ចិនប្រកាសជំហរអព្យាក្រិត្យ ក្នុងជំនួបស្តីពីអ៊ុយក្រែន នៅអារ៉ាប៊ីសាអូឌីត
ជំនួបស្តីពីអ៊ុយក្រែននៅអារ៉ាប៊ីសាអូឌីតបានបិទបញ្ចប់ ប្រតិកម្មបានធ្លាក់មកជាបន្តបន្ទាប់។ អ៊ុយក្រែនរីករាយនិងចាត់ទុកជំនួបប្រជុំរៀបចំដោយអារ៉ាប៊ីសាអូឌីតថាជាការវាយថ្បកលើរុស្ស៊ី។ នៅល្ងាចថ្ងៃចន្ទម្សិលមិញ ចិនបានចេញថ្លែងការណ៍សរសើរកិច្ចប្រជុំ និងបញ្ជាក់ជំហរអព្យាក្រិត្យរបស់ខ្លួនក្នុងវិបត្តិអ៊ុយក្រែន។ ជំហរដែលអាមេរិកបានអបអរ និងចាត់ទុកជាជំហានថ្មីដ៏ល្អប្រសើរ។
ចុះផ្សាយនៅថ្ងៃ៖
ស្តាប់ - ០២:៣១
ប្រទេសជាង៤០ មានជាអាទិ៍សហរដ្ឋអាមេរិក ចិន ឥណ្ឌា ព្រមទាំងអឺរ៉ុប បានចូលរួមក្នុងកិច្ចប្រជុំស្តីពីអ៊ុយក្រែនដែលរៀបចំឡើងដោយអារ៉ាប៊ីសាអូឌីត កាលពីថ្ងៃសៅរ៍និងអាទិត្យកន្លងទៅ។ សម្រាប់ក្រុងកៀវ នេះជាជំនួបដែលឈានឆ្ពោះទៅរកការសម្រុះសម្រួលអន្តរជាតិលើគោលការណ៍គ្រឹះនៃកិច្ចព្រមព្រៀងសន្តិភាព។ ចំណែករុស្ស៊ីដែលគ្មានវត្តមានក្នុងជំនួបយល់ថាជាបរាជ័យសម្រាប់អ៊ុយក្រែនក្នុងការប៉ុនប៉ងប្រមូលផ្តុំក្រុមប្រទេសកំពុងមានសេដ្ឋកិច្ចលូតលាស់ខ្លាំងឱ្យមកគាំទ្រ។
ក្រោយប្រតិកម្មរបស់ភាគីជម្លោះទាំងពីរ ចិន បានចេញសេចក្តីថ្លែងការណ៍បញ្ជាក់ថាប៉េកាំងមានជំហរសមហេតុផលនិងស្មើភាពជានិច្ចក្នុងរាល់គ្រប់កិច្ចពិភាក្សាពហុភាគី។ សេចក្តីថ្លែងការណ៍ដដែលបានអះអាងទៀតថា នៅក្នុងជំនួបតាមទូរស័ព្ទកាលពីថ្ងៃចន្ទទី ៧សីហា លោកប្រមុខការទូតចិន បានប្រកាសប្រាប់សមភាគីរុស្ស៊ី លោក សែកហ្គៃ ឡាវ្រូស ថាចិនរក្សាជំហរឯករាជ្យ និងអព្យាក្រិត្យជានិច្ច ក្នុងវិបត្តិអ៊ុយក្រែន។
លោក វ៉ាង យី បានប្រកាសនៅក្នុងសេចក្តីថ្លែងការណ៍មួយទៀត ដែលចេញផ្សាយដាច់ដោយឡែក ថាកិច្ចពិភាក្សានៅក្រុងចេដះ ជាចំណែកមួយនៃការពង្រឹងភាពស្រុះស្រួលអន្តរជាតិ។
សម្រាប់អ្នកវិភាគ វត្តមានរបស់ចិនក្នុងជំនួបរៀបចំដោយអារ៉ាប៊ីសាអូឌីត អាចសឱ្យឃើញអំពីជំហរប្រែប្រួលរបស់ប៉េកាំងក្នុងវិបត្តិអ៊ុយក្រែន ប៉ុន្តែមិនមែនជាការប្តូរផ្លាស់ជំហរបត់ងាកចេញពីរុស្ស៊ីឡើយ។ ប៉ុន្តែទោះជាយ៉ាងណាក៏ដោយ ក៏សហរដ្ឋអាមេរិកស្វាគមន៍ជានិច្ច និងយល់ថាវត្តមានចិនក្នុងជំនួបចេដះមានលក្ខណៈស្ថាបនាខ្លាំងណាស់។ អ្នកនាំពាក្យក្រសួងការបរទេសអាមេរិក លោក Matthew Miller បានបន្ថែមទៀតថា អាមេរិកគិតតាំងពីយូរអំពីតួនាទីដ៏សំខាន់របស់ចិនក្នុងការបិទបញ្ចប់សង្គ្រាមនៅអ៊ុយក្រែន ប្រសិនបើចិនព្រមទទួលយកភារៈនេះដោយគោរពបូរណភាពនិងអធិបតេយ្យភាពអ៊ុយក្រែនទាំងស្រុង។
នៅអារ៉ាប៊ីសាអូឌីត អ្នកទទួលខុសត្រូវជាន់ខ្ពស់អាមេរិក គឺលោកទីប្រឹក្សាសន្តិសុខសេតវិមាន Jake Sullivan និងអនុរដ្ឋមន្ត្រីក្រសួងការបរទេសស្តីទី Victoria Nuland បានឆ្លៀតជួបពិភាក្សាដាច់ដោយឡែកជាមួយនឹងប្រេសិតចិនទទួលបន្ទុកកិច្ចការអ៊ុយក្រែនលោក លី ហ៊ុយ។ ចិនគាំទ្រនយោបាយការទូតរុស្ស៊ី និងមិនថ្កោលទោសទង្វើឈ្លានពានរុស្ស៊ីលើអ៊ុយក្រែនទេ តែបានបង្កើនកិច្ចខំប្រឹងប្រែងការទូតខ្លាំងជាមួយអ៊ុយក្រែន និងមានមហិច្ឆតាធ្វើអន្តរការីរកដំណោះស្រាយវិបត្តិអ៊ុយក្រែនតាមផ្លូវនយោបាយផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ