អ្វីទៅជាកម្មវត្ថុនៃដំណើរទស្សនកិច្ចមួយជុំទ្វីបអាហ្រ្វិករបស់ប្រមុខការទូតអាមេរិក?
ប្រមុខការទូតអាមេរិកលោកអង់តូនី ប៊្លីនកិនបានផ្តើមបំពេញទស្សនកិច្ចមួយជុំទ្វីបអាហ្រ្វិកចាប់ពីយប់ថ្ងៃអង្គារ ទី១៦ ដល់ថ្ងៃសៅរ៍ ទី២០ វិច្ឆិកា។ តាំងពីឡើងកាន់តំណែងប្រមុខការទូត នេះជាលើកទី១ ដែលលោកប៊្លីនកិលបានធ្វើដំណើរទៅកាន់ទ្វីបអាហ្រ្វិក។ លទ្ធិប្រជាធិបតេយ្យ និងការប្រែប្រួលអាកាសធាតុជាប្រធានបទស្នូលនៃទស្សនកិច្ចរបស់លោកប្ល៊ីនកិន។ តែក្នុងពេលជាមួយគ្នា វិបត្តិនៅក្នុងប្រទេសអេត្យូពី និងប្រទេសស៊ូដង់ក៏នឹងក្លាយជាប្រធានបទដែលលោកប៊្លីនកិនត្រូវលើកយកទៅជជែកដែរ។
ចុះផ្សាយនៅថ្ងៃ៖
ស្តាប់ - ០២:៣៧
មានប្រទេសអាហ្វ្រិកចំនួន ៣ ដែលប្រមុខការទូតអាមេរិកលោកអង់តូនី ប៊្លីនកិនត្រូវទៅបំពេញទស្សនកិច្ច គឺកេនយ៉ា នីហ្សេរីយ៉ា និងប្រទេសសេណេហ្កាល់។ ប្រទេសអាហ្រ្វិកទាំង ៣ នេះត្រូវបានអាមេរិកចាត់ទុកជាប្រទេសគន្លឹះនៃយុទ្ធសាស្រ្តរបស់រដ្ឋបាលអាមេរិកក្នុងជំនាន់ប្រធានាធិបតីលោកចូ បៃដិន។ ជម្រើសទៅកាន់កេនយ៉ាព្រោះជាប្រទេសសម្ព័ន្ធមិត្តយូរលង់មួយរបស់អាមេរិក និងដែលចិនកំពុងសាបព្រោះឥទ្ធិពលកាន់តែខ្លាំង។ ជម្រើសទៅកាន់នីហ្សេរីយ៉ាព្រោះជាប្រទេសដែលមានចំនួនប្រជាជនច្រើនជាងគេនៅទ្វីបអាហ្រ្វិក។ ចំណែកជម្រើសទៅកាន់សេណេហ្កាល់ព្រោះជាប្រទេសគំរូនៃស្ថិរភាពប្រជាធិបតេយ្យ។ លោកអែរវិន ម៉ាស៊ីនហ្កា មន្រ្តីជាន់ខ្ពស់នៃក្រសួងការបរទេសអាមេរិកបានពន្យល់ថា ទស្សនកិច្ចរបស់លោកប៊្លីនកិននៅអាហ្រ្វិកផ្តោតលើប្រធានបទសំខាន់ចំនួន ៣ គឺលទ្ធិប្រជាធិបតេយ្យ ការប្រែប្រួលអាកាសធាតុ និងការអភិវឌ្ឍន៍យូរអង្វែង។
ទន្ទឹមគ្នានេះ លោកប៊្លីនកិនក៏នឹងជជែកផងដែរពីការអភិវឌ្ឍន៍លើសមត្ថភាពផលិតវ៉ាក់សាំងបង្ការកូវីដ១៩នៅអាហ្រ្វិក។ ដោយឡែកនាវត្តមាននៅទ្វីបអាហ្រ្វិកដែរ មានសំណុំរឿងចំនួនពីរទៀតដែលប្រមុខការទូតអាមេរិកមិនអាចមិននិយាយបាន គឺវិបត្តិនៅប្រទេសអេត្យូពី និងប្រទេសស៊ូដង់។ ក្នុងនាមជាសម្ព័ន្ធមិត្តជិតដិតយូរលង់របស់អាមេរិក អេត្យូពីបានបើកការវាយប្រហារលើក្រុមឧទ្ទាមនៃរណសិរ្យរំដោះប្រជាជនទីហ្រ្កេក្នុងតំបន់ទីហ្រ្កេ។ ថ្មីៗនេះ ប្រធានាធិបតីអាមេរិកលោកបៃដិនបានថ្លែងពីការត្រៀមដកអេត្យូពីចេញពីបញ្ជីប្រទេសអាហ្រ្វិកដែលទទួលបានការរួចពន្ធលើការនាំផលិតផលចូលអាមេរិក។ តែខណៈនេះ លោកបៃដិនមិនទាន់បានធ្វើទេដោយចង់ទុកឱកាសឲ្យមានការចរចាសន្តិភាពរវាងរដ្ឋាភិបាលអេត្យូពី និងក្រុមឧទ្ទាម។
ជាមួយប្រទេសស៊ូដង់វិញ រដ្ឋបាលអាមេរិកបានព្យួរជំនួយប្រមាណជា ៧០០លានដុល្លារក្រោយពីមានរដ្ឋប្រហារយោធាទម្លាក់រដ្ឋាភិបាលស៊ីវិលកាលពីដំណាច់ខែតុលា។ រដ្ឋប្រហារនេះបានធ្វើឲ្យគាំងដំណើរឆ្ពោះទៅកាន់លទ្ធិប្រជាធិបតេយ្យដែលស៊ូដង់ទើបចាប់ផ្តើមនៅក្រោយការទម្លាក់មេដឹកនាំផ្តាច់ការលោកអូម៉ារ អ៊ែល បេសៀក្នុងឆ្នាំ ២០១៩។ លោកចននី ការសុន អតីតមន្រ្តីការទូតជាន់ខ្ពស់អាមេរិកទទួលបន្ទុកទ្វីបអាហ្រ្វិកបានបញ្ជាក់ថា វត្តមានលោកប៊្លីនកិននៅអាហ្រិ្វកជាឱកាសដែលលោកប៊្លីនកិនត្រូវជជែកជាមួយថ្នាក់ដឹកនាំអាហ្រ្វិកដើម្បីស្វែងរកដំណោះស្រាយឲ្យវិបត្តិនៅអេត្យូពី និងស៊ូដង់។ បើប្រទេសទាំងពីរនេះធ្លាក់ក្នុងភាពវឹកវរកាន់តែខ្លាំងនាពេលខាងមុខ គឺជាការដួលរលំទ្វីបអាហ្រិ្វកទាំងមូល នេះជាការព្រមានរបស់លោកចននី ការសុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ