កូវីដ ១៩៖ ស្ថាប័នហិរញ្ញវត្ថុអន្តរជាតិអំពាវនាវសុំជំនួយបន្ទាន់សម្រាប់ជួយសេដ្ឋកិច្ច អាហ្វ្រិក
មូលនិធិរូបិយវត្ថុអន្តរជាតិ ធនាគារកណ្តាលពិភពលោក រួមជាមួយមេដឹកនាំអាហ្រ្វិក បានវាយតម្លៃថា ទោះបីជាមានការសន្យាផ្តល់ជំនួយក្រុមម្ចាស់បំណុល ទ្វីបអាហ្វ្រិកនៅតែត្រូវការជំនួយ ចាំបាច់ ជាច្រើនពាន់លានដុល្លារទៀត ដើម្បីប្រយុទ្ធប្រឆាំងនឹងជំងឺរាតត្បាតកូវីដ១៩។ គិតរហូតមកដល់ថ្ងៃសុក្រ ទ្វីបអាហ្វ្រិកទាំងមូលមានឆ្លងកូរ៉ូណាវីរុស ជិត ២ម៉ឺននាក់ និងមនុស្សស្លាប់ជាង១ពាន់នាក់។ ការឆ្លងរាតត្បាតកូវីដ១៩ នៅមិនទាន់ខ្លាំង ប៉ុន្តែ តាមការព្រមានរបស់អង្គការសុខភាពពិភពលោក ទ្វីបអាហ្វ្រិកនឹងអាចក្លាយជាកន្លែងឆ្លងរាតត្បាតខ្លាំង បន្ទាប់ពី អាមេរិក ដោយសារតែប្រព័ន្ធសុខាភិបាលដ៏ខ្សត់ខ្សោយ នៅក្នុងបណ្តាប្រទេសអាហ្វ្រិក។
ចុះផ្សាយនៅថ្ងៃ៖
ស្តាប់ - ០២:០៨
អាហ្វ្រិកដែលខ្វះខាតធនធាន និងហេដ្ឋារចនាសម្ព័ន្ធសុខាភិបាល ដើម្បីប្រយុទ្ធប្រឆាំងនឹងវិបត្តិកូវីដ ១៩ ត្រូវការថវិកាបន្ទាន់ ប្រមាណ ១១៤ពាន់លានដុល្លារ។ នេះបើតាមការអះអាងរបស់អគ្គនាយិកាមូលនិធិរូបិយវត្ថុអន្តរជាតិ IMF នៅក្នុងសេចក្តីថ្លែងការណ៍រួមជាមួយ ធនាគារពិភពលោក។
នៅក្នុងកិច្ចប្រជុំតាមវីដេអូ ជាមួយថ្នាក់ដឹកនាំ អាហ្វ្រិក និងធនាគារពិភពលោក កាលពីថ្ងៃសុក្រម្សិលមិញ មូលនិធិរូបិយវត្ថុបានចូលរួមវិភាគទានជាមួយ ធនគារពិភពលោក សម្រាប់កញ្ចប់ថវិកា ៥៧ពាន់លានដុល្លារ ចំណែក ១៣ពាន់លានដុល្លារផ្សេងទៀត សម្រាប់ជំនួយអាហ្វ្រិក មានប្រភពពីខាងវិស័យឯកជន។ ប៉ុន្តែ ទោះបីជាមានជំនួយ និងការសន្យាផ្អាកទារបំណុលពីបណ្តាប្រទេស និងស្ថាប័នហិរញ្ញវត្ថុដូចជា IMF និងធនាគារពិភពលោក នៅក្នុងអំឡុងឆ្លងរាតត្បាតរបស់កូវីដ អាហ្វ្រិក នៅខ្វះថវិកាប្រមាណ៤៤ពាន់លានដុល្លារ ដើម្បីប្រយុទ្ធប្រឆាំងនឹងជំងឺកូវីដ ១៩។
នៅក្នុងសេចក្តីសន្និដ្ឋានរួមគ្នា កាលពីថ្ងៃសុក្រ មូលនិធិរូបិយវត្ថុអន្តរជាតិ និងធនាគារពិភពលោកបានព្រមានថា កង្វះខាតផ្នែកសុខាភិបាល ហើយ និងសុខភាពទន់ខ្សោយរបស់ប្រជាជននៅទ្វីបអាហ្វ្រិក នឹងអាចជំរុញឲ្យជំងឺកូវីដ១៩ឆ្លងរីករាលដាលខ្លាំង ហើយនិងសម្លាប់មនុស្សដ៏ច្រើន ក្នុងទឹកដីអាហ្វ្រិក។ ការវាយតម្លៃកន្លងមកបានបង្ហាញថា ប្រសិនបើប្រជាជនអាហ្វ្រិក ប្រមាណ ១០ភាគរយ ឆ្លងកូរ៉ូណាវីរុស នោះគេត្រូវការថវិកាប្រមាណ ៣៦ពាន់លានដុល្លារ ដើម្បី ព្យាបាលអ្នកជំងឺ ប៉ុន្តែ តម្រូវការថវិកានឹងកើនឡើង ច្រើននេះ បើសិន វិបត្តិកូវីដ ១៩ នៅបន្ត និងរីករាលដាលខ្លាំងនៅទ្វីបអាហ្វ្រិក។
សម្រាប់ប្រធានធនាគារពិភពលោក វិបត្តិកូវីដ១៩នឹងធ្វើឲ្យការខិតខំប្រឹងប្រែងកន្លងមក ដើម្បីការអភិវឌ្ឍ កាត់បន្ថយភាពក្រីក្រ នៅទឹកដីអាហ្វ្រិក ត្រូវរលាយដូចអំបិលត្រូវទឹក។ មូលនិធិIMF លើកឡើងពីការធ្លាក់ចុះ ១,៦ភាគរយ នៃផលិតផលក្នុងសរុប របស់អាហ្វ្រិក នៅឆ្នាំ ២០២០ ដែលជាចំនួនដ៏ច្រើនមិនធ្លាប់មាន។ ចំណែក ធនាគារពិភពលោកបានព្រមានពីសេដ្ឋកិច្ចដើរថយក្រោយ របស់អាហ្រ្វិក ដែលទើបមាន ជាលើកទី១ នៅក្នុងរយៈពេល ២៥ឆ្នាំចុងក្រោយនេះ។
ជារួម មូលនិធិIMF និងធនាគារពិភពលោក រួមទាំងថ្នាក់ដឹកនាំអាហ្រ្វិកដែលបានចូលរួមនៅក្នុងកិច្ចប្រជុំតាមវីដេអូ កាលពីថ្ងៃសុក្រទី ១៧មេសា បានអំពាវនាវឲ្យសហគមន៍អន្តរជាតិជួយសេដ្ឋកិច្ចអាហ្វ្រិកឲ្យបានឆាប់បំផុត។
ដើម្បី ជួយសម្រាល ទប់សេដ្ឋកិច្ចអាហ្វ្រិក ដែលរួបរឹតដោយភាពក្រីក្រ និងប្រាក់បំណុលជុំទិស ទាំងមូលនិធិIMF និងធនាគារពិភពលោកបានប្រកាសជាបន្តបន្ទាប់ កញ្ចប់ជំនួយ ហិរញ្ញវត្ថុ។ នៅដើមសប្តាហ៍នេះ IMF ប្រកាសផ្តល់ជំនួយ សម្រាប់ប្រទេសក្រីក្រ ជាងគេ ក្នុងលោក ចំនួន២៥ ចំណែក ធនាគារពិភពលោកបានប្រកាសបញ្ចេញថវិកា ១៦០ពាន់លានដុល្លារ ដែលក្នុងនោះ មាន ៥៥ពាន់លានដុល្លារ សម្រាប់ជួយបណ្តាប្រទេសអាហ្វ្រិក ក្នុងការប្រឈមនឹងវិបត្តិកូវីដ ១៩ នៅក្នុងរយៈពេល ១៥ខែទៅមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ