ហ្វូគូស្ហ៊ីម៉ា៖ ជប៉ុនបរិហារទង្វើបំពារបំពានចិនថាគួរឱ្យសោកស្តាយ
តូក្យូបានបញ្ចេញប្រតិកម្មជាថ្មីម្តងទៀត នៅថ្ងៃអង្គារទី ២៩សីហា២៣នេះ ចំពោះសកម្មភាពចិនប្រឆាំងនឹងជប៉ុន ដោយបរិហារថាជាទង្វើបំពារបំពានគួរឱ្យសោកស្តាយ។ តាំងពីជប៉ុនចាប់បង្ហូរកាកសំណល់នៅមជ្ឈមណ្ឌលនុយក្លេអ៊ែរហ្វូគូស្ហ៊ីម៉ាទៅក្នុងសមុទ្ទមក ប្រជាពលរដ្ឋចិនបាននាំគ្នាតវ៉ានិងឈានដល់គប់ដុំថ្មលើស្ថានទូតជប៉ុនប្រចាំទីក្រុងប៉េកាំងទៀត។
ចុះផ្សាយនៅថ្ងៃ៖
ស្តាប់ - ០២:៤៩
ទង្វើបំពារបំពានចិន ដែលមានជាអាទិ៍ការទូរស័ព្ទទៅរំខានក្រុមហ៊ុនសហគ្រាសជប៉ុននានា និងគប់ដុំថ្មទៅលើសាលារៀនជប៉ុននៅប្រទេសចិន ជាទង្វើគួរឱ្យព្រួយបារម្ភនិងគួរឱ្យសោកស្តាយខ្លាំងណាស់។ នេះបើតាមប្រសាសន៍របស់លោករដ្ឋមន្ត្រីការបរទេសជប៉ុនយូស្ហ៊ីម៉ាសា ហាយ៉ាស្ហ៊ី ដោយបានបញ្ជាក់អំពីដំណឹងដែលថាមានពលរដ្ឋចិនបានយកដុំឥដ្ឋទៅគប់លើស្ថានទូតជប៉ុនប្រចាំទីក្រុងប៉េកាំង ជាព័ត៌មានពិត។
រហូតមកទល់ពេលនេះ ពុំទាន់មានទេបាតុកម្មនិងអំពើហិង្សាប្រឆាំងជប៉ុន គឺមានតែមនុស្សពីរបីម្នាក់ប៉ុណ្ណោះ ដែលមកធ្វើសកម្មភាពនៅមុខស្ថានទូត និងត្រូវបានកងកម្លាំងរក្សាសុវត្ថិភាពចិនចាប់ខ្លួនហើយ។
លោករដ្ឋមន្ត្រីបានជំរុញឱ្យរដ្ឋាភិបាលចិនចាត់វិធានការសមស្របភ្លាម ដូចជាអំពាវនាវឱ្យប្រជាពលរដ្ឋចិនបញ្ចេញសកម្មភាពដោយស្ងប់ស្ងាត់ ដើម្បីកុំឱ្យស្ថានភាពធ្លាក់ធ្ងន់ធ្ងរជាងនេះ និងប្រើគ្រប់លទ្ធភាពធានាការពារសុវត្ថិភាពរបស់ពលរដ្ឋជប៉ុននៅចិន។ ជប៉ុនបានថែមទាំងកោះហៅឯកអគ្គរដ្ឋទូតចិនប្រចាំទីក្រុងតូក្យូ ដើម្បីសម្តែងការប្រឆាំងនឹងទង្វើបៀតបៀនរបស់ចិននេះរួចហើយកាលពីថ្ងៃចន្ទ។ ជាងនេះទៅទៀត លោក យូស្ហ៊ីម៉ាសា ហាយ៉ាស្ហ៊ី បានទទូចឱ្យប៉េកាំងផ្តល់ព័ត៌មានពិតស្តីពីគុណភាពទឹកដែលជប៉ុនបង្ហូរចេញពីមជ្ឈមណ្ឌលនុយក្លេអ៊ែរហ្វូគូស្ហ៊ីម៉ាទៅក្នុងសមុទ្ទ តាំងពីថ្ងៃព្រហស្បតិ៍មុនមក ប្រសើរជាងញុះញង់ឱ្យប្រជាពលរដ្ឋព្រួយបារម្ភឥតប្រយោជន៍ តាមរយៈការផ្តល់ព័ត៌មានគ្មានមូលដ្ឋានបែបវិទ្យាសាស្ត្រ។
ជាប្រតិកម្មតប អ្នកនាំពាក្យក្រសួងការបរទេសចិន បានប្រកាសកាលពីថ្ងៃចន្ទថា ចិនការពារសន្តិសុខ សិទ្ធិនិងផលប្រយោជន៍ស្របច្បាប់របស់បរទេសនៅលើទឹកដីចិន ដូចមានចែងក្នុងច្បាប់ជានិច្ច។ ប៉ុន្តែចិនសុំឱ្យជប៉ុនឆ្លើយតបទៅនឹងក្តីព្រួយបារម្ភដ៏ត្រឹមត្រូវរបស់គ្រប់ភាគី ហើយបញ្ឈប់ការបង្ហូរទឹកមានជាតិវិទ្យុសកម្មនុយក្លេអ៊ែរទៅក្នុងសមុទ្ទ និងគ្រប់គ្រងទឹកមានសារធាតុពុលប្រកបដោយទំនួលខុសត្រូវ។ ចិនបានប្រកាសព្យួរការនាំចូលផលិតផលគ្រឿងសមុទ្ទមកពីជប៉ុន តាំងពីជប៉ុនចាប់បង្ហូរទឹកនៅមជ្ឈមណ្ឌលហ្វូគូស្ហ៊ីម៉ាទៅក្នុងសមុទ្ទមក។
តូក្យូបានធានាថាទឹកបង្ហូរទៅសមុទ្ទនោះគ្មានគ្រោះថ្នាក់ដល់បរិស្ថាននិងសុខភាពមនុស្សទេ។ ភ្នាក់ងារថាមពលបរមាណូអន្តរជាតិ ក៏អនុញ្ញាតឱ្យបង្ហូរចេញទៅសមុទ្ទដែរ។ មុននឹងបង្ហូរចេញ ក្រុមហ៊ុនបានសម្អាតជាតិពុលក្នុងទឹកនោះ នៅសល់តែជាតិTritium ដែលបន្ទាប់ពីលាយជាមួយទឹកសមុទ្ទ មានកំរិតសារធាតុវិទ្យុសកម្ម ក្រោមបទដ្ឋានសុវត្ថិភាពជប៉ុនដល់ទៅ៤០ដង។ លទ្ធផលនៃការវិភាគទឹកសមុទ្ទក្រោយការបង្ហូរបានបញ្ជាក់ថាអាជ្ញាធរជប៉ុននិងក្រុមហ៊ុនតិបកូ ព្រមទាំងAIEA សុទ្ធតែបង្ហាញថាសារធាតុវិទ្យុសកម្មក្នុងទឹកទាបជាងកំរិតអតិបរមាកំណត់ក្នុងបទដ្ឋានសុវត្ថិភាព១៥០០Bg/Lមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ