ព្យុងយ៉ាងគំរាមកម្ទេចយានស៊ើបការណ៍អាមេរិកដែលហោះចូលដែនអាកាសកូរ៉េខាងជើង
នៅថ្ងៃចន្ទនេះ កូរ៉េខាងជើងបានព្រមានកម្ទេចយន្តហោះស៊ើបការណ៍អាមេរិកណាដែលរំលោភដែនអាកាសរបស់ខ្លួន។ ជាងនេះទៀត របបព្យុងយ៉ាង បានប្រកាសថ្កោលទោសគម្រោងពង្រាយនាវាមុជទឹកនុយក្លេអ៊ែររបស់អាមេរិក នៅឧបទ្វីបកូរ៉េ។
ចុះផ្សាយនៅថ្ងៃ៖
ស្តាប់ - ០១:៥៦
បើតាមអ្នកនាំពាក្យក្រសួងការពារជាតិកូរ៉េខាងជើង សហរដ្ឋអាមេរិកបានបង្កើនសកម្មភាពចារកិច្ចហួសកំរិតសង្គ្រាមទៅទៀត។ តាំងពីចូលខែកក្កដាមក អាមេរិកបានបញ្ជូនយន្តហោះមកឈ្លបការណ៍ ក្នុងដែនអាកាសកូរ៉េខាងជើង លើផ្ទៃនៃសមុទ្ទជប៉ុន ដល់ទៅ៨ថ្ងៃជាប់ៗគ្នា។ នេះបើតាមសេចក្តីថ្លែងការណ៍ដដែលដែលបានព្រមានថាទង្វើបែបបង្កហេតុនេះ នឹងជំរុញឱ្យមានហានិភ័យធ្លាក់យន្តហោះឈ្លបការណ៍ក្នុងសមុទ្ទជប៉ុននាថ្ងៃណាមួយ។ អ្នកនាំពាក្យកូរ៉េខាងជើងបានលើកឡើងអំពីគ្រោះថ្នាក់ ដែលធ្លាប់កើតឡើងនៅលើកមុនៗ គឺកាលណោះ ព្យុងយ៉ាងបានបាញ់ទម្លាក់យន្តហោះឈ្លបការណ៍អាមេរិក។ ដូច្នេះសកម្មភាពចារកិច្ចលើកនេះ ក៏នឹងប្រាកដជាត្រូវទទួលរងផលវិបាកដោយជាក់ជាពុំខាន។
ក្រៅអំពីសេចក្តីថ្លែងការណ៍ព្រមាន កូរ៉េខាងជើងក៏បានឆ្លៀតថ្កោលទោសគម្រោងពង្រាយធនធានសព្វាវុធយុទ្ធសាស្ត្ររបស់សហរដ្ឋអាមេរិក នៅកូរ៉េខាងត្បូង ថាជាសកម្មភាពនុយក្លេអ៊ែរបែបលាក់លៀម ដើម្បីគាបកូរ៉េខាងជើង ដែលជាការនេះ នឹងគំរាមកំហែងដល់សន្តិសុខតំបន់និងពិភពលោកយ៉ាងខ្លាំង។
សូមបញ្ជាក់ថា ស្របតាមការព្រមព្រៀង ចុះហត្ថលេខាកាលពីខែមេសារវាងអាមេរិកនិងកូរ៉េខាងត្បូង វ៉ាស៊ីនតោនប្រកាសបញ្ជូននាវាមុជទឹកនុយក្លេអ៊ែរដែលមានសមត្ថភាពបាញ់មីស៊ីលបាលីស្ទិក នៅប្រចាំការ ជាលើកទីមួយ នៅកំពង់ផែប៊ូសាន ប្រទេសកូរ៉េខាងត្បូង។ ប៉ុន្តែមិនបានបញ្ជាក់អំពីកាលបរិច្ឆេទនៃបេសកកម្មនេះទេ។ នារយៈពេលប៉ុន្មានឆ្នាំចុងក្រោយមកនេះ ទំនាក់ទំនងកូរ៉េទាំងពីរបានធ្លាក់ចុះដុនដាបស្ទើរដល់បាត។ ប្រមុខដឹកនាំកូរ៉េខាងជើង លោក គីមជុងអ៊ុន បានប្រកាសអភិវឌ្ឍសព្វាវុធ និងនុយក្លេអ៊ែរតាកទិក ដោយមិនកែប្រែលក្ខន្តិកៈកូរ៉េខាងជើងជាប្រទេសនុយក្លេអ៊ែរឡើយ។ ជាចម្លើយតប សេអ៊ូលនិងវ៉ាស៊ីនតោន ក៏បានសន្យាប្រើនុយក្លេអ៊ែរសងវិញ និងបញ្ចប់ជីវិតរដ្ឋាភិបាលបច្ចុប្បន្ន បើព្យុងយ៉ាងហ៊ានប្រើអាវុធបរមាណូមែន។ នៅក្នុងឆ្នាំនេះ កូរ៉េខាងជើងបានបាញ់សាកល្បងមីស៊ីល មួយខ្សែ មានទាំងមីស៊ីលអន្តរទ្វីប ដ៏មានមហិទ្ធិរិទ្ធផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ