ភាគីជម្លោះនៅលីប៊ីប្រកាសបទឈប់បាញ់ នៅក្រោមការអំពាវនាវរបស់រុស្ស៊ី និងតួកគី
ចុះផ្សាយនៅថ្ងៃ៖
ស្តាប់ - ០៧:៣៤
ភាគីជម្លោះនៅលីប៊ី បានប្រកាសបទឈប់បាញ់ នៅក្រោយមានជំនួបរវាងនាយករដ្ឋមន្រ្តីអាល្លឺម៉ង់ និងប្រធានាធិបតីរុស្ស៊ី នៅទីក្រុងម៉ូស្គូ កាលពីថ្ងៃសៅរ៍។ រដ្ឋាភិបាលសហភាពជាតិលីប៊ី ដែលទទួលស្គាល់ដោយសហគមន៍អន្តរជាតិបានប្រកាសនៅថ្ងៃអាទិត្យ ថាខ្លួន យល់ព្រម ធ្វើបទឈប់បាញ់ បន្ទាប់ពី សេនាប្រមុខខាលីហ្វា ហាវតារ ប្រកាសបទឈប់បាញ់ កាលពីយប់ថ្ងៃសុក្រ។ តាមភាគីទាំងពីរ បទឈប់បាញ់ នឹងចាប់ចូលជាធរមាន នៅ ថ្ងៃអាទិត្យ ប៉ុន្តែ ជាមួយនឹងលក្ខខ័ណ្ឌថា នឹងមានការប្រយុទ្ធឡើងវិញ បើសិនភាគីណាមួយ រំលោភបទឈប់បាញ់។
នៅលីប៊ី ភាគីជម្លោះ បានប្រកាសបទឈប់បាញ់ នៅព្រឹក ថ្ងៃអាទិត្យនេះ ទៅតាមការចង់បានរបស់ប្រមុខដឹកនាំរុស្ស៊ី និងតួកគី ដែលកាលពីថ្ងៃពុធ កន្លងទៅ បានអំពាវនាវឲ្យភាគីជម្លោះ នៅ លីប៊ី ប្រកាសបទឈប់បាញ់ នៅថ្ងៃអាទិត្យ។
រដ្ឋាភិបាលភាគខាងលិច ដែលដឹកនាំដោយសេនាប្រមុខខាលីហ្វា ហាវតារ បានចេញសេចក្តីថ្លែងការណ៍ មួយ កាលពីថ្ងៃសៅរ៍ ដើម្បី ប្រកាសបទឈប់បាញ់។ ចំណែកគូជម្លោះ គឺរដ្ឋាភិបាលសហភាពជាតិ លីប៊ី ដែលទទួលស្គាល់ដោយសហគមន៍អន្តរជាតិ បានប្រកាសបទឈប់បាញ់ ដែរ នៅព្រឹកថ្ងៃអាទិត្យ។
នៅប៉ុន្មានម៉ោងក្រោយ បទឈប់បាញ់ ភាគីទាំងពីរបានចោទប្រកាន់គ្នាទៅវិញ ទៅមក ថាបានរំលោភបទឈប់បាញ់ នៅក្រោយមានការប៉ះទង្គិចគ្នា និងការវាយប្រហារទៅលើកម្លាំងទ័ពរបស់សេនាប្រមុខហាវតារ នៅជាយក្រុងទ្រីប៉ូលី។ ក្រុមជីវពលប្រដាប់អាវុធ ដែលកកើតឡើង នៅក្នុងអំឡុងបដិវត្តន៍ពណ៌ ដែលឈានទៅផ្តួលរំលំ របបផ្តាច់ការកាដាហ្វី កំពុងសកម្មខ្លាំងនៅលីប៊ី និងគ្មានជំហរ ស្តាប់តាមភាគីជម្លោះ ធំៗទាំង២នោះទេ។ យ៉ាងណាក៏ដោយ រដ្ឋាភិបាលសហភាពជាតិលីប៊ី នៅទីក្រុងទ្រីប៉ូលីបានចេញសេចក្តីថ្លែងការណ៍ដែលថាខ្លួន នៅតែបន្តចូលរួម គោរពបទឈប់បាញ់ ចាប់ពីថ្ងៃអាទិត្យ។
បទឈប់បាញ់ រវាងភាគីជម្លោះ ទាំងពីរ ទើបកើតមានជាលើកទី១ នៅលីប៊ី ចាប់តាំងពី រដ្ឋាភិបាលខាងលិច ដឹកនាំដោយសេនាប្រមុខខាលីហ្វា ហាវតារ បើកការវាយប្រហារ សំដៅ ទីក្រុងទ្រីប៉ូលី ដែលគ្រប់គ្រងដោយ រដ្ឋាភិបាល សហភាពជាតិលីប៊ី តាំងពីខែមេសាឆ្នាំមុន។ គេមិននឹកស្មានថា នឹងអាចមានបទឈប់បាញ់កើតឡើងនោះទេ ព្រោះថា កម្លាំងទ័ពរបស់ឧត្តមសេនីយ៍ ហាវតារ កំពុងមានប្រៀប វាយប្រយុទ្ធចូលកាន់តែកៀក ទីក្រុងទ្រីប៉ូលី ដែលពួកគេសំដៅ វាយដណ្តើមគ្រប់គ្រង តាំងពីខែមេសា។ សេនាប្រមុខហាវតារផ្ទាល់ ក៏មិនបានបង្ហាញចេតនាចង់មានបទឈប់បាញ់ដែរ ទោះបីជាជាប្រធានាធិបតី រុស្ស៊ី និងប្រធានាធិបតី តួកគី បានថ្លែងអំពាវនាវរួមគ្នា កាលពីថ្ងៃពុធ ឲ្យមានបទឈប់បាញ់ នៅលីប៊ីក្តី។
បទឈប់បាញ់ នៅលីប៊ី អាចកើតមានឡើង ក៏ដោយសារមានការអន្តរាគម និងការអំពាវនាវជាពិសេស ពីប្រធានាធិបតី រុស្ស៊ី និងប្រធានាធិបតី តួកគី។ រុស្ស៊ី និងតួកគី ដើរតួយ៉ាងសំខាន់ នៅក្នុងជម្លោះ ប្រដាប់អាវុធ នៅលីប៊ី ជាពិសេស នៅបន្ទាប់ពីតួកគី ទើបសម្រេចបញ្ជូនទ័ពទៅជួយ រដ្ឋាភិបាលទីក្រុងទ្រីប៉ូលី ដែលទទួលស្គាល់ដោយសហគមន៍ អន្តរជាតិ ដើម្បីប្រយុទ្ធទប់ទល់នឹងកម្លាំងទ័ពរបស់លោកហាវតារ ដែលតាមពិត គាំទ្រ ដោយប្រទេសរុស្ស៊ី។ ភាគីជម្លោះនៅលីប៊ី យល់ព្រម ឈប់ប្រយុទ្ធគ្នា នៅពេលនេះ ក៏ដោយសារតែ បរទេស ដែលនៅពីក្រោយ ភាគី នីមួយៗ យល់ព្រមព្រៀងគ្នាដែរ។
ជាផ្លូវការ រុស្ស៊ីគ្មានបានបញ្ជូនកងទ័ពទៅជួយ រដ្ឋាភិបាលរបស់សេនាប្រមុខហាវតារនោះទេ។ ប៉ុន្តែ ប្រេសិតអង្គការសហប្រជាជាតិ សម្រាប់រឿងលីប៊ី បានអះអាងថា មានកងទ័ពស៊ីឈ្នួលរុស្ស៊ី ជាច្រើនពាន់នាក់ ដែលកំពុងប្រយុទ្ធក្នុងជួរកងទ័ពលីប៊ីខាងលិច របស់លោកសេនាប្រមុខហាវតារ។
នៅក្នុងជំនួបជាមួយ នាយករដ្ឋមន្រ្តីអាល្លឺម៉ង់ នៅទីក្រុងម៉ូស្គូ កាលពីថ្ងៃសៅរ៍ម្សិលមិញ លោកប្រធានាធិបតីវ្លាឌីមៀរ ពូទីនបាននិយាយទាត់ចោល ការចោទប្រកាន់ដែលថា រុស្ស៊ី មានជាប់ពាក់ព័ន្ធក្នុងជម្លោះប្រដាប់អាវុធនៅលីប៊ី។ សម្រាប់ប្រមុខរដ្ឋរុស្ស៊ី បើសិនមានជនជាតិរុស្ស៊ី ប្រយុទ្ធ នៅលីប៊ី ពួកគេទាំងនោះ មិនមែន ប្រយុទ្ធដើម្បី ប្រយោជន៍ជាតិរុស្ស៊ី ហើយក៏មិនបានទទួលប្រាក់ខែពីរដ្ឋាភិបាលរុស្ស៊ីដែរ។
តាមប្រេសិតអង្គការសហប្រជាជាតិ ជនជាតិរុស្ស៊ី ដែលប្រយុទ្ធក្នុងជួរកងទ័ពរបស់លោកឧត្តមសេនីយ៍ហាវតារ ភាគច្រើនជាទាហានស៊ីឈ្នួល របស់ក្រុមហ៊ុនរុស្ស៊ី ដែលមានទិសដៅសំខាន់ គឺការពារផលប្រយោជន៍ទីតាំងប្រេងរបស់ក្រុមហ៊ុនបរទេស នៅលីប៊ី។
បទឈប់បាញ់ នៅមុនសន្នីសិទអន្តរជាតិស្តីពីលីប៊ី នៅទីក្រុងប៊ែរឡាំង
ប្រេសិតអង្គការសហប្រជាជាតិ លោក បានថ្លែងស្វាគម អបអរ បទឈប់បាញ់ ព្រោះវាធ្វើឡើងនៅក្នុងកាលៈទេសៈ ដែលអង្គការសហប្រជាជាតិកំពុងត្រៀមរៀបចំ សន្នីសិទអន្តរជាតិស្តីពីវិបត្តិនៅលីប៊ី នៅទីក្រុងប៊ែរឡាំងនៅខែមករា។
នៅក្នុងសន្នីសិទអន្តរជាតិស្តីពីលីប៊ី ដែលផ្តួចផ្តើមដោយប្រេសិតរបស់អង្គការសហប្រជាជាតិ គេមានគម្រោង ចង់ឲ្យភាគីជម្លោះ ទាំងពីរ នៅលីប៊ី ព្រមទាំងប្រទេសដែលគាំទ្រភាគីជម្លោះ លីប៊ី ចូលរួមពិភាក្សា គ្នា ដើម្បីជួយឲ្យលីប៊ី ក្លាយជាប្រទេសមួយ ដែលមានអធិបតេយ្យភាព និងសន្តិភាព។
អធិបតេយ្យភាព និងសន្តិភាព នៅលីប៊ី ជាក្តីសង្ឃឹមរបស់លោកស្រីនាយករដ្ឋមន្រ្តីអាល្លឺម៉ង់ ដែលត្រូវធ្វើជាម្ចាស់ទទួលរៀបចំសន្នីសិទស្តីពីវិបត្តិលីប៊ី នៅទីក្រុងប៊ែរឡាំង។ ប៉ុន្តែ នៅក្នុងការពិតជាក់ស្តែង វាពិបាកនឹងអាចកើតឡើងទៅរួច ព្រោះថា សង្រ្គាមប្រយុទ្ធគ្នានៅលីប៊ី ស្មុគស្មាញ ខ្លាំងដែលគេពិបាកនឹងរកផ្លូវរកចេញណាមមួយ ដែលគ្រប់ភាគីជម្លោះ នឹងអាចទទួលយកបាន ព្រមៗគ្នា។
នៅក្រោយ បដិវត្តន៍ពណ៌ ដែលឈានទៅផ្តួលរំលំរបបផ្តាច់ការកាដាហ្វី នៅឆ្នាំ ២០១១ លីប៊ី បានលង់ខ្លួន ទៅក្នុងសង្រ្គាមស៊ីវិល មួយទៀត នៅឆ្នាំ ២០១៤។ គឺ នៅពេលនោះហើយ ដែលលីប៊ី ធ្លាក់ចូលទៅក្នុងអស្ថិរភាពខ្លាំង និងត្រូវបានពុះចែកជាពីរ ដោយមួយផ្នែក គឺខាងភាគខាងកើតប្រទេស ធ្លាក់ទៅក្នុងដៃរបស់ពួកអ៊ីស្លាមជ្រុលនិយម ដែលអះអាងថា ខ្លួន ជាក្រុមបដិវត្តន៍ ផ្តួលរំលំ របបកាដាហ្វី ចំណែកមួយផ្នែកទៀត គឺភាគខាងលិចប្រទេស ស្ថិតនៅក្រោម ការដឹកនាំ របស់ឧត្តមសេនីយ៍ ហាវតារ ដែលគាំទ្រដោយអាមេរិក រុស្ស៊ី អារ៉ាប៊ី សាអូឌីត និងអេហ្ស៊ីប បានលើកបដារ ប្រយុទ្ធវាយប្រហារពួកភេរវជន ចលនាអ៊ីស្លាមជ្រុលនិយម។ ឧត្តមសេនីយ៍ ហាវតារ បានអះអាងថា ខ្លួនបើកការវាយប្រហារ លើរដ្ឋាភិបាល ទីក្រុងទ្រីប៉ូលី ក៏ដោយសារតែរដ្ឋាភិបាសហភាពជាតិលីប៊ី គាំទ្រដោយកម្លាំងទ័ព អ៊ីស្លាមជ្រុលនិយម និងពួកជីហាតអង្គការរដ្ឋអ៊ីស្លាមនេះដែរ។
សង្រ្គាមស៊ីវិល លីប៊ី ដែល សហគមន៍អន្តរជាតិ ឈឺឆ្អាលខ្លាំង និងខ្នះខ្នែងចង់ដោះស្រាយ
ប្រទេសទាំងឡាយ ដែល ឈឺឆ្អាល ចង់ដោះស្រាយ វិបត្តិលីប៊ី ក៏ដោយសារតែ គេឃើញ វិបត្តិនៅលីប៊ី មានប៉ះពាល់ដល់ផលប្រយោជន៍របស់ពួកគេ ទាំងផ្នែកសេដ្ឋកិច្ច ហើយនិងយុទ្ធសាស្រ្តយោធា នៅក្នុងតំបន់ដើមបូព៌ា។
នៅក្នុងករណីរុស្ស៊ី និងតួកគី។ ទោះបីជាប្រទេសទាំងពីរ ចុះសម្រុងគ្នា ក្នុងសង្រ្គាមស៊ីវិលនីស៊ីរី ប៉ុន្តែ រុស្ស៊ី និងតួកគី មានគោលដៅ ផ្សេងគ្នានៅលីប៊ី។ រុស្ស៊ី គាំទ្រ ឧត្តមសេនីយ៍ ហាវតា ដែលប្រយុទ្ធប្រឆាំងនឹងចលនាជីហាតអ៊ីស្លាមជ្រុលនិយម។ ចំណែក តួកគី វិញ ចេញមុខគាំទ្រ រដ្ឋាភិបាលទ្រីប៉ូលី ដែលទទួលស្គាល់ដោយអង្គការសហប្រជាជាតិ ព្រោះតែតួកគីសំឡឹងចង់បានផលប្រយោជន៍ប្រេងនៅក្នុងសមុទ្រ មេឌីទែរ៉ាណេ បន្ទាប់ពីចុះកិច្ចព្រមព្រៀងជាមួយរដ្ឋាភិបាល លីប៊ី ខាងកើត ក្នុងរឿងព្រំដែនទឹកសមុទ្រ។
ទោះជារុស្ស៊ី និងតួកគីមាននយោបាយផ្ទុយគ្នា ដោយសារតែគាំទ្រ គូបដិបក្ខពីរផ្សេងគ្នា នៅលីប៊ី ប៉ុន្តែ ម៉ូស្គូ និងអង់ការ៉ា មានយុទ្ធសាស្រ្តដូចគ្នាមួយ នោះគឺចង់បញ្ជៀស យុទ្ធសាស្រ្តយោធារបស់អាមេរិក នៅក្នុងទឹកដីលីប៊ី។ ដោយសារតែហេតុផលនឹងហើយ បានជាទាំងរុស្ស៊ី និងតួកគីបានអំពាវនាវឲ្យភាគីជម្លោះលីប៊ី ដែលខ្លួន គាំទ្រនៅលីប៊ី ប្រកាសបទឈប់បាញ់។
ងាកមកនិយាយអាល្លឺម៉ង់ បណ្តាប្រទេសអឺរ៉ុបផ្សេងទៀត ដែលមានបារាំងផងដែរ ចង់ណាស់ ចង់ឲ្យជម្លោះប្រដាប់អាវុធ បិទបញ្ចប់នៅលីប៊ី ក្នុងទិសដៅ កាត់បន្ថយ ការជួញដូរជនអន្តោប្រវេសន៍មកអឺរ៉ុប ហើយនិង ដើម្បី សម្រាលភាពតានតឹងរវាងប្រទេសសមាជិកសហភាព អឺរ៉ុប ដូចជាអ៊ីតាលី និងបារាំងជាដើម ដែលបានដំឡើងសរសៃ ក ដាក់គ្នាដោយសារតែ ជម្លោះផលប្រយោជន៍ ដែលបានមកពីវិបត្តិនៅលីប៊ី ជាពិសេស ក្នុងវិបត្តិគ្រប់គ្រងលំហូរជនអន្តោប្រវេសន៍មកអឺរ៉ុប ដែលនៅក្នុងនោះ អ៊ីតាលី អះអាងថា ខ្លួនប្រឈមខ្លាំង ជាងគេ បើប្រៀបធៀបនឹងប្រទេសអឺរ៉ុបផ្សេងទៀត។ អ៊ីតាលី បានបញ្ចុះបញ្ចូលរដ្ឋាភិបាលលីប៊ី ខាងកើត ដើម្បី ជួយទប់ស្កាត់កុំឲ្យឈ្មួញជួញដូរមនុស្សយកទឹកដីលីប៊ី ជាច្រកដឹកនាំមនុស្សចូលទឹកដីអឺរ៉ុប៕
(ដកស្រង់ព័ត៌មានពីAFP)
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ