ប្អូនស្រីប្រធានាធិបតីកូរ៉េខាងជើង គំរាមថានឹងប្រើគ្រាប់បែកនុយក្លេអ៊ែរ
នាថ្ងៃសុក្រ រដ្ឋមន្ត្រីការបរទេសសហរដ្ឋអាមេរិក បានលើកឡើងពីការពួតដៃការពារសន្តិសុខសុវត្ថិភាពរួមគ្នាជាមួយនឹងសម្ព័ន្ធមិត្ត កូរ៉េខាងត្បូង និងជប៉ុន ដើម្បីទប់ទល់នឹងការគំរាមកំហែងពីសំណាក់រដ្ឋបាលក្រុងព្យុងយ៉ាង។ រដ្ឋបាលក្រុងព្យុងយ៉ាង ដែលពីថ្ងៃព្រហស្បតិ៍ បានធ្វើតេស្តសាកល្បងជាថ្មីទៀត នូវគ្រាប់មីស៊ីលអន្តរទ្វីបរយៈចម្ងាយឆ្ងាយ និងថាអាចមានសមត្ថភាពបាញ់ដល់ទឹកដីអាមេរិក។ ហើយចំណែក ប្អូនស្រីប្រធានាធិបតីកូរ៉េខាងជើង អ្នកស្រី គីម យូជុង ក៏បានគំរាមថានឹងប្រើគ្រាប់បែកនុយក្លេអ៊ែរ ប្រសិនបើអាមេរិកនៅតែចង់កម្ទេចរបបដឹកនាំកូរ៉េខាងជើង។
ចុះផ្សាយនៅថ្ងៃ៖
ស្តាប់ - ០២:៣៦
បើតាមដំណឹងពីកាសែតរដ្ឋកូរ៉េខាងជើង KCNA អ្នកស្រី គីម យូជុង ប្អូនស្រីប្រធានាធិបតីកូរ៉េខាងជើង គីម ជុងអ៊ុន បានគំរាមប្រកាសថា នឹងប្រើប្រាស់អាវុធនុយក្លេអ៊ែរ ដែលវានឹង«ផ្ទុះធំសម្បើម»«បំបែកផែនដី» ប្រសិនណាបើជា សហរដ្ឋអាមេរិក នៅតែបន្តប្រកាន់នយោបាយញុះញ៉ុង និងចិញ្ចឹមចេតនាចង់ផ្តួលរំលំកម្ទេចរបបដឹកនាំក្រុងព្យុងយ៉ាង។ ព្យុងយ៉ាង ថានឹងបាញ់គ្រាប់នុយក្លេអ៊ែរ ជាមុន ចាត់ទុកការការពារខ្លួន។
ការញុះញ៉ុងដែលថ្នាក់ដឹកនាំកូរ៉េខាងជើងចោទអាមេរិកនោះ ក៏ពីព្រោះតែ ក្នុងសប្តាហ៍នេះ យន្តហោះអាមេរិកជាច្រើនគ្រឿង បានហោះហើរលើដែនអាកាសរបស់ខ្លួន និងដែលត្រូវ កូរ៉េខាងជើង ចោទប្រកាន់អាមេរិកថាកំពុងស៊ើបយកការណ៍ ហើយព្យុងយ៉ាងក៏គំរាមបាញ់កម្ទេចយន្តហោះទាំងនោះ។
ហេតុដូច្នេះហើយ ទើបកាលពីថ្ងៃព្រហស្បតិ៍ រដ្ឋបាលក្រុងព្យុងយ៉ាងក៏បានធ្វើតេស្តសាកល្បងជាថ្មីទៀត នូវគ្រាប់មីស៊ីលអន្តរទ្វីបរយៈចម្ងាយឆ្ងាយ។ ការបាញ់មីស៊ីលមីស៊ីលនេះ ក្រោមការត្រួតពិនិត្យបញ្ជាផ្ទាល់ពីលោកប្រធានាធិបតី គីម ជុងអ៊ុន។ គ្រាប់មីស៊ីលអន្តរទ្វីបរយៈចម្ងាយឆ្ងាយ ដែលបាញ់ចេញថ្មីនេះ ប្រភេទឈ្មោះហ័សុង ១៨ (Hwasong 18 ) ហោះបានចម្ងាយ ១ ០០១ គីឡូម៉ែត្រ។ ថ្នាក់ដឹកនាំកូរ៉េខាងជើង អះអាងថា អាវុធរបស់ ខ្លួន បានសាកល្បងដោយជោគជ័យ និងអាចមានសមត្ថភាពបាញ់ដល់ទឹកដីអាមេរិក។
អ្នកជំនាញ ក៏យល់ឃើញ និងជឿជាក់ថាដូច្នេះមែន ដ្បិតថា គ្រាន់តែមីស៊ីលហ័សុង១៥ ដែលបាញ់កាលពីកុម្ភៈ វាអាចហោះបាន ៩៨៩ គីឡូម៉ែត្រទៅហើយ។ ពោលគឺ អាវុធរបស់កូរ៉េខាងជើងចេះតែអាចបាញ់ហោះបានកាន់តែឆ្ងាយទៅៗ។
ភ្លាមៗនៅថ្ងៃព្រហស្បតិ៍ នៅក្រុមប្រឹក្សាសន្តិសុខ នៃអង្គការសហប្រជាជាតិ ក៏បានបើកកិច្ចប្រជុំពីបញ្ហាកូរ៉េខាងជើងនេះដែរ ហើយ កូរ៉េខាងត្បូង ជាសមាជិកម្នាក់នៃកិច្ចប្រជុំផង កត់សម្គាល់ថា គ្រាន់តែឆ្នាំ២០២៣នេះ ក្រុងព្យុងយ៉ាងបាញ់សាកល្បងដល់ទៅ២០លើក។
អ្នកតំណាងក្រុងស៊េអូល បានទទូចថា មិនត្រូវឲ្យរដ្ឋបាលក្រុងព្យុងយ៉ាងចេះតែគំរាមកំហែងមិនឈប់មិនឈរដូច្នេះ ត្រូវរួចខ្លួន គ្មានត្រូវពិន័យនោះឡើយ។ ថ្ងៃព្រហស្បតិ៍ ដដែលនេះ នៅទីក្រុងហ្សាការតា ប្រមុខទូតអាមេរិក បានប្រជុំជាមួយ សមភាគីកូរ៉េខាងត្បូង និង ជប៉ុន អំពីបញ្ហាកូរ៉េខាងជើង ដោយរដ្ឋមន្ត្រីការបរទេសអាមេរិកប្តេជ្ញាការពារសម្ព័ន្ធមិត្តរបស់ខ្លួន ឲ្យរួចចេញពីការគំរាមរបស់របបក្រុងព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ