នាយករដ្ឋមន្រ្តីកោះសាឡូម៉ុងរិះគន់អ្នកដែលបារម្ភពីកិច្ចព្រមព្រៀងសន្តិសុខ ចិននិងសាឡូម៉ុង
នាយករដ្ឋមន្រ្តីរបស់កោះសាឡូម៉ុង បានចេញមុខការពារសិទ្ធិស្របច្បាប់របស់ប្រទេសលោក ក្នុងការចុះកិច្ចព្រមព្រៀងសន្តិសុខជាមួយប្រទេសចិន។ ថ្លែង នៅសភាសាឡូម៉ុង កាលពីថ្ងៃអង្គារទី ២៩មីនា ប្រមុខរដ្ឋាភិបាលកោះសាឡុងម៉ុងបានទាត់ចោល ក្តីបារម្ភ របស់ អូស្ត្រាលី និងនូវែលសេឡង់ ដែលថា កិច្ចព្រមព្រៀងស្តីពីសន្តិសុខរវាងចិន និងសាឡូម៉ុងគំរាមកំហែង ស្ថិរភាព និងសន្តិសុខរបស់តំបន់ប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០៣:១២
នៅសភាសាឡូម៉ុង លោកនាយករដ្ឋមន្រ្តីManasseh Sogavareបានឡើងថ្លែងសុន្ទរកថា ដ៏រំជួលចិត្តមួយ ដោយថា វាជាការជេរប្រមាថ នៅពេលគេចាត់ទុកកោះសាឡូម៉ុងថា គ្មានសមត្ថភាពចាត់ចែងកិច្ចការអធិបតេយ្យភាពរបស់ខ្លួន។ “តើពាក្យគ្មានខ្លឹមសារនោះបានមកពីណា? កិច្ចព្រមព្រៀងសន្តិសុខ រវាងចិន និងសាឡូម៉ុង ធ្វើឡើងទៅតាមការចង់បានរបស់សាឡូម៉ុង ប៉ុន្តែ មិនមែនសាឡូម៉ុងស្ថិតនៅក្រោមសម្ពាធរបស់ប្រទេសមិត្តថ្មីនោះទេ”។ នេះជាប្រសាសន៍របស់ប្រមុខរដ្ឋាភិបាលសាឡូម៉ុង។
នាយករដ្ឋមន្រ្តីរបស់កោះសាឡូម៉ុង បានទាត់ចោលការចុះផ្សាយរបស់កាសែតអូស្ត្រាលី ដែលថា ប្រទេសកូនកោះ នៅមហាសមុទ្រប៉ាស៊ីហ្វិកមួយនេះបានរងការដាក់សម្ពាធពីប្រទេសចិន។
តាមលោកនាយករដ្ឋមន្រ្តី Sogavare ដំណើរការចរចាកិច្ចព្រមព្រៀងសន្តិសុខចិន សាឡូម៉ុងបានបិទបញ្ចប់ ដោយគេនៅរង់ចាំតែការចុះហត្ថលេខាតែប៉ុណ្ណោះ។ ប្រមុខរដ្ឋាភិបាលកោះសាឡូម៉ុងមិនបានលម្អិតពីខ្លឹមសារនៃកិច្ចព្រមព្រៀងសន្តិសុខ ជាមួយចិន ប៉ុន្តែ តាមសេចក្តីព្រាង ដែលបានបែកលេចធ្លាយ និងចុះផ្សាយដោយកាសែតអូស្ត្រាលី កាលពីថ្ងៃព្រហស្បតិ៍សប្តាហ៍មុន កិច្ចព្រមព្រៀងស្តីពីសន្តិសុខ ចិន និង សាឡូម៉ុង នឹងអនុញ្ញាតឲ្យចិនបញ្ជូនកងទ័ព និងនាវាចម្បាំងទៅចតចូលកោះសាឡូម៉ុង។
សេចក្តីព្រាងនៃកិច្ចព្រមព្រៀងសន្តិសុខចិន និងសាឡូម៉ុង បានធ្វើឲ្យ អូស្ត្រាលី និងនូវែលសេឡង់ព្រួយបារម្ភខ្លាំងជាងគេ ក្នុងហេតុផលថា វត្តមានរបស់កងទ័ពចិននៅប្រទេសកោះ សាឡូម៉ុង ដែលស្ថិតនៅចម្ងាយពីអូស្ត្រាលីតែ ២០០០គីឡូម៉ែត្រនឹងជំរុញឲ្យកើតមានអស្ថិរភាពនៅក្នុងតំបន់ប៉ាស៊ីហ្វិក។
សេចក្តីព្រាងបានលម្អិតផងដែរពីការពង្រាយទ័ពចិន ដើម្បីទៅការពារសុវត្ថិភាពរបស់ជនជាតិ ចិន និងគម្រោងវិនិយោគរបស់ចិន នៅលើកោះសាឡូម៉ុង។ ចំណែកអាជ្ញាធរសាឡូម៉ុងវិញ គឺអាចស្នើសុំជំនួយជាប៉ូលិស ទាហានចិន សម្រាប់ស្តារសណ្តាប់ធ្នាប់ និងធានាសន្តិសុខនៅលើប្រទេសកូនកោះមួយនេះ។
នៅថ្ងៃអង្គារ នាយករដ្ឋមន្រ្តីសាឡូម៉ុងបានបញ្ជាក់ថា ទោះចុះកិច្ចព្រមព្រៀងសន្តិសុខជាមួយចិន ប៉ុន្តែ សាឡូម៉ុងនៅតែចាត់ទុក អូស្ត្រាលី និងនូវែលហ្សេឡង់ ជាដៃគូដ៏សំខាន់ ដែលសាឡូម៉ុងត្រូវការសុំជំនួយ សម្រាប់កាលៈទេសៈចាំបាច់ណាមួយ។
អូស្ត្រាលី ហ្វីជី នូវែលសេឡង់ធ្លាប់បានបញ្ជូនកងទ័ពពិសេសទៅសាឡូម៉ុង កាលពីខែវិច្ឆិកា ឆ្នាំមុន នៅពេលក្រុមកុប្បករចូលដុតសភា និងទាមទារឲ្យលោកនាយករដ្ឋមន្រ្តីចុះចេញពីតំណែង។
កុប្បកម្មនៅកោះសាឡូម៉ុង បានផ្ទុះឡើង មួយផ្នែក ដោយសារជម្លោះផលប្រយោជន៍រវាងមេដឹកនាំកូនកោះ ការគ្មានការងារធ្វើ ប៉ុន្តែវាកើតចេញមកពីរលកស្អប់វត្តមានចិននៅលើកោះសាឡូម៉ុង បន្ទាប់ពី នាយករដ្ឋមន្រ្តី Sogavare បានប្រកាសកាត់ផ្តាច់ទំនាក់ទំនងជាមួយ តៃវ៉ាន់ និងបែរងាកទៅចាប់ដៃជាមួយចិន នៅឆ្នាំ ២០១៩។ នៅក្នុងកុប្បកម្មរយៈពេល៣ថ្ងៃ នៅខែវិច្ឆិកា ក្រុមហ៊ុនចិនបានក្លាយផងដែរជាផ្ទាំងស៊ីបដុតបំផ្លាញរបស់ក្រុមបាតុករ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ