ក្រុមប្រដាប់អាវុធចូលចាប់ជំរិតក្មេងស្រីសាលា នីហ្សេរីយ៉ា ជាង៣០០នាក់
នៅប្រទេសនីហ្សេរីយ៉ា ក្នុងទ្វីបអាហ្វ្រិក ក្មេងស្រីសាលា ៣១៧នាក់ ត្រូវចោរប្រដាប់អាវុធ ចូលចាប់ ជំរិត ធ្វើជាចំណាប់ខ្មាំង កាលពីយប់ថ្ងៃព្រហស្បតិ៍ ឈានចូលដល់ថ្ងៃសុក្រម្សិលមិញ។ ហេតុការណ៍នេះកើតឡើង នៅអនុវិទ្យាល័យសិស្សស្រី ដែលស្ថិតនៅភាគពាយ័ព្យប្រទេសនីហ្សេរីយ៉ា។ នៅក្នុងរយៈពេលតែ១សប្តាហ៍ នេះជាលើកទី២ ដែលក្រុមប្រដាប់អាវុធ ចូលចាប់ជំរិតសិស្សសាលានៅប្រទេសនីហ្សេរីយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
នៅវេលាម៉ោង ១អាធ្រាត្រឈានចូលថ្ងៃសុក្រ ក្រុមប្រដាប់អាវុធ មួយក្រុម បានបើករថយន្តចូល ចាប់ពង្រត់ក្មេងស្រីដែលស្នាក់នៅអនុវិទ្យាល័យមួយ នាភាគពាយ័ព្យប្រទេសនីហ្សេរីយ៉ា។ នេះ បើតាមសេចក្តីប្រកាសព័ត៌មានកាលពីថ្ងៃសុក្រ របស់ប៉ូលិសនីហ្សេរីយ៉ា។
តាមអ្នកនាំពាក្យរបស់ប៉ូលិសប្រចាំរដ្ឋZafara ក្មេងស្រី ៣១៧ នាក់ត្រូវក្រុមប្រដាប់អាវុធ ចាប់ជាចំណាប់ខ្មាំង បង្ខំឲ្យធ្វើដំណើរថ្មើរជើង សំដៅ ជំរំលាក់ខ្លួនរបស់ពួកវា នៅក្នុងព្រៃ។
នៅថ្ងៃសុក្រ ប៉ូលិស និងទាហាននីហ្សេរីយ៉ាដែលមានបំពាក់ដោយអាវុធធុនធ្ងន់ ត្រូវបានបញ្ជូនទៅកាន់ទីតាំង ដែលគេជឿថា ពួកក្រុមប្រដាប់អាវុធ កំពុងចាប់ក្មេងសាលាជាចំណាប់ខ្មាំង។
នៅក្នុងរយៈពេលតែ១សប្តាហ៍ នេះជាលើកទី២ ដែលសិស្សសាលាត្រូវក្រុមប្រដាប់អាវុធ ចូលចាប់ជំរិតជាចំណាប់ខ្មាំង។ នៅសប្តាហ៍មុន សិស្សសាលាចំនួន ៤២នាក់ ដែលនៅក្នុងនោះ មាន២៧នាក់ជានិស្សិត ត្រូវក្រុមប្រដាប់អាវុធ ដែលអ្នកស្រុកហៅថា ក្រុមចោរប្លន់ ប្រចាំតំបន់ ចូលចាប់ជំរិត ជាចំណាប់ខ្មាំង។ ចំណែកនិស្សិតម្នាក់ត្រូវចោរបាញ់សម្លាប់។
ក្រុមចោរប្លន់ ដែលមានជំរំលាក់ខ្លួននៅក្នុងព្រៃ ដ៏ធំល្វឹងល្វើយ នៅក្នុងប្រទេសនីហ្សេរីយ៉ា ឧស្សាហ៍ធ្វើសកម្មភាព ឆក់ប្លន់ គោក្របីរបស់ប្រជាជន និងចាប់ជំរិតក្មេងសាលា ដែលប្រមូលផ្តុំស្នាក់នៅ តាមសាលារៀន។
តាមវិទ្យាស្ថានដោះស្រាយវិបត្តិអន្តរជាតិ ICG ចាប់តាំងពីឆ្នាំ ២០១១ អំពើហិង្សា និងសកម្មភាពឧក្រិដ្ឋ របស់ក្រុមចោរប្លន់ បានសម្លាប់មនុស្សជាង ៨ពាន់នាក់ និងធ្វើឲ្យមនុស្សជាង២សែននាក់ រត់ភៀសខ្លួនពីផ្ទះសម្បែង។
នៅនីហ្សេរីយ៉ាដែលជាប្រទេសមានប្រជាជនច្រើនជាងគេនៅអាហ្វ្រិក ក្រុមចោរប្លន់ ក្រុមប្រដាប់អាវុធដែលមាននិន្នាការទៅរកក្រុមជីហាត ភេរវនិយម បានកើនឡើង ចំនួន គួរឲ្យកត់សំគាល់ រហូតធ្វើឲ្យសន្តិសុខរបស់ប្រទេសមួយនេះធ្លាក់ចុះខ្លាំង ចំណែកការចាប់ជំរិត សិស្សសាលាក៏មានចំនួនកាន់តែច្រើន។ តាមមន្រ្តីដែលសុំមិនបញ្ចេញឈ្មោះ ការយល់ព្រមបង់ប្រាក់រំលោះចំណាប់ខ្មាំង ជាហេតុផលមួយដែលធ្វើឲ្យក្រុមចោរប្រដាប់អាវុធ ចូលចិត្តចាប់ជំរិតកូនសិស្សនីហ្សេរីយ៉ា។ នៅខែធ្នូចុងឆ្នាំមុន ក្មេងប្រុសសាលាចំនួន ៣៤៤នាក់ ត្រូវក្រុមប្រដាប់អាវុធ ចាប់ជំរិត មុននឹងត្រូវដោះលែង មកវិញ នៅ ៦ថ្ងៃក្រោយ។ គេវាយតម្លៃថា ក្រុមចោរយល់ព្រមដោះលែង ក្មេងប្រុស ដោយរដ្ឋាភិបាលសុខចិត្តបង់ប្រាក់ រំលោះ ប៉ុន្តែ រដ្ឋាភិបាល នីហ្សេរីយ៉ាបានបដិសេធជានិច្ចថា មិនដែលធ្លាប់បង់ប្រាក់ ជាថ្នូរនឹងការដោះលែងចំណាប់ខ្មាំងនោះទេ។
គេនៅចាំបានថា គឺនៅនីហ្សេរីយ៉ានេះឯង ដែលក្មេងស្រីសាលាជាង ២០០នាក់ត្រូវក្រុមប្រដាប់អាវុធ បូកូអារ៉ាំ ចាប់ជំរិតជាចំណាប់ខ្មាំង កាលពីឆ្នាំ ២០១៤។ នៅឆ្នាំ ២០១៧ ពួកនេះបានដោះលែងក្មេងស្រីសាលាមកវិញចំនួន ៨២នាក់ បន្ទាប់ពីរដ្ឋាភិបាលនីហ្សេរីយ៉ាសុខចិត្តដោះលែងគ្នីគ្នារបស់វា ដែលអាជ្ញាធរនីហ្សេរីយ៉ាចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ