ចិនសន្យាបើកទំព័រសករាជថ្មីជាមួយប្រទេសអាហ្រ្វិកនៅក្នុងជំនួបកំពូលចិន អាហ្រ្វិក
ប្រទេសចិន និងអាហ្រ្វិកបានបើកជំនួបកំពូលនាថ្ងៃអាទិត្យ ទី២៨ វិច្ឆិកា និងត្រូវបន្តរហូតដល់ថ្ងៃអង្គារ ទី៣០ វិច្ឆិកាក្នុងទីក្រុងដាការ ប្រទេសសេណេហ្កាល់។ ចិនបានបញ្ជូនរដ្ឋមន្រ្តីក្រសួងពាណិជ្ជកម្ម និងក្រសួងការបរទេសឲ្យទៅចូលរួមផ្ទាល់ ហើយប្រធានាធិបតីចិនលោកស៊ី ជីនពីងចូលរួមតាមអនឡាញ។ ពាណិជ្ជកម្ម និងសន្តិសុខជាប្រធានបទស្នូលនៃជំនួបកំពូលចិន អាហ្រ្វិកពេលនេះ។ អ្វីជាការកត់សម្គាល់ ជំនួបកំពូលនេះបានធ្វើឡើង ប៉ុន្មានថ្ងៃក្រោយពីចិនបានចេញផ្សាយសៀវភៅ ស មួយស្តីពីយុទ្ធសាស្រ្តថ្មីរបស់ចិននៅទ្វីបអាហ្រ្វិក។
ចុះផ្សាយនៅថ្ងៃ៖
ស្តាប់ - ០២:១៤
នៅក្នុងសៀវភៅ ស រដ្ឋាភិបាលក្រុងប៉េកាំងបានលំអិតពីសកម្មភាព និងមហិច្ឆតារបស់ខ្លួនសម្រាប់ទ្វីបអាហ្រ្វិកដោយលើកឡើងពីការបើកទំព័រសករាជថ្មីដែលផ្អែកលើសមភាព។ អ្វីដែលចិនចង់និយាយនៅត្រង់ចំណុចនេះ គឺកិច្ចសហប្រតិបត្តិការប្រកបដោយភាពស្មោះត្រង់ មិត្តភាព មានលទ្ធផលជាក់ស្តែង និងមានគំនិតល្អ។ ការលើកឡើងរបស់ចិននេះជាចម្លើយតបនឹងការលេចឡើងនូវសញ្ញាខកចិត្តមួយចំនួននារយៈពេលប៉ុន្មានឆ្នាំចុងក្រោយនៅក្នុងប្រទេសអាហ្រ្វិកខ្លះតាមរូបបាតុកម្មប្រឆាំងនឹងពលរដ្ឋចិន។
គួរបញ្ជាក់ថា វិនិយោគរបស់ចិននៅអាហ្រ្វិកផ្តោតពិសេសលើវិស័យឧស្សាហកម្ម សំណង់ និងដឹកជញ្ជូន។ តាមរដ្ឋអំណាចក្រុងប៉េកាំង ទឹកប្រាក់វិនិយោគរបស់ចិននៅអាហ្រ្វិកតាមរយៈក្រុមហ៊ុនចិននាដំណាច់ឆ្នាំ ២០២០មានទឹកប្រាក់ចំនួន ៤៣ ០០០លានដុល្លារ។ អ្នកនាំពាក្យក្រសួងការបរទេសចិនបានថ្លែងក្នុងថ្ងៃសុក្រ ទី២៦ វិច្ឆិកាថា មានផ្លូវដែកប្រវែងជាង ១០ ០០០គីឡូម៉ែត្រត្រូវបានចិនកសាងថ្មី ឬជួសជុលឡើងវិញ និងមានផ្លូវថ្នល់ប្រវែង ១០០ ០០០គីឡូម៉ែត្រ។
តែអ្វីដែលគេមិនអាចមិននិយាយបាន គឺប្រាក់កម្ចីដែលចិនឲ្យប្រទេសអាហ្រ្វិកខ្ចី។ តាម China africa research initiative មានទឹកប្រាក់ចំនួន ១៥៣ ០០០លានអឺរ៉ូត្រូវបានចិនឲ្យអាហ្រ្វិកខ្ចីក្នុងចន្លោះឆ្នាំ ២០០០ និងឆ្នាំ ២០១៩។ ចំណែកប្រាក់បំណុលដែលប្រទេសអាហ្រ្វិកនីមួយៗកំពុងជំពាក់ចិនមានចំនួនមិនដូចគ្នាទេ។ មួយវិញទៀតនារយៈពេលប៉ុន្មានខែចុងក្រោយ រដ្ឋាភិបាលចិនបានយល់ព្រមលុបចោល និងពិនិត្យមើលឡើងវិញលើប្រាក់បំណុលរបស់ប្រទេសអាហ្រ្វិកមួយចំនួន។
ទោះជាយ៉ាងនេះក្តី ក្រុមអ្នកសង្កេតការណ៍បានលើកឡើងពីអន្ទាក់ប្រាក់បំណុលរបស់ចិនដែលមានប្រទេសអាហ្រ្វិកខ្លះគ្មានលទ្ធភាពសងចិន និងត្រូវបានចិនគំរាមរឹបអូសហេដ្ឋារចនាសម្ព័ន្ធដើម្បីទូទាត់។ តែក្រៅពីពាណិជ្ជកម្មដែលជាវិស័យស្នូលនៃកិច្ចសហប្រតិបត្តិចិន អាហ្រ្វិក ជំនួបកំពូលចិន អាហ្រ្វិកពេលនេះមិនភ្លេចផ្តោតលើវិស័យសុខាភិបាល ពិសេសយុទ្ធនាការប្រឆាំងនឹងជំងឺកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ