អ.ស.ប. ជម្លោះនៅ ទីហ្ក្រេ យង់ឃ្នងខ្លាំង អាចចាត់ទុកជាអំពើឧក្រិដ្ឋកម្មប្រឆាំងមនុស្សជាតិ
ជម្លោះនៅតំបន់ទីហ្ក្រេ យង់ឃ្នងបំផុត ដែលគ្រប់ភាគីត្រូវទទួលខុសត្រូវ! នេះបើតាមពាក្យបរិហាររបស់ឧត្តមស្នងការសិទ្ធិមនុស្សអង្គការសហប្រជាជាតិ ដែលបានចេញសេចក្តីសន្និដ្ឋានក្នុងរបាយការណ៍អង្កេតរបស់ខ្លួនថា គ្រប់ភាគីទំនងជាបានប្រព្រឹត្ត បទឧក្រិដ្ឋកម្មប្រឆាំងនឹងមនុស្សជាតិផង។
ចុះផ្សាយនៅថ្ងៃ៖
ស្តាប់ - ០២:០៣
មានហេតុផលច្រើនដែលបញ្ជាក់បង្ហាញឱ្យគេជឿជាក់ថា គ្រប់ភាគីជម្លោះនៅតំបន់ទីហ្ក្រេ បានរំលោភច្បាប់អន្តរជាតិ ស្តីពីសិទ្ធិមនុស្ស រំលោភច្បាប់មនុស្សធម៌អន្តរជាតិ ដោយខ្លះមានទម្រង់ជាអំពីឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិទៀត។ ជាការរំលោភច្បាប់ដ៏ធ្ងន់ធ្ងរ និងឃោរឃៅខ្លាំង ដែលចាំបាច់ត្រូវរកឱ្យឃើញអ្នកទទួលខុសត្រូវ មិនថាជាភាគីខាងណាទេ។ នេះបើតាមការបញ្ជាក់របស់លោកស្រីឧត្តមស្នងការសិទ្ធិមនុស្សអង្គការសហប្រជាជាតិ Michelle Bachelet។
សម្រាប់ឧត្តមស្នងការគណៈកម្មការសិទ្ធិមនុស្សអេត្យូពីវិញ តាមរយៈលទ្ធផលអង្កេតនេះ គ្រប់ភាគីពាក់ព័ន្ធក្នុងជម្លោះ ត្រូវទទួលស្គាល់ទង្វើរបស់ខ្លួន និងប្តេជ្ញាចាត់វិធានការជាក់ស្តែងប្រកបដោយទំនួលខុសត្រូវ ដើម្បីសងដល់ជនរងគ្រោះ និងរកដំណោះស្រាយជានិរន្តរ៍មួយ ដើម្បីបិទបញ្ចប់ទុក្ខវេទនារបស់ប្រជាពលរដ្ឋរាប់លាននាក់។
សូមបញ្ជាក់ថា អង្គការសហប្រជាជាតិ សហការជាមួយគណៈកម្មការសិទ្ធិមនុស្សអេត្យូពី បានចុះទៅធ្វើអង្កេត ដល់ផ្ទាល់កន្លែង ដោយមានជួបសម្ភាសន៍សម្ងាត់ ជួបប្រជុំជាមួយអាជ្ញាធរមូលដ្ឋាន សហព័ន្ធ និងក្រុមអង្គការក្រៅរដ្ឋាភិបាល ព្រមទាំងក្រុមគ្រូពេទ្យជាច្រើន ជុំវិញជម្លោះនៅតំបន់ទីហ្ក្រេ ពីថ្ងៃទី ៣វិច្ឆិកា២០២០ ដល់ថ្ងៃទី ២៨មិថុនា ២០២១ ពោលគឺពី ថ្ងៃដែលនាយករដ្ឋមន្ត្រីអេត្យូពី ជ័យលាភីរង្វាន់ណូបែលសន្តិភាព បានប្រកាសបើកប្រតិបត្តិការកម្ចាត់ពួកឧទ្ទាមទីហ្ក្រេ ដល់ថ្ងៃដែលប្រមុខរដ្ឋាភិបាលអេត្យូពី ប្រកាសជាឈប់បាញ់ឯកតោភាគី។ តាំងពីពេលនោះមក ស្ថានភាពក្នុងប្រទេសបានប្តូរផ្លាស់យ៉ាងខ្លាំង ដោយកាលពីថ្ងៃអង្គារទី ២វិច្ឆិកា ម្សិលមិញ អេត្យូពីបានប្រកាសដាក់ប្រទេសទាំងមូលក្នុងភាពអាសន្នប្រឈមនឹងស្ទុះឡើងវិញនៃចលនាឧទ្ទាមទីហ្ក្រេ។
តែការអង្កេតបានជួបឧបសគ្គច្រើន និងរងពាក្យរិះគន់ ថារបាយការណ៍មានលក្ខណៈលម្អៀង ព្រោះក្រុមអ្នកអង្កេតមិនអាចចូលជួបភាគីទីហ្ក្រេ បានគ្រប់តាមគម្រោង។ ម្យ៉ាងទៀត ក្រុមអ្នកអង្កេតរបស់ស្នងការសិទ្ធិមនុស្សម្នាក់ត្រូវបានបណ្តេញចេញពីអេត្យូពី ជាមួយនឹងតំណាងអង្គការសហប្រជាជាតិចំនួន៦រូបផ្សេងទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ