បារាំងសម្លាប់បានមេអាល់កៃដានៅអាហ្វ្រិក Aqmi ក្នុងប្រតិបត្តិការ នៅម៉ាលី
ចុះផ្សាយនៅថ្ងៃ៖
ស្តាប់ - ០៦:០៤
រដ្ឋមន្ត្រីក្រសួងការពារជាតិបារាំង លោកស្រី Florence Parly បានប្រកាសជូនដំណឹងនៅយប់ថ្ងៃសុក្រទី ៥ មិថុនា ២០២០ អំពីការស្លាប់របស់មេដឹកនាំចលនាអាល់កៃដានៅអាហ្វ្រិក ហៅកាត់ថា អាក់មី។ Abdelmalek Droukdel និងសហការជំនិតជាច្រើននាក់ បានស្លាប់ ក្នុងប្រតិបត្តិការយោធាបារាំងកាលពីថ្ងៃទី ៣ មិថុនា នៅប្រទេសម៉ាលី។ ដំណឹងនេះធ្លាក់មកតែប៉ុន្មានម៉ោងក្រោយ ជំនួបប្រជុំរបស់ក្រុមប្រឹក្សាសន្តិសុខអង្គការសហប្រជាជាតិជួបប្រជុំតាម តាមវីដេខុនហ្វេរិន ដើម្បីសម្តែងការគាំទ្រសកម្មភាពប្រយុទ្ធប្រឆាំងនឹងភេរវកម្មនៅអាហ្វ្រិក។
មេដឹកនាំអាល់កៃដានៅម៉ាហ្ក្រេបនេះ មិនដឹងជាត្រូវស្លាប់ប៉ុន្មានដងហើយទេ។ ហើយពេលនេះអ្នកជំនាញនៅប្រុងប្រយ័ត្ននៅឡើយ ដរាបណាក្រុមភេរវនិយមមិនប្រកាសទទួលស្គាល់ការស្លាប់នេះ។ ប៉ុន្តែ លទ្ធផលនៃការវិភាគអាដេអិន បានបញ្ជាក់ថាអ្នកស្លាប់នោះពិតជា អាប់ឌែលម៉ាឡេក ឌ្រូកឌែល (Abdelmalek Droukdel) ជាមេកើយចលនាអាល់កៃដានៅម៉ាហ្ក្រេបមែន ទើបប៉ារីសហ៊ានធ្វើសេចក្តីប្រកាសជូនដំណឹង នៅយប់មិញ ត្រូវជាថ្ងៃទី ៥ មិថុនា។
ដោយមានការគាំទ្រពីដៃគូ និងផ្តល់ព័ត៌មានចារកិច្ចពីសហរដ្ឋអាមេរិក ដែលមានដ្រូនឈ្លបការណ៍សកម្មខ្លាំងក្នុងតំបន់ បារាំងបានដឹកនាំធ្វើប្រតិបត្តិការកម្ចាត់មេអាល់កៃដា នៅថ្ងៃទី ៣ មិថុនា នៅភាគខាងជើងប្រទេសម៉ាលី ត្រង់តំបន់ព្រំដែនចម្ងាយប្រមាណ៨០គីឡូម៉ែត្រពីប្រទេសអាល់ហ្សេរី ដោយប្រមូលផ្តុំកម្លាំងឧទ្ធម្ភាគចក្រ និងទ័ពកម្មង់ដូរថ្មើរជើង ជាច្រើននាក់។
ជាសរុបមានស្លាប់៥នាក់ ៖ អាប់ឌែលម៉ាឡេក ឌ្រូកឌែល និងសហការីជំនិត៤នាក់ ក្នុងនោះម្នាក់មានតួនាទីជាន់ខ្ពស់ទទួលបន្ទុកឃោសនាមនោគមវិជ្ជាAQMIអាមីផង។
អាប់ឌែលម៉ាឡេក ឌ្រូកឌែល ជានរណា ?
កើតនៅ២០មេសាឆ្នាំ១៩៧០ នៅភូមិមួយចម្ងាយ៥០គីឡូម៉ែត្រពីទីក្រុងអាល់ហ្សេ ប្រទេសអាល់ហ្សេរី អាប់ឌែលម៉ាឡេក ឌ្រូកឌែល ជាមេកើយអាល់កៃដានៅអាហ្វ្រិកដែលមានអាយុយឺនយូរជាងគេ និងបានកាន់តំណែងស្ទើរគ្រប់ដំណាក់ ទម្រាំក្លាយជាមេធំ។ នៅឆ្នាំ១៩៩០ ក្នុងពេលអាល់ហ្សេរីធ្លាក់ក្នុងសង្គ្រាមស៊ីវិល អាប់ឌែលម៉ាឡេក ឌ្រូកឌែល ជានិស្សិតផ្នែកវិស្វករ បានចូលខ្លួនធ្វើជាសកម្មជននៃចលនារណសិរ្សស្វាគមន៍អ៊ីស្លាម FIS។ ជាចលនាដែលប្រឈមតតាំងដោយផ្ទាល់ទល់នឹងរបបកាន់អំណាចផ្ទាល់ បន្ទាប់ពីមានការលុបចោលលទ្ធផលបោះឆ្នោតឆ្នាំ១៩៩២ ដែលចលនាត្រូវឈ្នះ។ នៅអាយុ២៣ឆ្នាំ អាប់ឌែលម៉ាឡេក ឌ្រូកឌែល រត់ចូលព្រៃ ទៅបម្រើក្រុមប្រដាប់អាវុធអ៊ីស្លាម GIA និងបានទទួលតួនាទីកាន់តែធំៗឡើង តែក៏ត្រូវបានតុលាការអាល់ហ្សេរីកាត់ទោសប្រហារជីវិតដោយកំបាំងមុខ ចំនួន៥ដង ពីបទបានទៅប្រយុទ្ធនៅអាហ្វហ្កានីស្ថាន និងធ្វើសកម្មភាពភេរវកម្មផ្សេងៗ។ នៅឆ្នាំ២០០៤ អាប់ឌែលម៉ាឡេក ឌ្រូកឌែល បានក្លាយជាមេបញ្ជាការ និងប្រកាសភ្ជាប់ខ្លួនទៅនឹងបណ្តាញភេរវនិយមអន្តរជាតិអាល់កៃដា ហើយចាប់ផ្តើមបញ្ចេញសកម្មភាព និងសាបព្រោះមនោគមវិជ្ជាអាល់កៃដា នៅអាល់ហ្សេរី ប្រទេសម៉ូរីតានី តំបន់សាហ៊ែល តំបន់វាលខ្សាច់សាហារ៉ា និង ទៅដល់ប្រទេសម៉ាលី។
មិនដឹងដោយហេតុយុទ្ធសាស្ត្រឬអ្វី ក្រុមអាល់កៃដាម៉ាហ្ក្រេបដឹកនាំដោយឌ្រូកឌែល ដែលមានកំណើតនៅអាល់ហ្សេរី បានប្តូរទីបញ្ជាការដ្ឋានទៅភាគខាងជើងម៉ាលី ទឹកដីដែល អាប់ឌែលម៉ាឡេក ឌ្រូកឌែល មិនទាន់សូវស្គាល់ច្បាស់ ទើបក្រុមប្រតិបត្តិការពិសេសបារាំងអាចកម្ចាត់បាន។
ឥទ្ធិពលនៃការស្លាប់របស់អាប់ឌែលម៉ាឡេក ឌ្រូកឌែល
បារាំងកម្ចាត់បានមេកើយចលនាភេរវនិយមក្នុងតំបន់ច្រើនរូបមកហើយ តែមិនអាចកាច់បំបាក់យន្តការនិងដំណើរការជ្រើសរើសសមាជិកភេរវជនថ្មីទេ។ យ៉ាងណាមិញ ការស្លាប់របស់ អាប់ឌែលម៉ាឡេក ឌ្រូកឌែល មិនមែនមានន័យថាចលនាអាល់កៃដាម៉ាហ្ក្រេប អាក់មី រលត់រលាយឡើយ។
ប៉ុន្តែការស្លាប់នេះ ជាជោគជ័យប្រកបដោយនិម្មិត្តរូបខ្លាំង ព្រោះ អាប់ឌែលម៉ាឡេក ឌ្រូកឌែល ជាមេកើយអាក់មី ដែលមានបទពិសោធន៍និងដឹកនាំយូរអង្វែងជាងគេ នៅអាល់ហ្សេរី នៅម៉ូរីតានី និងនៅម៉ាលី។ ម្យ៉ាងវិញទៀត អាប់ឌែលម៉ាឡេក ឌ្រូកឌែល មានឥទ្ធិពលខ្លាំងផ្នែកផ្សព្វផ្សាយមនោគមវិជ្ជាអាល់កៃដា និងជាគំរូ គ្រប់គ្រងចលនាជីហាតជាច្រើនផ្សេង ក្នុងតំបន់សាហ៊ែល។ ការស្លាប់នេះ អាចនឹងធ្វើឱ្យបណ្តាញជីហាតតំបន់ សាហ៊ែល លែងមានលំនឹង ដោយអាប់ឌែលម៉ាឡេក ឌ្រូកឌែល អាចជាជនអាល់ហ្សេរីចុងក្រោយដែលជាអ្នកដឹកនាំចលនាភេរវនិយមនៅតំបន់សាហ៊ែល។
យ៉ាងណាក៏ដោយ ក៏គេអាចអបអរនឹងជោគជ័យនេះ ប៉ុន្តែការប្រយុទ្ធប្រឆាំងនឹងចលនាភេរវនិយមនៅបន្តខ្លាំងក្លាដដែល ជាពិសេសប្រឆាំងនឹងចលនាភេរវនិយមស្និទ្ធនឹងអង្គការរដ្ឋអ៊ីស្លាម ដែលកំពុងសកម្មខ្លាំងនៅតំបន់សាហ៊ែលត្រង់ប្រជុំព្រំដែនបីប្រទេស និងដែលជាគូប្រជែងភេរវនិយមរបស់ក្រុមAQMI។ កាលពីថ្ងៃទី ១៩ ឧសភា ក្រុមប្រតិបត្តិការបាកានបារាំងចាប់បាន អ្នកទទួលខុសត្រូវដ៏សំខាន់ម្នាក់ខាងរើសជនជីហាតថ្មីរបស់អង្គការរដ្ឋអ៊ីស្លាមនៅអាហ្វ្រិកផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ