អង្គការសហប្រជាជាតិរិះគន់ប្រទេសដែលរំលោភបម្រាមស្តីពីការលក់បញ្ជូនអាវុធទៅ លីប៊ី
នៅលីប៊ី ជាទីដែលកំពុងកើតមានសង្រ្គាមហែកហួរ ដណ្តើមអំណាចគ្នារវាងរដ្ឋាភិបាលខាងលិច និងរដ្ឋាភិបាលខាងកើត ការរំលោភបម្រាមរបស់អង្គការសហប្រជាជាតិ ស្តីពីការបញ្ជូន លក់អាវុធ នៅតែបន្តកើតមាន។ នៅក្នុងសេចក្តីថ្លែងការណ៍ កាលពីថ្ងៃអាទិត្យ បេសកកម្មរបស់អង្គការសហប្រជាជាតិ នៅលីប៊ី បានបរិហាររិះគន់ក្រុមប្រទេស ដែលនៅតែបន្តបញ្ជូនអាវុធ ទៅចិញ្ចឹមសង្រ្គាមលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
សម្រាប់បេសកកម្មអង្គការសហប្រជាជាតិ នៅលីប៊ី បទឈប់បាញ់ រវាងភាគីជម្លោះលីប៊ី ដែលកំពុងតែផុយស្រួយ ទៅហើយនោះ កំពុងគំរាមកំហែង ដោយសារតែការបន្តដឹកជញ្ជូន អាវុធ ទៅកាន់ទឹកដីលីប៊ី។
នៅក្នុងសេចក្តីថ្លែងការណ៍ កាលពីថ្ងៃអាទិត្យ បេសកកម្មអង្គការសហប្រជាជាតិ ដែលប្រចាំការនៅលីប៊ី រិះគន់ ប្រទេសមួយចំនួន ដែលបានរំលោភ សេចក្តីសម្រេចរបស់ក្រុមប្រឹក្សាសន្តិសុខ ស្តីពីការហាមលក់សព្វាវុធ ទៅឲ្យលីប៊ី។ តាមបេសកកម្មរបស់អង្គការសហប្រជាជាតិ ក្រុមប្រទេសមួយចំនួន ដែលចូលរួមក្នុងសន្និសីទអន្តរជាតិស្តីពីលីប៊ី នៅទីក្រុងប៊ែរឡាំង ធ្លាប់សន្យាមិនលូកដៃ ចូលជម្លោះផ្ទៃក្នុងលីប៊ី ប៉ុន្តែ នៅលើទីតាំងជាក់ស្តែង ក្រុមប្រទេសទាំងនោះ នៅតែបន្ត ដឹកជញ្ជូន អាវុធ បញ្ជូន ទាហាន និងទីប្រឹក្សា យោធា របស់ខ្លួនឲ្យទៅជួយភាគីជម្លោះ ដែលខ្លួនគាំទ្រ នៅលីប៊ី។ ប្រភពដដែលបានលើកឡើងថា ក្នុងរយៈពេល ១០ថ្ងៃចុងក្រោយនេះ គេឃើញ មានយន្តហោះ ជាច្រើនគ្រឿង ចុះចតនៅព្រលានយន្តហោះ នៅភាគខាងកើត និងភាគខាងលិច លីប៊ី ដើម្បីដឹកជញ្ជូន សព្វាវុធធុនទំនើបចុងក្រោយ រថពាសដែក ហើយនិងទាហានទៅឲ្យភាគី ជម្លោះទាំង២ នៅលីប៊ី។
នៅក្នុងសេចក្តីថ្លែងការណ៍របស់ខ្លួន បេសកកម្មរបស់អង្គការសហប្រជាជាតិមិនបាននិយាយចំៗ ឈ្មោះប្រទេសដែលបានរំលោភបម្រាមលក់អាវុធ ទៅឲ្យលីប៊ីទេ។
នៅក្នុងសន្និសីទអន្តរជាតិស្តីពីលីប៊ី ដែលរៀបចំនៅទីក្រុងប៊ែរឡាំង កាលពីថ្ងៃទី ១៩មករា កន្លងទៅ ក្រុមប្រទេសមួយចំនួន ដូចជា រុស្ស៊ី អេហ្ស៊ីប អេមីរ៉ាត អារ៉ាប់រួម និងតួកគី ដែលគាំទ្រ រដ្ឋាភិបាលពីរផ្សេងគ្នា ធ្លាប់បានសន្យា មិនលូកដៃក្នុងជម្លោះលីប៊ី ដែលមានចាប់តាំងពី ការផ្តល់ហិរញ្ញវត្ថុ ដើម្បីពង្រឹងសមត្ថភាពយោធា ឬ ការរើសបញ្ជូនទាហានស៊ីឈ្នួល ឲ្យទៅជួយប្រយុទ្ធក្នុងជួររដ្ឋាភិបាលក្រុងទ្រីប៉ូលី។
សម្រាប់បេសកកម្មអង្គការសហប្រជាជាតិ ប្រចាំលីប៊ី ការរំលោភបម្រាមលក់អាវុធ របស់ក្រុមប្រឹក្សាសន្តិសុខអង្គការសហប្រជាជាតិ នឹងអាចគំរាមកំហែង ធ្វើឲ្យលីប៊ី ធ្លាក់ចូលសាជាថ្មី ទៅក្នុងការប្រយុទ្ធ សម្លាប់បង្ហូរឈាមគ្នា។ លីប៊ី ដែលទើបស្ងប់ស្ងាត់ មួយគ្រា ដោយសារបទឈប់បាញ់ កាលពីថ្ងៃទី ១២មករា ដែលស្នើឡើងដោយរុស្ស៊ី និងតួកគី ប្រទេសធំពីរ ដែលស្ថិតនៅពីក្រោយ គូបដិបក្ខ សំខាន់ទាំងពីរ នៅលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ