តរជាតិ។ លោកអះអាងថា នឹងមិនមានផលប៉ះពាល់អ្វីទាំងអស់ ព្រោះទឹកទាំងនោះ នឹងត្រូវយកទៅបន្សុត បំបែកយកសារធាតុវិទ្យុសកម្មមួយផ្នែកធំ ដែលអាចបង្កគ្រោះថ្នាក់ មុននឹងបង្ហូរចូលបន្តិចម្តងៗទៅក្នុងសមុទ្រ ក្នុងរយៈពេលរាប់សិបឆ្នាំឯណោះ។
ចុះផ្សាយនៅថ្ងៃ៖
ទីភ្នាក់ងារថាមពលនុយក្លេអ៊ែរអន្តរជាតិ បានយល់ព្រមបើកភ្លើងខៀវលើគម្រោងស្នើឡើងដោយរដ្ឋាភិបាលជប៉ុន ដែលចង់បង្ហូរទឹកកាកសំណល់ ចេញពីមជ្ឈមណ្ឌលនុយក្លេអ៊ែរហ្វ៊ូគូស្ហ៊ីម៉ា ចូលទៅក្នុងសមុទ្រ។ តាមការគ្រោងទុក ទឹកកាកសំណល់យកចេញពីរ៉េអាក់ទ័រនុយក្លេអ៊ែរ ដែលមានចំនួន ជាង១លាន៣សែនតោននេះ នឹងត្រូវចាប់ផ្តើមបង្ហូរចូលសមុទ្រ នាប៉ុន្មានសប្តាហ៍នេះ បន្ទាប់ពីត្រូវបានបន្សុតសំអាតរួចរាល់។
សម្រង់សំដីលោក Rafael Grossi នាយកAIEA ថ្លែងនៅរោងចក្រនុយក្លេអ៊ែរ Fukushima ថ្ងៃទី៦ កក្កដា ២០២៣
ស្តង់ដារអន្តរជាតិ ស្តីពីសុវត្ថិភាពនុយក្លេអ៊ែរ ត្រូវបានកំណត់តាក់តែងឡើង ដោយចំពោះ គឺដើម្បីបញ្ចៀសការប៉ះពាល់ទាំងអស់ ទៅលើទឹក ទៅលើស្រទាប់ដីក្រោមទឹក និងសត្វត្រី នេះឯង។ គម្រោងផែនការដែលយើងបានរៀបចំនេះ ប្រសិនបើអាចអនុវត្តជាក់ស្តែង ដូចដែលយើងបានគិតគូរ គឺមានន័យថា គេនឹងមិនអាចទៅរកឃើញ នូវផលប៉ះពាល់តិចតួចណាមួយនោះទេ។
ប្រសិនបើផលប៉ះពាល់ណាមួយ ត្រូវបានគេប្រទះឃើញ ក្នុងករណីនេះគឺវាពិតជាការប៉ះពាល់ដ៏តិចតួចបំផុត ដែលយើងអាចមិនខ្វល់បាន។ មានន័យថា គឺវាមិនស្ថិតនៅក្នុងលក្ខខណ្ឌស្តង់ដារ ដែលសហគមន៍អន្តរជាតិបានកំណត់ទេ ពោលគឺវាប្រៀបបីដូចជា ផលប៉ះពាល់តិចតួចនោះ វាគ្មានសោះតែម្តង។
ខ្ញុំមិនមានដំណោះស្រាយដ៏អស្ចារ្យណាផ្សេងទៀត ដើម្បីឆ្លើយតបទៅនឹងការសង្ស័យ ឬការព្រួយបារម្ភទាំងឡាយ ដែលត្រូវបានលើកឡើងនោះឡើយ។ តែអ្វីដែលយើងមាន សម្រាប់ជូនអ្នកទាំងអស់គ្នា គឺវត្តមានរបស់យើង។ យើងនឹងនៅទីនេះ សហការ ធ្វើការជាមួយអ្នក ក្នុងរយៈពេលច្រើនទសវត្សទៅមុខទៀត រហូតទាល់តែដំណក់ទឹកចុងក្រោយដែលស្ថិតនៅជុំវិញរ៉េអាក់ទ័រ ត្រូវបានបង្ហូរចោលអស់ ប្រកបសុវត្ថិភាព។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ