អាហ្រ្វិក និងតួកគីបានចុះហត្ថលេខាលើផែនការនៃកិច្ចសហប្រតិបត្តិការសម្រាប់ពីឆ្នាំ ២០២២ ដល់ឆ្នាំ ២០២៦
ជំនួបកំពូលអាហ្រ្វិក និងតួកគីរយៈពេល ២ថ្ងៃបានបិទបញ្ចប់នាយប់ថ្ងៃសៅរ៍ ទី១៨ ធ្នូដោយមានការចូលរួមពីប្រទេសអាហ្រ្វិកប្រមាណជា ៤០ប្រទេស។ លទ្ធផលដែលទទួលបានពីជំនួបកំពូល គឺអាហ្រ្វិក និងតួកគីបានចុះហត្ថលេខាលើផែនការនៃកិច្ចសហប្រតិបត្តិការរយៈពេល ៥ឆ្នាំពីឆ្នាំ ២០២២ ដល់ឆ្នាំ ២០២៦ ដែលផ្តោតលើសន្តិភាព សន្តិសុខ ហេដ្ឋារចនាសម្ព័ន្ធ ពាណិជ្ជកម្ម ឧស្សាហកម្ម ឬមួយក៏នៅក្នុងវិស័យអប់រំ។ ផែនការលំអិតទាំងនេះត្រូវបានបញ្ជាក់ដោយប្រធានាធិបតីតួកកីលោកអ៊ែរដូហ្កាន។ តែនាឱកាសនោះ លោកអ៊ែរដូហ្កានមិនភ្លេចនិយាយពីរឿងភេរវនិយម និងបានលើកឡើងពីភាពអយុត្តិធម៌សម្រាប់ទ្វីបអាហ្រ្វិកដែលគ្មានអ្នកតំណាងអចិន្រ្តៃយ៍ប្រចាំនៅក្រុមប្រឹក្សាសន្តិសុខអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០១:៣៨
« ជារឿងអយុត្តិធម៌ធំណាស់ដែលគ្មានអ្នកតំណាងអាហ្រ្វិកនៅក្នុងចំណោមសមាជិកអចិន្ត្រៃយ៍ទាំង ៥ប្រទេសនៃក្រុមប្រឹក្សាសន្តិសុខអង្គការសហប្រជាជាតិ ខណៈដែលទ្វីបអាហ្រ្វិកមានពលរដ្ឋ ១ ៣០០លាននាក់។ ដើម្បីឲ្យទ្វីបអាហ្រ្វិកអាចមានតំណាងរបស់ខ្លួននៅក្រុមប្រឹក្សាសន្តិសុខ ខ្ញុំជឿជាក់ថាយើងត្រូវតែរួមសាមគ្គីគ្នា។ យើងបានសម្រេចចិត្តតស៊ូប្រយុទ្ធនឹងភាពអយុត្តិធម៌នេះ។ ទាក់ទងនឹងរឿងសន្តិសុខ យើងបានដឹងច្បាស់ពីបញ្ហាសន្តិសុខដែលបងប្អូនអាហ្រ្វិករបស់យើងកំពុងជួបប្រទះ។
បញ្ហាដែលបង្កឡើងក្រុមភេរវនិយម ដូចជាក្រុម Boko Haram al Shabad និងអង្គការរដ្ឋអ៊ីស្លាមមិនបានកើតមានតែនៅក្នុងប៉ុន្មានប្រទេសប៉ុណ្ណោះទេ។ ភេរវនិយមជាបញ្ហារួមរបស់ទាំងអស់គ្នា។ សម្រាប់យើង គ្មានភាពខុសគ្នាឡើយរវាងក្រុមភេរវនិយម និងចលនា PKK និងចលនា FETO។ នៅក្នុងផែនការអាហ្រ្វិក តួកគីសម្រាប់ ៥ឆ្នាំខាងមុខ យើងនឹងធ្វើការកែលម្អលើវិស័យអប់រំ សុខាភិបាល កសិកម្ម និងការអភិវឌ្ឍន៍ធនធានមនុស្សតាមរយៈការដោះដូរចំណេះដឹង។
ទាំងអស់នេះជាអ្វីដែលយើងបានចាប់ផ្តើមនៅថ្ងៃនេះ។ ដើម្បីលើកស្ទួយនូវភាពរុងរឿងរបស់ប្រជាជនយើង ឈ្នះទាំងអស់គ្នា ថ្កុំថ្កើងទាំងអស់គ្នា រីកចម្រើនទាំងអស់គ្នា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ