បុរសខ្លាំងលីប៊ីលោក ហាហ្វតារ គាំទ្របទឈប់បាញ់ដែលមានសុពលភាពពីថ្ងៃទី៨ មិថុនា
បុរសខ្លាំងលីប៊ីលោកឧត្តមសេនីយ៍ខាលីហ្វា ហាហ្វតារ (Khalifa Haftar) បានសម្រេចគាំទ្របទឈប់បាញ់មួយនៅលីប៊ី ដែលនឹងចាប់មានពលភាពពីថ្ងៃចន្ទ ទី៨ មិថុនាតទៅ។ នេះ បើតាមការប្រកាសឲ្យដឹងពីប្រធានាធិបតីអេហ្ស៊ីបលោក អាប់ឌែល ហ្វាតា អាល់ស៊ីស៊ី បន្ទាប់ពីបានជួបពិភាក្សាជាមួយឧត្តមសេនីយ៍ហាហ្វតារ ក្នុងទីក្រុងគែររួចមក។
ចុះផ្សាយនៅថ្ងៃ៖
ស្តាប់ - ០២:២២
ការសម្រេចគាំទ្របទឈប់បាញ់របស់លោកសេនាប្រមុខខាលីហ្វា ហាហ្វតារ នេះ ធ្វើឡើងបន្ទាប់ពីកម្លាំងទ័ពរបស់លោក ត្រូវធ្លាក់ខ្លួនចាញ់ជាបន្តបន្ទាប់ក្នុងសមរភូមិក្រោយដៃកងទ័ពរបស់រដ្ឋាភិបាលសហភាពជាតិក្រុងទ្រីប៉ូលី ដែលទទួលស្គាល់ដោយអ.ស.ប។
នៅក្នុងសន្និសីទសារព័ត៌មានមួយ នាថ្ងៃសៅរ៍ ទី៦ មិថុនា អមដោយវត្តមានរបស់បុរសខ្លាំងលីប៊ី ហាហ្វតារ លោកប្រធានាធិបតីអេហ្ស៊ីប អាល់ស៊ីស៊ី បាននិយាយថា “គំនិតផ្តួចផ្តើមនេះ អំពាវនាវឲ្យគោរពរាល់កិច្ចខិតខំប្រឹងប្រែងនិងគំនិតផ្តួចផ្តើមអន្តរជាតិ ដោយប្រកាសបទឈប់បាញ់ពីម៉ោង៦ ព្រឹក ថ្ងៃចន្ទ ទី៨ មិថុនា ឆ្នាំ២០២០តទៅ។
លោក អាល់ស៊ីស៊ី បានបង្ហើបឲ្យដឹងទៀតថា គំនិតផ្តួចផ្តើមខាងលើនេះ អាចជាការត្រួសត្រាយផ្លូវ សម្រាប់ការបង្កើតក្រុមប្រឹក្សាប្រធានាធិបតីជាប់ឆ្នោតនៅក្នុងប្រទេសលីប៊ីផងដែរ។ មានន័យថា ចំណាត់ការនេះសមស្របទៅតាមសំណើរបស់អង្គការសហប្រជាជាតិដែលស្វែងរកការរៀបចំបោះឆ្នោតមួយនៅលីប៊ីដើម្បីឈានទៅដល់ការបិទបញ្ចប់ជម្លោះនៅក្នុងប្រទេសនេះ។
ទន្ទឹមគ្នានេះ លោកប្រធានាធិបតីអេហ្ស៊ីបក៏បានជំរុញផងដែរ ឲ្យមានការគាំទ្រពីសហគមន៍អន្តរជាតិ ចំពោះគំនិតផ្តួចផ្តើមដែលលោកហៅថា "សេចក្តីប្រកាសក្រុងគែរ" ជំរុញឲ្យដកទាហានស៊ីឈ្នួលបរទេសទាំងអស់ចេញពីទឹកដីលីប៊ី។ ក្រៅពីនេះលោក ក៏បានអំពាវនាវផងដែរឲ្យអង្គការសហប្រជាជាតិ អញ្ជើញរដ្ឋាភិបាលក្រុងទ្រីប៉ូលី មកចូលតុពិភាក្សាជាមួយលោកឧត្តមសេនីយ៍ខាលីហ្វា ហាហ្វតារ។
គួរគូសបញ្ជាក់ជូនថា ប្រទេសលីប៊ីបានធ្លាក់ចូលក្នុងភាពច្របូកច្របល់តាំងពីឆ្នាំ ២០១១ ក្រោយមេដឹកនាំផ្តាច់ការកាដាហ្វីធ្លាក់ចេញពីអំណាច។ តាំងពីឆ្នាំ២០១៤ មក លីប៊ីត្រូវបានពុះចែកជាពីរដោយនៅម្ខាង មានរដ្ឋាភិបាលសហភាពជាតិរបស់លោកហ្វៃយែហ្ស អាល់សារ៉ាហ្ស គ្រប់គ្រងទីក្រុងទ្រីប៉ូលី និងទទួលស្គាល់ដោយសហគមន៍អន្តរជាតិ។ នៅម្ខាងទៀត លោកសេនាប្រមុខហាហ្វតារ គ្រប់គ្រងតំបន់ប៉ែកខាងកើត។
កាលពីឆ្នាំទៅមិញ កម្លាំងទ័ពរបស់បុរសខ្លាំងហាហ្វតារ បានសង្គ្រប់ប្រយុទ្ធយ៉ាងខ្លាំង ដើម្បីអាចដណ្តើមយកទីក្រុងទ្រីប៉ូលីមកកាន់កាប់។ ក៏ប៉ុន្តែ កងកម្លាំងរបស់លោកសេនាប្រមុខហាហ្វតារ បានជួបបរាជ័យជាបន្តបន្ទាប់ ក្រោមស្នាដៃនៃកងកម្លាំងទ័ពរបស់រដ្ឋាភិបាលក្រុងទ្រីប៉ូលី ដែលគាំទ្រដោយតួកគី។ ចំណែក លោកឧត្តមសេនីយ៍ ខាលីហ្វា ហាហ្វតារ ទទួលបានការគាំទ្រពីអេហ្ស៊ីប អារ៉ាប់រួម និងប្រទេសរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ