អ.ស.ប ឲ្យអេត្យូពីបង្ហាញភស្តុតាងជាលាយលក្ខណ៍អក្សរ ជុំវិញការបណ្តេញមន្រ្តីអ.ស.បចេញពីប្រទេស
នៅថ្ងៃទី ៦តុលា ២០២១ អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយទែរស៍ បានសម្តែងការក្រេវក្រោធយ៉ាងខ្លាំង នៅក្នុងអង្គប្រជុំក្រុមប្រឹក្សាសន្តិសុខអង្គការសហប្រជាជាតិស្តីពី អេត្យូពី។ លោក អង់តូនីញ៉ូ ហ្គុយទែរស៍ បានទាមទារឱ្យរដ្ឋាភិបាលអេត្យូពីបង្ហាញភស្តុតាងជាលាយលក្ខណ៍អក្សរ ជុំវិញហេតុផលដែលនាំឱ្យអេត្យូពីបណ្តេញមន្ត្រីអង្គការសហប្រជាជាតិ៧រូបចេញពីប្រទេស។
ចុះផ្សាយនៅថ្ងៃ៖
ស្តាប់ - ០២:០០
កាលពីថ្ងៃសុក្រទី ១តុលា លោកអគ្គលេខាធិការអង្គការសហប្រជាជាតិ បានស្នើសុំភស្តុតាងជាលាយលក្ខណ៍អក្សរម្តងហើយពីប្រធានាធិបតីអេត្យូពី។ ហើយនៅថ្ងៃពុធម្សិលមិញនេះ នៅក្នុងជំនួបប្រជុំក្រុមប្រឹក្សាសន្តិសុខ កោះប្រជុំបន្ទាន់ជាលើកទីពីរក្នុងរយៈពេលមួយសប្តាហ៍សោះ លោកអគ្គលេខាធិការ បានទាមទារជាថ្មី ឱ្យអេត្យូពីផ្តល់ឯកសារបញ្ជាក់អំពីសកម្មភាពជ្រៀតជ្រែកកិច្ចការអេត្យូពី និងអំពីឥរិយាបថមិនល្អរបស់មន្ត្រីអង្គការសហប្រជាជាតិ ទាំង៧រូប ដែលអេត្យូពីបានបណ្តេញចេញពីប្រទេស។
សម្រាប់លោកអគ្គលេខាធិការ ការបណ្តេញមន្ត្រីអង្គការសហប្រជាជាតិ ជាសកម្មភាពរំលោភធម្មនុញ្ញអង្គការសប្រជាជាតិផង និងធ្វើឱ្យប្រទេសដែលកំពុងឆ្លងកាត់វិបត្តិមនុស្សធម៌យ៉ាងធ្ងន់ធ្ងរស្រាប់ផង ធ្លាក់ក្នុងស្ថានភាពកាន់តែគួរឱ្យព្រួយបារម្ភ។
ប៉ុន្តែនៅចំពោះមុខក្រុមប្រឹក្សាសន្តិសុខ ឯកអគ្គរដ្ឋទូតអេត្យូពីប្រចាំអង្គការសហប្រជាជាតិ បានផ្តល់ហេតុផលដោយផ្ទាល់មាត់តែប៉ុណ្ណោះ។ បើរដ្ឋាភិបាលអេត្យូពី មន្ត្រីអង្គការសហប្រជាជាតិបានបំប៉ោងតួលេខ ជនរងគ្រោះ បានប្រឌិតចំនួនអ្នកស្លាប់ដោយគ្រោះទុរ្ភិក្ស និងបានអញ្ជើញពួកឧទ្ទាមប្រដាប់អាវុធឱ្យមកក្នុងទីស្នាក់ការអង្គការសហប្រជាជាតិ។ សម្រាប់អេត្យូពី មន្ត្រីអ.ស.ប. មិនត្រូវប្រើតួនាទី ឬ ភាពជិតស្និទ្ធក្នុងការងារដើម្បីបម្រើប្រយោជន៍ឯកជនផ្ទាល់ ដើម្បីហិរញ្ញវត្ថុ ឬដើម្បីគ្រួសារសាច់ញាតិទេ។ មន្ត្រីអ.ស.ប.ក៏មិនត្រូវផ្តល់ព័ត៌មានដែលខ្លួនដឹងដោយសារតួនាទីផ្លូវការ ទៅឱ្យរដ្ឋាភិបាល បុគ្គល ឬអ្នកផ្សេងទេ។ ទាំងនេះជារៀបរាប់របស់ឯកអគ្គរដ្ឋទូតអេត្យូពី ដោយសន្យាថារដ្ឋាភិបាលអេត្យូពី នឹងជូនឯកសារជាលាយលក្ខណ៍អក្សរទៅអគ្គលេខាធិការអង្គការសហប្រជាជាតិ។
ហេតុផលបណ្តេញមន្ត្រីអ.ស.ប. ដើម្បីការពារអធិបតេយ្យភាពជាតិអេត្យូពីនេះ ដោយគ្មានការភ្ញាក់ផ្អើល បានទទួលការពារភ្លាមពីចិននិងរុស្ស៊ី។ ប៉ុន្តែទង្វើរបស់អេត្យូពីនេះជាការរំលោភកតិកាសញ្ញាអង្គការសហប្រជាជាតិសម្រាប់ក្រសែភ្នែកអ្នកការទូតមួយចំនួនធំផ្សេងទៀត ដូចជាសហគមន៍អង្គការមនុស្សធម៌ និងអ្នកការទូតនៃក្រុមប្រឹក្សាសន្តិសុខ ដែល ព្រួយបារម្ភខ្លាចតែវិបត្តិអេត្យូពីនេះ ក្លាយជាគំរូសម្រាប់ប្រទេសផ្សេងទៀតធ្វើតាមនៅមានវិបត្តិ ដូចជានៅអាហ្វហ្កានីស្ថានឬភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ