លីប៊ី៖គូភាគីជម្លោះផ្ទៃក្នុងត្រៀមខ្លួនដើម្បីប្តូរពីបទឈប់បាញ់បណ្តោះអាសន្នទៅជាបទឈប់បាញ់យូរអង្វែង
នៅថ្ងៃអង្គារ ទី៤ កុម្ភៈ លោកហ្កាសាន សាឡាម៉េ ប្រេសិតអង្គការសហប្រជាជាតិទទួលបន្ទុកវិបត្តិប្រទេសលីប៊ីបានប្រកាសក្នុងទីក្រុងហ្សឺណែវ ប្រទេសស្វ៊ីសថា គូភាគីជម្លោះផ្ទៃក្នុងនៅលីប៊ីបានព្រមព្រៀងគ្នាជាគោលការណ៍ពីការប្តូរបទឈប់បាញ់បណ្តោះអាសន្នទៅជាបទឈប់បាញ់យូរអ្វែង។ ការព្រមព្រៀងគ្នាជាគោលការណ៍នេះបានធ្វើឡើងនៅក្នុងកិច្ចប្រជុំលើកទី១ តាំងពីថ្ងៃទី៣ កុម្ភៈរបស់គណៈកម្មការយោធា ៥បូក៥ របស់ភាគីជម្លោះលីប៊ី។ គណៈកម្មការយោធា ៥បូក៥ ចូលរួមដោយអ្នកតំណាង ៥នាក់មកពីរដ្ឋាភិបាលសហភាពជាតិលីប៊ីនៅទីក្រុងទ្រីប៉ូលីដែលទទួលស្គាល់ដោយអង្គការសហប្រជាជាតិ និងអ្នកតំណាង ៥នាក់មកពីសេនាប្រមុខខាលីហ្វា ហាវតារដែលកំពុងគ្រប់គ្រងតំបន់ប៉ែកខាងកើត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
តាំងពីជាង ៣សប្តាហ៍ដែលកិច្ចព្រមព្រៀងឈប់បាញ់បណ្តោះអាសន្នរវាងភាគីជម្លោះផ្ទៃក្នុងលីប៊ីទាំងពីរបានចូលជាធរមាន។ តែអ្វីដែលគណៈកម្មការយោធា ៥បូក៥ របស់ភាគីជម្លោះលីប៊ីទាំងពីរបានព្រមព្រៀងជាគោលការណ៍ពេលនេះ គឺប្រែក្លាយបទឈប់បាញ់បណ្តោះអាសន្នទៅជាបទឈប់បាញ់យូរអង្វែង។ បើតាមលោកហ្កាសាន សាឡាម៉េដែលជាប្រេសិតអង្គការសហប្រជាជាតិទទួលបន្ទុកវិបត្តិលីប៊ី នៅមានរបៀបវារៈជាច្រើនទៀតដែលភាគីជម្លោះទាំងពីរត្រូវបន្តជជែកគ្នា។ តាមពិតទៅ គណៈកម្មការយោធា ៥បូក៥ គ្រោងបើកកិច្ចប្រជុំតាំងពីសប្តាហ៍កន្លងទៅម្ល៉េះ តែត្រូវបានលើកពេលដោយសារខ្វះអ្នកចូលរួមពីភាគីសេនាប្រមុខខាលីហ្វា ហាវតារ។
គឺទើបក្នុងថ្ងៃទី៣ កុម្ភៈដែលកិច្ចប្រជុំបានចាប់ផ្តើម ២ថ្ងៃក្រោយពីភាគីជម្លោះនីមួយៗបានជួបសន្ទនាដាច់ដោយឡែកជាមួយលោកហ្កាសាន សាឡាម៉េក្បែរទីក្រុងបេនហ្កាហ្ស៊ី។ ក្រៅពីជំនួបរវាងភាគីជម្លោះផ្ទៃក្នុង វិបត្តិលីប៊ីក៏ជាប្រធានបទនៃជំនួបអន្តរជាតិច្រើនដងនារយៈពេលប៉ុន្មានសប្តាហ៍កន្លងទៅ។ តែជាថ្មីម្តងទៀត ប្រេសិតអង្គការសហប្រជាជាតិទទួលបន្ទុកវិបត្តិលីប៊ីបានបរិហារការរំលោភបំពានលើកិច្ចសន្យាដែលបានអនុម័តនៅក្នុងសន្និសីទអន្តរជាតិរៀបចំក្នុងទីក្រុងប៊ែរឡាំង ប្រទេសអាល្លឺម៉ង់កាលពីថ្ងៃទី១៩ មករា។
តាមលោកហ្កាសាន សាឡាម៉េ ទាហានស៊ីឈ្នួល និងសម្ភារៈយោធាបានបន្តហូរចូលលីប៊ីសម្រាប់ភាគីជម្លោះផ្ទៃក្នុងទាំងពីរ។ « យើងមានភស្តុតាងដែលបង្ហាញថា ភាគីជម្លោះផ្ទៃក្នុងនីមួយៗទទួលអាវុធ និងទាហានស៊ីឈ្នួល។ ខ្ញុំសង្ឃឹមថា អ្នកដែលបាននាំអាវុធចូលលីប៊ីគួរដឹងថា មានអាវុធជាង ២០លានដើមកំពុងធ្វើចរាចរណ៍នៅលីប៊ី ហើយប្រទេសនេះមិនត្រូវការអាវុធបន្ថែមទេ » នេះជាការថ្លែងរបស់លោកសាឡាម៉េ។ ទោះបីជាលោកសាឡាម៉េមិនបានចង្អុលមុខប្រទេសណាមួយក៏ដោយក៏គេដឹងថា តួកគីបានជាប់សង្ស័យពីបទបញ្ជូនទាហានស៊ីឈ្នួលជនជាតិស៊ីរីទៅគាំទ្រកម្លាំងរដ្ឋាភិបាលសហភាពជាតិលីប៊ី ហើយរុស្ស៊ីបានបញ្ជូនអាវុធទៅឲ្យសេនាប្រមុខខាលីហ្វា ហាវតារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ