ចិននិងសាឡូម៉ុងចុះកិច្ចព្រមព្រៀងសហប្រតិបត្តិការក្នុងវិស័យនគរបាល
នៅថ្ងៃចន្ទទី ១០ កក្កដា ២០២៣នេះ ប្រទេសចិននិងកោះសូឡូម៉ុង បានចុះហត្ថលេខាលើកិច្ចព្រមព្រៀងសហប្រតិបត្តិការថ្មី ក្នុងវិស័យនគរបាល។ នេះគឺជាការពង្រឹងបន្ថែមភាពជាដៃគូរវាងប្រទេសទាំងពីរ ដែលចាប់ផ្តើមផ្សារភ្ជាប់ទំនាក់ទំនងការទូតនឹងគ្នាបានបួនឆ្នាំ និងក្រោយពីកោះសាឡូម៉ុងបានផ្តាច់ការទាក់ទងនឹងតៃវ៉ាន់មក។
ចុះផ្សាយនៅថ្ងៃ៖
ស្តាប់ - ០២:១៥
“ផែនការដាក់ឱ្យដំណើរការ” សម្រាប់រយៈពេលពីឆ្នាំ២០២៣-២០២៥ គឺជាកិច្ចព្រមព្រៀងមួយក្នុងចំណោមសំណុំឯកសារព្រមព្រៀងទាំង៩ដែលសម្រេចបាន ក្រោយជំនួបពិភាក្សានៅទីក្រុងប៉េកាំងរវាងលោកម៉ាណាសេស សូហ្កាវ៉ារ នាយករដ្ឋមន្ត្រីកោះសាឡូម៉ុង និងសមភាគីចិនលោក លី ឈាំង នាថ្ងៃ១០កក្កដា។ ប្រទេសទាំងពីរ ក៏បានចុះហត្ថលេខាលើកិច្ចព្រមព្រៀងមួយទៀត ស្តីពីគម្រោងជំនួយបច្ចេកទេសកីឡា ព្រោះកោះសាឡូម៉ុង នឹងត្រូវធ្វើជាម្ចាស់ផ្ទះទទួលរៀបចំកីឡាប៉ាស៊ីហ្វិកនៅឆ្នាំនេះផង។ ហើយគឺប៉េកាំងនេះឯងជាអ្នកទទួលបន្ទុកសាងសង់ពហុកីឡាដ្ឋាន សម្រាប់រៀបចំការប្រកួតកីឡា។
នាឱកាសបំពេញទស្សនកិច្ចនៅក្នុងប្រទេសចិន ដែលប្រព្រឹត្តទៅរហូតដល់ថ្ងៃសៅរ៍ លោកនាយករដ្ឋមន្ត្រីសូហ្កាវ៉ារ នឹងអញ្ជើញទៅសម្ពោធបើកជាផ្លូវការស្ថានទូតសាឡូម៉ុងប្រចាំទីក្រុងប៉េកាំង រួចធ្វើដំណើរទៅទស្សនាខេត្តជាច្រើនផ្សេងទៀតដែលជាកម្លាំងសេដ្ឋកិច្ចសំខាន់ៗរបស់ចិន មានជាអាទិ៍ខេត្តក្វាងទុង ជៀនស៊ូ។
ទំនាក់ទំនងចិន-សាឡូម៉ុងមានវឌ្ឍនភាពល្អប្រសើរនិងល្អូកល្អើនណាស់ នារយៈពេលបួនឆ្នាំមកនេះ។ នេះជាប្រសាសន៍របស់នាយករដ្ឋមន្ត្រីចិន លី ឈាំង នាឱកាសទទួលជួបសមភាគីសាឡូម៉ុងនៅវិមានប្រជាជន ដែលឆ្លើយតបវិញថា សាឡូម៉ុងបានទទួលបទពិសោធន៍ អភិវឌ្ឍច្រើនពីចិន។
ជាប្រទេសកូនកោះដ៏ក្រីក្រមួយនៅក្នុងមហាសមុទ្ទប៉ាស៊ីហ្វិកខាងត្បូង សាឡូម៉ុងពីមុនទទួលស្គាល់តែកោះតៃវ៉ាន់ប៉ុណ្ណោះ ប៉ុន្តែនៅឆ្នាំ២០១៩ កោះបានក្រឡាស់ចិត្តផ្តាច់ទូតពីតៃប៉ិ ហើយងាកមកស្រវារាប់អានចិន។ ដោយមិននឹកស្មានដល់ កោះសាឡូម៉ុងក្លាយជាចំណាប់អារម្មណ៍និងការប្រកួតប្រជែងការទូតយ៉ាងខ្លាំងរវាងមហាអំណាចពីរគឺចិននិងអាមេរិក ក្រោយពីសាឡូម៉ុងបានចុះកិច្ចព្រមព្រៀងសន្តិសុខជាមួយប៉េកាំង នៅឆ្នាំ២០២២។ កិច្ចព្រមព្រៀងដែលមានខ្លឹមសារស្រពិចស្រពិល តែចិនក៏ដូចសាឡូម៉ុង បានបដិសេធដូចគ្នាថាគ្មានលាក់កិច្ចព្រមព្រៀងបង្កើតមូលដ្ឋានទ័ពចិនជាអចិន្ត្រៃយ៍លើកោះ ដែលមានទីតាំងប្រកបដោយយុទ្ធសាស្ត្រទេ។ កាលពីខែកុម្ភៈ អាមេរិកក៏បានបើកស្ថានទូតនៅក្រុងហូនីញ៉ារ៉ាឡើងវិញដែរបន្ទាប់ពីបិទអស់៣០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ