អសបគោរពវិញ្ញាណក្ខន្ធទាហានមួកខៀវ ស្លាប់ក្នុងបាតុកម្មប្រឆាំង នៅកុងហ្គោ
បាតុកម្មប្រឆាំងវត្តមានកងទ័ពមួកខៀវ មិនបានចុះថមថយ នៅសាធារណរដ្ឋប្រជាធិបតេយ្យកុងហ្គោ។ នៅថ្ងៃចន្ទទី ១សីហា ប៉ូលិសបាញ់ផ្សែងបង្ហូរទឹកភ្នែក ចំណែក ទាហានបានបាញ់គ្រាប់កាំភ្លើង ដើម្បីបង្អើល បំបែកក្រុមបាតុករ ដែលបានសម្រុកចូលកាន់តែជិតទីស្នាក់ការរបស់បេសកកម្មអង្គការសហប្រជាជាតិ នៅភាគខាងកើតប្រទេសកុងហ្គោ។ នៅថ្ងៃចន្ទដដែល អគ្គលេខាធិការរងរបស់អង្គការសហប្រជាជាតិ និងសមាជិករបស់បេសកកម្មរបស់អង្គការសហប្រជាជាតិ ចូលរួមគោរពវិញ្ញាណក្ខន្ធរបស់កងទ័ពរក្សាសន្តិភាព ៥នាក់ របស់អង្គការសហប្រជាជាតិ ដែលត្រូវបានគេសម្លាប់នៅក្នុងអំឡុងបាតុកម្មប្រឆាំង បេសកកម្មរបស់អង្គការសហប្រជាជាតិនៅកុងហ្គោ។
ចុះផ្សាយនៅថ្ងៃ៖
ស្តាប់ - ០២:៤០
មួយសប្តាហ៍ក្រោយបាតុកម្មប្រឆាំងដ៏ហិង្សា នៅសាធារណរដ្ឋប្រជាធិបតេយ្យកុងហ្គោ អគ្គលេខាធិការរង អង្គការសហប្រជាជាតិ និងសមាជិករបស់បេសកកម្មអង្គការសហប្រជាជាតិ នៅកុងហ្គោ ហៅកាត់ថា Monusco បានធ្វើពិធីបុណ្យរំលឹកវិញ្ញាណក្ខន្ធកងទ័ពមួកខៀវ៥នាក់ ដែលបានបាត់បង់ជីវិតនៅកុងហ្គោ។
នៅថ្ងៃអង្គារ សប្តាហ៍មុន ទាហានមួកខៀវជាតិម៉ារ៉ុក និងប៉ូលិសអង្គការសហប្រជាជាតិ ជាតិឥណ្ឌា២នាក់ ត្រូវគេសម្លាប់ ចំណែកបាតុករ៩នាក់ស្លាប់ នៅក្នុងអំឡុងបាតុកម្មប្រឆាំងនឹងវត្តមានកងទ័ពរក្សាសន្តិភាពរបស់អង្គការសហប្រជាជាតិនៅសាធារណរដ្ឋប្រជាធិបតេយ្យកុងហ្គោ។ នៅមួយថ្ងៃក្រោយ វរសេនីយ៍ក្រុមមួកខៀវម្នាក់ ស្លាប់ក្នុងគ្រោះថ្នាក់ មិនដឹងមូលហេតុ ចំណែកទាហានមួកខៀវជាតិម៉ារ៉ុកម្នាក់ទៀត ស្លាប់នៅក្នុងពេលជួយកងទ័ពរដ្ឋាភិបាលកុងហ្គោក្នុងសមរភូមិប្រយុទ្ធប្រឆាំងនឹងពួកឧទ្ទាម។
នៅថ្ងៃចន្ទ ពិធីគោរពវិញ្ញាណក្ខន្ធទាហានមួកខៀវ នៅទីស្នាក់ការរបស់Monusco នៅទីក្រុងGoma ធ្វើឡើងដោយគ្មានវត្តមានរបស់មន្រ្តីរដ្ឋាភិបាលកុងហ្គោ។ សម្រាប់ប្រធានបេសកកម្មMonusco គេត្រូវប្រយ័ត្នប្រយែងចំពោះហេតុផលដ៏គ្មានមូលដ្ឋាន ដែលបានជំរុញឲ្យមានការស្អប់ ក្រុមមួកខៀវ នៅកុងហ្គោ។ វាជាមេរៀនសម្រាប់ក្រុមមួកខៀវធ្វើការជាមួយអាជ្ញាធរកុងហ្គោ។
បេសកកម្មរបស់អង្គការសហប្រជាជាតិចាប់មានវត្តមាននៅសាធារណរដ្ឋប្រជាធិបតេយ្យកុងហ្គោ នៅឆ្នាំ ១៩៩៩ ដើម្បីធានារក្សាសន្តិភាព និងបង្រ្កាបក្រុមប្រដាប់អាវុធ ជាង ១២០ដែលសកម្មខ្លាំងនៅភាគខាងកើតកុងហ្គោ។ ប៉ុន្តែ ចាប់តាំងពីឆ្នាំ ២០១៩ បេសកកម្មរបស់ក្រុមមួកខៀវ នៅកុងហ្គោបានធ្លាក់ប្រជាប្រិយភាព បន្ទាប់ពីប្រជាជនកុងហ្គោចោទប្រកាន់ទាហានរបស់អង្គការសហប្រជាជាតិថា គ្មានសមត្ថភាពការពារប្រជាជនពីការវាយប្រហាររបស់ពួកឧទ្ទាម M23ដែលគាំទ្រដោយរដ្ឋាភិបាលរវ៉ាន់ដា។
នៅថ្ងៃ ចន្ទ ទោះមានការបង្រ្កាបរបស់ទាហាននិងប៉ូលិសកុងហ្គោ បាតុករ ដែលដឹកនាំដោយចលនាតស៊ូដើម្បីប្រជាធិបតេយ្យ និងការផ្លាស់ប្តូរ បានបោះតង់ និងសន្យាធ្វើបាតុកម្មរហូតដល់ក្រុមទាហានមួកខៀវដែលពួកគេចាត់ទុកជាពួកទេសចរ ចាកចេញពីកុងហ្គោ។ សម្រាប់បាតុករ ប្រជាជនកុងហ្គោកំពុងស្ថិតនៅចំពោះកងកម្លាំងអង្គការសហប្រជាជាតិ ដែលមានមធ្យោបាយហិរញ្ញវត្ថុ មធ្យោបាយយោធា ដើម្បីបិទបញ្ចប់សកម្មភាពរបស់ពួកឧទ្ទាមប្រដាប់អាវុធ។ ប៉ុន្តែ ទាហានមួកខៀវ មិនបានប្រើមធ្យោបាយរបស់ខ្លួនទេ។ បើតាមក្រុមបាតុករកុងហ្គោល បាតុកម្មនៅប៉ុន្មានថ្ងៃមកនេះ បានបង្ហាញថា កងទ័ពរក្សាសន្តិភាពរបស់អង្គការសហប្រជាជាតិបានលើកដៃបាញ់សម្លាប់បាតុករ ជាជាងចេញទៅប្រយុទ្ធប្រឆាំងនឹងក្រុមឧទ្ទាម។
នៅថ្ងៃអាទិត្យ អគ្គលេខាធិការអង្គការសហប្រជាជាតិបានបញ្ជាឲ្យគេស៊ើបអង្កេតជាបន្ទាន់ នៅក្រោយក្រុមទាហានមួកខៀវ ដែលត្រលប់មកពីប្រទេសអ៊ូហ្កង់ដា បាញ់សម្លាប់មនុស្ស ២នាក់ និងធ្វើឲ្យរបួសជាច្រើននាក់ នៅព្រំដែនអ៊ូហ្កង់ដា និងកុងហ្គោ។ មន្រ្តីរបស់Monuscoបានអះអាងថា កំពុងបើកការស៊ើបអង្កេត និងបានចាប់ឃាត់ខ្លួនជនល្មើសដែលបានបាញ់សម្លាប់មនុស្សដោយគ្មានមូលហេតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ