ស៊ូដង់៖ការប្រកាសលាចុះពីតំណែងរបស់នាយករដ្ឋមន្រ្តីស៊ីវិលបានធ្វើឲ្យវិបត្តិនយោបាយអូសបន្លាយ
នៅក្នុងប្រទេសស៊ូដង់ នាយករដ្ឋមន្រ្តីស៊ីវិលលោកអាប់ដាឡា ហាំដុកបានប្រកាសលាចុះពីតំណែងនាយប់ថ្ងៃអាទិត្យ ទី២ មករា។ ការប្រកាសលាចុះពីតំណែងរបស់លោកហាំដុកបានធ្វើឡើង ខណៈដែលពលរដ្ឋស៊ូដង់កំពុងបន្តធ្វើបាតុកម្មប្រឆាំងនឹងកងទ័ព។ ជាក់ស្តែង មានមនុស្សយ៉ាងតិច ៣នាក់ទៀតបានស្លាប់នៅក្នុងក្បួនបាតុកម្មក្នុងថ្ងៃអាទិត្យ ទី២ មករា។ គួរបញ្ជាក់ថា លោកហាំដុកត្រូវបានកងទ័ពទម្លាក់ពីអំណាចក្នុងថ្ងៃទី២៥ តុលា ឆ្នាំ ២០២១ និងត្រូវបានកងទ័ពប្រគល់អំណាចឲ្យវិញក្នុងថ្ងៃទី២១ វិច្ឆិកា ឆ្នាំ ២០២១ ដដែល។
ចុះផ្សាយនៅថ្ងៃ៖
ស្តាប់ - ០២:០៥
គឺតាមរយៈសុន្ទរកថាលើកញ្ចក់ទូរទស្សន៍ដែលនាយករដ្ឋមន្រ្តីស៊ីវិលលោកអាប់ដាឡា ហាំដុកបានប្រកាសលាចុះពីតំណែង។ នៅក្នុងសុន្ទរកថា លោកហាំដុកបានពន្យល់ពីមូលហេតុដែលបានបង្ខំឲ្យលោកដើរចេញពីតំណែងដោយខ្លួនឯង។ តាមលោកហាំដុក ជម្លោះហែកហួរផ្ទៃក្នុងរវាងក្រុមស៊ីវិល និងក្រុមយោធាជាមូលហេតុតែមួយគត់នៃការលាចុះពីតំណែងរបស់លោក។ តាមពិតទៅ ការចុះចេញពីតំណែងរបស់លោកហាំដុកពេលនេះមិនបានធ្វើឲ្យពលរដ្ឋស៊ូដង់ភ្ញាក់ផ្អើលឡើយ។ មិនភ្ញាក់ផ្អើល ព្រោះលោកធ្លាប់បានព្រមានច្រើនដងពីការចាកពីកិច្ចព្រមព្រៀងនយោបាយដែលលោកបានចុះហត្ថលេខាជាមួយរបបសឹកដឹកនាំដោយឧត្តមសេនីយអាប់ឌែល ហ្វាតា ប៊ូរ៉ាន។
គួររម្លឹកថា គឺរូបឧត្តមសេនីយប៊ូរ៉ានដែលបានធ្វើរដ្ឋប្រហារទម្លាក់លោកហាំដុកពីអំណាចក្នុងថ្ងៃទី២៥ តុលា ឆ្នាំ ២០២១។ នៅមួយខែក្រោយមក ពោលក្នុងថ្ងៃទី២១ វិច្ឆិកា គឺរូបឧត្តមសេនីយដដែលនេះដែលបានប្រគល់អំណាចឲ្យលោកហាំដុកវិញតាមរយៈកិច្ចព្រមព្រៀងនយោបាយមួយ។ តែបញ្ហានៅត្រង់ថា លោកហាំដុកពិបាករកឥស្សរជនស៊ីវិលឲ្យចូលរួមជាមួយលោកដើម្បីរៀបចំបង្កើតរដ្ឋាភិបាលថ្មី។ មួយវិញទៀត ក្រុមបាតុករដែលបានប្រឆាំងនឹងរបបសឹកតាំងពីថ្ងៃដំបូងបានមើលឃើញថា ទង្វើបោះដៃរករបបសឹករបស់លោកហាំដុកជាទង្វើក្បត់ជាតិ និងជាការក្បត់ឧត្តមគតិរបស់ពលរដ្ឋស៊ូដង់។
អ៊ីចឹងហើយបានជាមកដល់សព្វថ្ងៃ ក្រុមបាតុករ ពិសេសក្រុមអ្នកបដិវត្តកំពុងបន្តធ្វើបាតុកម្មប្រឆាំងនឹងរបបសឹក ទោះត្រូវបានរងការវាយបង្រ្កាបយ៉ាងហិង្សាក៏ដោយ។ គិតត្រឹមថ្ងៃអាទិត្យ ទី២ មករា បាតុកម្មបានបណ្តាលឲ្យមានមនុស្សស្លាប់ប្រមាណជា ៥០នាក់។ អ្វីដែលច្បាស់នៅពេលនេះ ស៊ូដង់ដែលជាប្រទេសអាហ្រ្វិកធំនៅអាហ្រ្វិកខាងកើត និងជាប្រទេសក្រខ្លាំងជាងគេមួយលើលោកហាក់ពិបាកគេចផុតពីឥទ្ធិពលរបស់កងទ័ព។ តាំងពីទទួលបានឯករាជ្យ កងទ័ពបានកាច់ចង្កូតប្រទេសសឹងតែគ្រប់ពេល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ