ស៊ូដង់ធ្លាក់ក្នុងអំពើហិង្សា និងកាត់ផ្តាច់ ជាថ្មី ពីពិភពលោកខាងក្រៅ
ពីរខែក្រោយរដ្ឋប្រហារយោធានិងការបង្ក្រាបយ៉ាងខ្លាំងក្លាស្លាប់មនុស្សអស់ប្រមាណ៤៨នាក់មក បាតុករស៊ូដង់រាប់សិបពាន់នាក់បានរងការបង្ក្រាបយ៉ាងហិង្សាជាថ្មី នៅថ្ងៃសៅរ៍ទី២៥ធ្នូនេះ។ អាជ្ញាធរស៊ូដង់បានកាត់ផ្តាច់អស់នូវប្រព័ន្ធទូរគមនាគមន៍ទាំងឡាយ មានជាអាទិ៍ ប្រព័ន្ធអ៊ីនធ័រនែត ប្រព័ន្ធទូរស័ព្ទ។
ចុះផ្សាយនៅថ្ងៃ៖
ស្តាប់ - ០១:៣២
បាតុករបានប្រមូលផ្តុំគ្នាទៅដល់មុខវិមានប្រធានាធិបតី ដែលមេដឹកនាំយោធាធ្វើរដ្ឋប្រហារកំពុងកាន់កាប់ទៅហើយ តែត្រូវបានកងកម្លាំងប៉ូលិសបំបែកយ៉ាងហិង្សា។ កងកម្លាំងប៉ូលិស បានបាញ់ និងតាមគប់គ្រាប់បែកបង្ហូរទឹកភ្នែក ដល់មន្ទីរពេទ្យ និងក្រុមគ្រូពេទ្យដែលមកជួយសង្គ្រោះបាតុកររងរបួសផង។ នេះបើតាមការរៀបរាប់របស់អ្នកកាសែតAFP នៅផ្ទាល់កន្លែងកើតហេតុ។
ការបង្ក្រាបមានភាពហិង្សាខ្លាំង និងអបដោយការលួចប្លន់បំផ្លិចបំផ្លាញទីស្នាក់ការស្តុកសម្ភារៈបរិក្ខារ និងគ្រឿងឧបភោគបរិភោគ របស់អង្គការសហប្រជាជាតិសម្រាប់ជនស៊ីវិលស៊ូដង់ទៀត។ បើតាមអ្នកនាំពាក្យរបស់អគ្គលេខាធិការរងអង្គការសហប្រជាជាតិ សុវត្ថិភាពរបស់បុគ្គលិកអង្គការសហប្រជាជាតិកំពុងស្ថិតក្នុងការគំរាមកំហែងខ្លាំងណាស់។
អាជ្ញាធរយោធាស៊ូដង់ បានប្រើមធ្យោបាយ និងបង្ក្រាបទ្រង់ទ្រាយធំមួយបន្ថែមទៀតនៅថ្ងៃនេះ គឺបានកាត់ផ្តាច់ ស៊ូដង់ពីពិភពលោកខាងក្រៅ។ តាំងពីព្រឹក រាល់គ្រប់បណ្តាញនិងប្រព័ន្ធទូរគមនាគមន៍ អ៊ីនធ័រនែត ទូរស័ព្ទ ត្រូវបានកាត់ផ្តាច់ទាំងអស់។ ប៉ុន្តែទោះជាយ៉ាងដូច្នេះក្តី ក៏ហានិភ័យខ្លាចមានផ្ទុះអំពើហិង្សានៅខ្ពស់ខ្លាំង។ ការប៉ះទង្គិចហិង្សា អាចកើតឡើងនៅស្ទើរគ្រប់ទិសទីក្នុងផ្ទៃប្រទេស ព្រោះក្រៅអំពីការដង្ហែក្បួនបាតុកម្មនៅរដ្ឋធានី ខាទុំ គេក៏សង្កេតឃើញមានបាតុកម្មនៅភាគខាងត្បូង ខាងកើត និងខាងជើងនៃប្រទេសទៀត។
បាតុករបានសន្យាចុះធ្វើបាតុកម្មធំជាថ្មីនៅថ្ងៃទី ៣០ធ្នូខាងមុខដើម្បីជំរុញឱ្យមេដឹកនាំយោធា ដឹកនាំធ្វើរដ្ឋប្រហារកាលពីពីរខែមុន បង្កើតរដ្ឋាភិបាលស៊ីវិល។ លក្ខខណ្ឌចាំបាច់ដែលអន្តរជាតិដាក់តម្រូវជាថ្នូរនឹងជំនួយមនុស្សធម៌ ដ៏ចាំបាច់សម្រាប់រស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ