នីហ្សេរីយ៉ា៖ក្រុមBoko Haram ដោះលែងក្មេងស្រីសិស្សសាលា៨២នាក់
ក្រុមភេរវជន Boko Haram បានដោះលែងក្មេងស្រីសិស្សសាលា៨២នាក់ ដែលពួកវាបានចាប់ខ្លួនកាលពីឆ្នាំ២០១៤ នៅនីហ្សេរីយ៉ា។ ឆ្នាំ២០១៤ ក្រុម Boko Haram បានចាប់ចំណាប់ខ្មាំង ជាក្មេងស្រីសិស្សសាលាជាង២០០នាក់។ នៅទីក្រុងអាប៊ូចា ថ្ងៃអាទិត្យនេះ ប្រធានាធិបតីនីហ្សេរីយ៉ាត្រូវជួបក្មេងស្រី៨២នាក់ដែលក្រុមនេះទើបនឹង បានដោះលែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
យោងតាមរដ្ឋអំណាចនីហ្សេរីយ៉ា ក្រុមបូកូ អារ៉ាំ បានដោះលែងក្មេងស្រីសិស្សសាលា៨២នាក់ ជាថ្នូរនឹងការដោះលែងសកម្មជនក្រុមខ្លួន ដែលអាជ្ញាធរនីហ្សេរីយ៉ាបានចាប់ខ្លួន។ ប៉ុន្តែ អាជ្ញាធរមិនបានប្រាប់ថា តើនីហ្សេរីយ៉ាបានដោះលែងសកម្មជនក្រុមបូកូ អារ៉ាំប៉ុន្មាននាក់ ដើម្បីអាចទទួលបានក្មេងស្រីសិស្សសាលា៨២នាក់មកវិញទេ។
នៅបង់គី ខាងព្រំដែនកាំម៉ឺរូន ក្រុមគ្រូពេទ្យបានពិនិត្យសុខភាពក្មេងស្រីសិស្សសាលាទាំងនេះ មុននឹងអោយពួកគេឡើងយន្តហោះ ត្រលប់មកនីហ្សេរីយ៉ាវិញ។ គួររំលឹកថា ក្រុមបូកូ អារ៉ាំ បានចាប់ចំណាប់ខ្មាំង ជាក្មេងស្រីសិស្សសាលានីហ្សេរីយ៉ា ប្រមាណ២២០នាក់ កាលពីខែមេសា ឆ្នាំ២០១៤ នៅChibok ភាគឦសានប្រទេសនីហ្សេរីយ៉ា។ ក្មេងស្រី ជាង៥០នាក់បានរត់រួចខ្លួនមកវិញ។
បន្ទាប់ពីនោះ ក្រុមបូកូអារ៉ាំបានដោះលែងចំណាប់ខ្មាំងបន្តបន្ទាប់មកវិញ ដូចជានៅខែតុលាឆ្នាំ២០១៦ ក្រុមបូកូ អារ៉ាំ បានដោះលែងក្មេងស្រីសិស្សសាលា២១នាក់ ក្នុងនោះមានទាំងកុមារជាកូនៗរបស់ពួកនាង ដែលបានចាប់កំណើតក្នុងពេលចាប់ខ្លួននោះដែរ។ ប្រទេសស្វ៊ីស និងអង្គការកាកបាទក្រហម បានចូលរួមជួយរដ្ឋាភិបាលនីហ្សេរីយ៉ា ក្នុងការចរចាជាមួយក្រុមជ្រុលនិយមអ៊ីស្លាមមួយនេះ ដើម្បីទទួលបានការដោះលែងក្មេងស្រីទាំងនេះមកវិញ។
ដោយឡែក ក្រៅពីក្មេងស្រីសិស្សសាលាទាំងនេះ ក្រុមបូកូ អារ៉ាំ ក៏បានចាប់ចំណាប់ខ្មាំងរាប់ពាន់នាក់ ក្នុងនោះមានកុមារផងដែរ។ ៧ឆ្នាំមកនេះ ក្រុមភេរវជនបូកូអារ៉ាំបានធ្វើការបះបោរ នៅនីហ្សេរីយ៉ា ដើម្បីបង្កើតរដ្ឋអ៊ីស្លាមកាលីហ្វា នៅភាគឦសាន។ ក្រុមបូកូ អារ៉ាំ បានសម្លាប់មនុស្សជាង២ម៉ឺននាក់ ធ្វើអោយមានជនភៀសខ្លួនជាង២លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ