ស៊ូដង់៖រដ្ឋាភិបាល និងក្រុមឧទ្ទាមចុះហត្ថលេខាលើសេចក្តីថ្លែងការណ៍ជាគោលការណ៍
នៅក្នុងប្រទេសស៊ូដង់ រដ្ឋាភិបាល និងចលនារំដោះប្រជាមានិតមួយស្ថិតប៉ែកខាងត្បូងបានចុះហត្ថលេខាលើសេចក្តីថ្លែងការណ៍ជាគោលការណ៍នាថ្ងៃអាទិត្យ ទី២៨ មីនា។ ពិធីចុះហត្ថលេខាបានធ្វើឡើងនៅក្នុងទីក្រុងយូបានៃប៉ែកខាងត្បូងស៊ូដង់រវាងឧត្តមសេនីយអាប់ឌែល ហ្វាតា ប៊ូរ៉ាន ប្រធានក្រុមប្រឹក្សាយោធាក្នុងសម័យអន្តរកាលស៊ូដង់ និងប្រធានចលនារំដោះប្រជាមានិតស៊ូដង់ខាងជើងលោកអាប់ឌែលឡាហ្ស៊ី អាល់ ហ៊ីលូ។ សេចក្តីថ្លែការណ៍ជាគោលការណ៍នេះត្រូវបានភាគីជម្លោះទាំងពីរឯកភាពប្រើជាមូលដ្ឋានសម្រាប់ការចរចាស្វែងរកសន្តិភាពរវាងគ្នានៅ ៣សប្តាហ៍ខាងមុខ។ តើសេចក្តីថ្លែងការណ៍ជាគោលការណ៍នេះបានចែងពីអ្វីខ្លះ?
ចុះផ្សាយនៅថ្ងៃ៖
ស្តាប់ - ០២:១៦
តាមព័ត៌មានដែល AFP ទទួលបាន សេចក្តីថ្លែងការណ៍ជាគោលការណ៍បានគ្រោងបង្កើតរដ្ឋស៊ីវិលមួយ ប្រជាធិបតេយ្យ និងសហព័ន្ធសម្រាប់ស៊ូដង់តែមួយ។ នៅក្នុងរដ្ឋស៊ីវិល ប្រជាធិបតេយ្យ និងសហព័ន្ធនេះបានធានាពីសេរីភាពសាសនា ជំនឿ និងពិធីគោរពសាសនាសម្រាប់ប្រជាជនស៊ូដង់ទាំងអស់ដោយគ្មានការបែងចែក។ សេចក្តីថ្លែងការណ៍ជាគោលការណ៍ដែលរដ្ឋាភិបាលអន្តរកាល និងចលនារំដោះប្រជាមានិតមួយស្ថិតប៉ែកខាងត្បូងបានចុះហត្ថលេខាក៏បានបញ្ជាក់ច្បាស់ៗថា គ្មានសាសនាណាមួយត្រូវបានតម្រូវឲ្យគោរព ហើយរដ្ឋគ្មានអនុម័តយកសាសនាណាមួយជាសាសនាផ្លូវការរបស់រដ្ឋដែរ។
ទន្ទឹមគ្នានេះ ភាគីជម្លោះផ្ទៃក្នុងទាំងពីរបានឯកភាពគ្នាថា ស៊ូដង់ត្រូវតែមានកងទ័ពជាតិតែមួយ ហើយគ្រប់ស្ថាប័នសន្តិសុខ និងកងទ័ពទាំងអស់ត្រូវតែជារបស់រដ្ឋ ពោលមិនត្រូវចំណុះឲ្យគណបក្ស ឬចលនានយោបាយណាមួយទេ។ នៅក្នុងន័យនេះ នីតិវិធីធ្វើសមាហរណកម្ម និងការបង្រួបបង្រួមកងទ័ពត្រូវធ្វើបណ្តើរៗ និងត្រូវបញ្ចប់នៅដំណាច់សម័យអន្តរកាល។ គួររម្លឹកថាសព្វថ្ងៃនេះ ស៊ូដង់កំពុងពុះចែកជាពីរដោយនៅខាងត្បូងគ្រប់គ្រងដោយក្រុមឧទ្ទាម និងប៉ែកខាងជើងគ្រប់គ្រងដោយរដ្ឋអំណាចមួយចូលរួមដោយក្រុមស៊ីវិល និងយោធា។
រដ្ឋអំណាចយោធាបូកស៊ីវិលនេះត្រូវបានបង្កើតឡើងនៅក្រោយការបះបោរមហាជនដោយបានទម្លាក់មេដឹកនាំផ្តាច់ការលោកអូម៉ា អ៊ែលបេស្ហៀរក្នុងខែមេសា ឆ្នាំ ២០១៩។ បន្ទាប់មក រដ្ឋអំណាចដដែលមួយនេះក៏បានចាត់ទុកការស្វែងរកសន្តិភាពជាមួយក្រុមឧទ្ទាមជាប្រធានរឿងអាទិភាពមួយក្នុងចំណោមប្រធានរឿងអាទិភាពផ្សេងទៀត។ ជាក់ស្តែងក្នុងថ្ងៃទី៣ តុលា ឆ្នាំ ២០២០ រដ្ឋអំណាចយោធាបូកស៊ីវិលបានចុះហត្ថលេខាលើកិច្ចព្រមព្រៀងជាប្រវត្តិសាស្រ្តមួយជាមួយចលនាបដិវត្តន៍ស៊ូដង់ដែលមានសម្ព័ន្ធភាពជាមួយក្រុមឧទ្ទាមចំនួន ៥ក្រុម និងចលនានយោបាយចំនួន ៤ចលនា។
គេនៅមិនទាន់ដឹងថា តើភាគីជម្លោះផ្ទៃក្នុងស៊ូដង់អាចនិយាយត្រូវរ៉ូវគ្នាដើម្បីបង្រួបបង្រួមស៊ូដង់តែមួយឬអត់ទេ?។ អ្វីដែលគេអាចនិយាយបាន ភាគីនីមួយៗពិតជាមានឆន្ទៈនយោបាយ និងការលះបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ