តើអ្វីខ្លះជាការរារាំងការប្រយុទ្ធប្រឆាំងនឹងជំងឺគ្រុនចាញ់នៅអាហ្វ្រិក ?
ថ្ងៃទី ២៥មេសា ជាទិវាពិភពលោកប្រយុទ្ធប្រឆាំងនឹងជំងឺគ្រុនចាញ់។ ជំងឺគ្រុនចាញ់នៅតែជាភ្នាក់ងារសម្លាប់មនុស្សជាពិសេសកុមារអាហ្វ្រិក ទ្រង់ទ្រាយធំដដែល (៦សែនបីម៉ឺននាក់ក្នុងឆ្នាំ២០២០)។ នេះបើតាមតួលេខផ្តល់ដោយអង្គការសុខភាពពិភពលោក ដែលបញ្ជាក់ថា ករណីគ្រុនចាញ់សរុបលើពិភពលោកនៅឆ្នាំ២០២១ មានចំនួនដល់ទៅជិត២៤០លាននាក់។ ចំណែកមធ្យោបាយទប់ស្កាត់ជំងឺមានច្រើន និងមានទាំងថ្នាំបង្ការទៀត ប៉ុន្តែហេតុអ្វីបានជាអាហ្វ្រិកនៅតែមិនអាចយកឈ្នះជំងឺគ្រុនចាញ់បាន ?
ចុះផ្សាយនៅថ្ងៃ៖
ស្តាប់ - ០២:០៦
ប្រជាពលរដ្ឋលើភពផែនដីចំនួនពាក់កណ្តាលរស់ប្រឈមនឹងហានិភ័យកើតជំងឺគ្រុនចាញ់។ តំបន់មេឌីទែរ៉ាណេ ប៉ាស៊ីហ្វិក អាមេរិក និងអាស៊ីអាគ្នេយ៍ សុទ្ធសឹងជាតំបន់ងាយរកគ្រោះ។ ដោយហេតុកូវីដ ករណីគ្រុនចាញ់បានកើនឡើង១២%។ ហើយនៅឆ្នាំ២០២១ ចិនបានប្រកាសលុបបំបាត់ជំងឺគ្រុនចាញ់បានទាំងស្រុងជាផ្លូវការ។ នៅឡើយតែទ្វីបអាហ្វ្រិកដែលបន្តរងគ្រោះខ្លាំង ពោលគឺតំណាងឱ្យ៩៥%នៃករណីកើតនិងស្លាប់ដោយគ្រុនចាញ់សរុប។ ហេតុអ្វី ?
មធ្យោបាយប្រយុទ្ធប្រឆាំងនឹងជំងឺគ្រុនចាញ់មានច្រើន ៖ មុងជ្រលក់ថ្នាំប្រឆាំងគ្រុនចាញ់ ថ្នាំបណ្តេញមូស ថ្នាំការពារស្ត្រីមានផ្ទៃពោះ និងកុមារ ថ្នាំលេបសម្រាប់ព្យាបាលជំងឺ ...តែមិនបានទៅដល់អាហ្រ្វិកគ្រប់គ្រាន់។ ថ្នាំបង្ការ មានប្រសិទ្ធភាព៣០% ដែលនឹងក្លាយជាអាវុធថ្មីមួយបន្ថែមទៀត នឹងត្រូវចែកចាយជូនពលរដ្ឋអាហ្វ្រិកក្នុងពេលខាងមុខ។ នៅឆ្នាំ ខាងមុខ ពិភពលោកនឹងមានថ្នាំការពារជំងឺគ្រុនចាញ់ មួយទៀត ដែលមានប្រសិទ្ធភាពខ្ពស់ និងបច្ចេកវិទ្យាទប់ស្កាត់មូស ដែលជាភ្នាក់ងារចម្លងមេរោគគ្រុនចាញ់។
ទោះមានភាពជឿនលឿនយ៉ាងនេះក្តី ក៏យុទ្ធនាការប្រយុទ្ធប្រឆាំងនឹងជំងឺគ្រុនចាញ់ នៅអាហ្វ្រិកត្រូបប្រឈមឧបសគ្គច្រើនផ្សេងទៀត។ ទីមួយ គឺការលេចឡើងនូវភាពស៊ាំនឹងថ្នាំព្យាបាលជំងឺគ្រុនចាញ់ Artémisinine នៅអ៊ូហ្កង់ដា រវ៉ាន់ដា និងតំបន់ស្នែងអាហ្វ្រិក។ អង្គការសុខភាពពិភពលោកកំពុងខិតខំធ្វើយ៉ាងណាកុំឱ្យស៊ាំនឹងថ្នាំ រីករាលដល់បណ្តាប្រទេសផ្សេងលើទ្វីបអាហ្វ្រិក។ អង្គការសុខភាពពិភពលោកបានប្រកាសអំពីការគំរាមកំហែងទីពីរ ទាក់ទងការវិនិច្ឆ័យរោគសញ្ញា។ ដោយហេតុតែប៉ារ៉ាស៊ីគ្រុនចាញ់ខ្លះបានបំប្លែងខ្លួន ការធ្វើតេស្តរកជំងឺគ្រុនចាញ់ចាប់លែងបាន។ សត្វមូស ក៏ធ្វើការវិវឌ្ឍដែរ។ មូសខ្លះលែងខ្លាចថ្នាំ ឬស៊ាំនឹងថ្នាំជ្រលក់លើមុង។ ជាចុងក្រោយ មូសប្រភេទAnophele stephensi ដែលមានប្រភពនៅអាស៊ី និងបានធ្វើដំណើរមកដល់ប្រទេសDjibouti អាហ្វ្រិកប៉ែកខាងកើត កាលពី១០ឆ្នាំមុន កំពុងពង្រីកវត្តមាននៅប្រទេសផ្សេងៗទៀត ដូចជា អេត្យូពី ស៊ូដង់ ឬសូម៉ាលី។ មូសប្រភេទនេះ ចូលចិត្តរស់នៅក្នុងក្រុង។ ដូច្នេះបើតាមអង្គការសុខភាពពិភពលោក ហានិភ័យជួបគ្រោះរាតត្បាតជំងឺគ្រុនចាញ់នៅតាមក្រុងអាហ្វ្រិកបានកើនឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ