ចិន-អាហ្រ្វិក៖ប្រមុខការទូតចិនលោកវ៉ាង យីបំពេញទស្សនកិច្ចមួយជុំទ្វីបអាហ្រិ្វក
នៅថ្ងៃអង្គារ ទី៤ មករា ប្រមុខការទូតចិនលោកវ៉ាង យីផ្តើមទស្សនកិច្ចមួយជុំទ្វីបអាហ្រ្វិករយៈពេល ៤ថ្ងៃនៅក្នុង ៣ប្រទេស គឺអេរីត្រេ កេនយ៉ា និងប្រទេសកូម័រ។ កាលពីជាង ១ខែមុន លោកវ៉ាង យីបានធ្វើដំណើរទៅកាន់ទ្វីបអាហ្រ្វិកម្តងដើម្បីចូលរួមនៅក្នុងជំនួបកំពូលអាហ្រ្វិក ចិនរៀបចំក្នុងប្រទេសសេណេហ្កាល់។ កម្មវត្ថុនៃដំណើរទស្សនកិច្ចលើកទី២ នេះ គឺពង្រឹងកិច្ចសហប្រតិបត្តិការក្នុងវិស័យសេដ្ឋកិច្ច បច្ចេកវិទ្យា និងយោធា។ តែនៅក្នុងបរិបទជំងឺកូវីដ១៩ កិច្ចសហប្រតិបត្តិការក្នុងរឿងវ៉ាក់សាំងបង្ការកូវីដ១៩ ជាប្រធានបទមិនអាចខ្វះបាន។
ចុះផ្សាយនៅថ្ងៃ៖
ស្តាប់ - ០១:៤៣
គេនៅចាំបានមិនភ្លេចនាឱកាសជំនួបកំពូលចិន អាហ្រ្វិកក្នុងប្រទេសសេណេហ្កាល់នាខែវិច្ឆិកាឆ្នាំ ២០២១ ប្រធានាធិបតីចិនលោកស៊ី ជីនពីងបានសន្យាផ្តល់វ៉ាក់សាំងបង្ការកូវីដ១៩ ចំនួន ១ ០០០លានដូសបន្ថែមទៀតឲ្យអាហ្វ្រិក ក្នុងនោះ មាន ៦០០លានដូសជាអំណោយ។ ដូច្នេះតាមរយៈដំណើរទស្សនកិច្ចរបស់ប្រមុខការទូតចិនលោកវ៉ាង យីនៅទ្វីបអាហ្រ្វិកពេលនេះ ចិនចង់បង្ហាញពីការមិនភ្លេចពាក្យសន្យារបស់ខ្លួនទេ។ លោកវ៉ាង យីបានថ្លែងប្រាប់ទីភ្នាក់ងារសារព័ត៌មានចិនស៊ីនហួរថា ជំនួយវ៉ាក់សាំងរបស់ចិននឹងធ្វើឡើងតាមរយៈការផ្ទេរបច្ចេកវិទ្យា និងការបង្កើតរោងចក្រផលិតវ៉ាក់សាំងរួមគ្នានៅអាហ្រ្វិក។
បំណងប្រាថ្នានេះជាការចង់បានរបស់មន្រ្តីអាហ្រ្វិកមួយចំនួននៅក្នុងសន្និសីទអនឡាញជាមួយលោកវូ ប៉េង ប្រធាននាយកដ្ឋានទទួលបន្ទុកកិច្ចការអាហ្រ្វិកនៅក្នុងក្រសួងការបរទេសចិន។ លោកវូ ប៉េង៖ « យើងមានកិច្ចសហប្រតិបត្តិការក្នុងការផលិតកម្មវ៉ាក់សាំងជាមួយប្រទេសអេហ្ស៊ីប ម៉ារ៉ុក និងអាល់ហ្សេរី ហើយយើងកំពុងចរចាជាមួយប្រទេសនីហ្សេរីយ៉ាលើបញ្ហានេះ។ ពិតណាស់ យើងយកចិត្តទុកដាក់លើសំណើមកពីបណ្តាប្រទេសផ្សេងទៀតនៅអាហ្រ្វិកសាហារ៉ា។ តែនេះមិនអាស្រ័យលើឆន្ទៈរបស់យើងតែម្នាក់ទេ។ ប្រទេសទាំងនេះក៏ត្រូវមានសមត្ថភាពឧស្សាហកម្មក្នុងការផលិតវ៉ាក់សាំងដែរ »។
ទាក់ទងនឹងយុទ្ធនាការចាក់វ៉ាក់សាំង សហភាពអាហ្រ្វិកបានកំណត់គោលដៅចាក់វ៉ាក់សាំងលើទ្វីបអាហ្រ្វិកឲ្យបាន ៦០% ពីពេលនេះទៅដំណាច់ឆ្នាំ ២០២២ ពិសេសការប្រើវ៉ាក់សាំងរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ