រុស្ស៊ីហៅកូរ៉េខាងជើងជារដ្ឋមិត្ត ដៃគូដ៏សំខាន់របស់រុស្ស៊ី
សង្រ្គាមរុស្ស៊ីឈ្លានពានអ៊ុយក្រែន និងភាពតានតឹងអាមេរិក កូរ៉េខាងជើងបានរុញច្រានសម្ព័ន្ធមិត្តទាំងពីរ រុស្ស៊ី កូរ៉េខាងជើងឲ្យខិតចូលកៀកកិត ជិតគ្នាជាងពេលណាៗទាំងអស់។ នៅក្នុងដំណើរទៅកាន់ទីក្រុងព្យុងយ៉ាង កាលពីថ្ងៃ ពុធ ដើម្បីចូលរួមក្នុងពិធីបុណ្យប្រារព្ធខួប៧០ឆ្នាំការបិទបញ្ចប់សង្រ្គាមកូរ៉េ ដែលត្រូវប្រព្រឹត្តទៅនៅថ្ងៃព្រហស្បតិ៍នេះ រដ្ឋមន្រ្តីការពារជាតិរុស្ស៊ី លោកស៊ែរហ្គី ឆយហ្គូបានថ្លែងចាត់ទុកកូរ៉េខាងជើង ជារដ្ឋមិត្ត និងដៃគូដ៏សំខាន់របស់រុស្ស៊ី។
ចុះផ្សាយនៅថ្ងៃ៖
ស្តាប់ - ០៣:១៩
កូរ៉េខាងជើងក្រាលកម្រាលព្រំក្រហមទទួលរដ្ឋមន្រ្តីការពារជាតិរបស់រុស្ស៊ី ដែលត្រូវចូលរួមជាភ្ញៀវកិត្តិយស នៅក្នុងពិធីបុណ្យប្រារព្ធខួប ៧០ឆ្នាំនៃការបិទបញ្ចប់សង្រ្គាមកូរ៉េ ថ្ងៃទី ២៧ កក្កដា ឆ្នាំ ១៩៥៣ ដែលកូរ៉េខាងជើងចាត់ទុកជាថ្ងៃជ័យជំនះលើសត្រូវ។
នៅក្នុងសេចក្តីថ្លែងការណ៍របស់ក្រសួងការពារជាតិរុស្ស៊ី ដែលចុះផ្សាយដោយទីភ្នាក់ងារព័ត៌មានបារាំង AFP ប្រមុខការពារជាតិរុស្ស៊ីបាននិយាយប្រាប់សមភាគីកូរ៉េខាងជើងថា កូរ៉េខាងជើងជាដៃគូដ៏សំខាន់ ដែលមានព្រំដែនជាប់រុស្ស៊ី និងមានប្រវត្តិសហការគ្នា តាំងពីយូរលង់។ លោកស៊ែរហ្គី ឆយហ្គូ នៅបានថ្លែងបន្ថែមថា រុស្ស៊ីចង់ពង្រឹងសហប្រតិបត្តិការយោធា រវាងប្រទេសទាំងពីរ។ រុស្ស៊ីស្ថិតក្នុងចំណោមប្រទេសដ៏កម្រដែលនៅបន្តរក្សាទំនាក់ទំនង និងបោះឆ្នោតប្រឆាំងនៅ ក្រុមប្រឹក្សាសន្តិសុខ ដើម្បីការពារកូរ៉េខាងជើង ពីការដាក់ទណ្ឌកម្មថ្មីបន្ថែមរបស់សហគមន៍អន្តរជាតិ ក្នុងរឿងអភិវឌ្ឍកម្មវិធីនុយក្លេអ៊ែរយោធា។
ជាការឆ្លើយតប កូរ៉េខាងជើងបានបោះឆ្នោតប្រឆាំង នឹងសេចក្តីសម្រេចរបស់អង្គការសហប្រជាជាតិ ដែលថ្កោលទោស សង្រ្គាមរុស្ស៊ីឈ្លានពានអ៊ុយក្រែន។ តាមការចុះផ្សាយរបស់ ទីភ្នាក់ងារព័ត៌មានរដ្ឋកូរ៉េខាងជើងKCNA កូរ៉េខាងជើងគាំទ្រទាំងស្រុងកងទ័ព និងប្រជាជនរុស្ស៊ី ក្នុងការតស៊ូប្រយុទ្ធដើម្បីការពារដែនអធិបតេយ្យភាព ការអភិវឌ្ឍ និងផលប្រយោជន៍របស់រុស្ស៊ី។
ជាមួយស៊ីរី កាលពីខែកក្កដា ឆ្នាំមុន កូរ៉េខាងជើងបានប្រកាសទទួលស្គាល់ការកាត់តំបន់ចំនួន៤ នៅភាគខាងកើតអ៊ុយក្រែន ដើម្បីដាក់បញ្ចូលក្នុងទឹកដីរុស្ស៊ី។ ទីភ្នាក់ងារស៊ើបការណ៍សម្ងាត់អាមេរិកធ្លាប់អះអាងថា កូរ៉េខាងជើងនៅបាននាំចេញអាវុធទៅឲ្យរុស្ស៊ីធ្វើសង្រ្គាមនៅអ៊ុយក្រែន។ ទាំងរុស្ស៊ី និងកូរ៉េខាងជើងបានបដិសេធ និងចាត់ទុកព័ត៌មានរបស់ចារកិច្ចអាមេរិកថា ធ្វើឡើងដើម្បីបំផ្លាញរូបភាពកូរ៉េខាងជើង។
តាមចារកិច្ចអាមេរិក ដោយសារទណ្ឌកម្ម និងការរឹតបន្តឹងលើការនាំចេញ ពីសំណាក់ប្រទេសលោកខាងលិច រុស្ស៊ីដែលកាន់តែខើចសព្វាវុធ ដោយសារសង្រ្គាមអ៊ុយក្រែន បានបញ្ជាទិញអាវុធពីអ៊ីរ៉ង់ ជាពិសេស ដ្រូន។ ប៉ុន្តែ ដោយសារដ្រូនអ៊ីរ៉ង់ឧស្សាហ៍មានបញ្ហាបច្ចេកទេស រុស្ស៊ីបានងាកទៅរកកូរ៉េខាងជើង ដែលអាចផ្គត់ផ្គង់អាវុធធុនតូច កាំភ្លើងធំ និងគ្រាប់បែកជាដើម។
អ្នកជំនាញជឿថា ភាពតានតឹងរវាងចិន និងអាមេរិក ហើយនិងសង្រ្គាមរុស្ស៊ីឈ្លានពានអ៊ុយក្រែន បានបើកឱកាសឲ្យកូរ៉េខាងជើងអភិវឌ្ឍ ផលិតសព្វាវុធ កាន់តែទំនើបៗ។ នៅសប្តាហ៍មុននេះ អ្នកជំនាញអង្គការសហប្រជាជាតិបានចេញរបាយការណ៍ដែលថា ចិនដែលជាសម្ព័ន្ធមិត្តរបស់កូរ៉េខាងជើងបានជួយកូរ៉េខាងជើងឲ្យគេចរួចខ្លួនពីការដាក់ទណ្ឌកម្មអន្តរជាតិ តាមរយៈអនុញ្ញាតឲ្យកប៉ាល់កូរ៉េខាងជើង ចូលទៅដឹកប្រេងចេញពីកំពង់ផែ Sanshaរបស់ចិន។ តើនោះជាប្រេងដែលរុស្ស៊ីអាចបញ្ជូនទៅឲ្យព្យុងយ៉ាង តាមរយៈចិន? ចង់ឬមិនចង់ កូរ៉េខាងជើងដែលជាប់ទណ្ឌកម្មអន្តរជាតិ ត្រូវការចាំបាច់ ថាមពលប្រេងសម្រាប់ផលិតសព្វាវុធ។ សព្វាវុធទំនើបៗ ដែលមេដឹកនាំកូរ៉េខាងជើងអាចតាំងបង្ហាញនៅក្នុងក្បួនព្យុហយាត្រា នៅថ្ងៃប្រារព្ធខួប៧០ឆ្នាំនៃការបិទបញ្ចប់សង្រ្គាមកូរ៉េ នៅថ្ងៃព្រហស្បតិ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ