តើក្រុមណាជាអ្នកធ្វើឃាតឯកអគ្គរដ្ឋទូតអ៊ីតាលី នៅសាធារណរដ្ឋកុងហ្គោ ?
អាជ្ញាធរកុងហ្កោបានចាត់ទុកការវាយប្រហារនៅថ្ងៃចន្ទទី ២២កុម្ភៈម្សិលមិញ ដែលបានធ្វើឱ្យឯកអគ្គរដ្ឋទូតអ៊ីតាលី ប្រចាំសាធារណរដ្ឋកុងហ្គោ ស្លាប់បាត់បង់ជីវិត ជាទង្វើភេរវកម្ម របស់ពួកឧទ្ទាមហ៊ូទូនៃកងកម្លាំងប្រជាធិបតេយ្យរំដោះរវ៉ាន់ដា។ ប៉ុន្តែនៅថ្ងៃនេះពួកឧទ្ទាមរវ៉ាន់ដា បានបដិសេធ ហើយងាកមកចង្អុលមុខថាក្រុមយោធាកុងហ្កោ និងយោធារវ៉ាន់ដាវិញ។
ចុះផ្សាយនៅថ្ងៃ៖
ស្តាប់ - ០២:១១
ប្រតិកម្មបានធ្លាក់មកកាន់តែច្រើន ក្រោយមរណភាពរបស់ឯកអគ្គរដ្ឋទូតអ៊ីតាលីប្រចាំសាធារណរដ្ឋប្រជាធិបតេយ្យកុងហ្គោ និងអង្គរក្ស ព្រមទាំងអ្នកបើកបរជាបុគ្គលិកកម្មវិធីស្បៀងអាហារពិភពលោក នៅថ្ងៃទី ២២កុម្ភៈ ក្នុងហេតុការណ៍វាយប្រហារមួយ។
បើតាមអាជ្ញាធរកុងហ្គោ ឯកអគ្គរដ្ឋទូតអ៊ីតាលី បានស្លាប់នៅពេលកងកម្លាំងរក្សាសន្តិសុខកុងហ្គោ ទៅរំដោះក្បួនប្រតិភូពីការប៉ុនប៉ងចាប់ជំរិតរបស់ពួកឧទ្ទាមរវ៉ាន់ដា។ ប្រធានាធិបតីកុងហ្គោ បានហៅការវាយប្រហាររបស់ពួកឧទ្ទាមរំដោះរវ៉ាន់ដា ដែលតាំងទីនៅភាគខាងកើតសាធារណរដ្ឋកុងហ្គោ ជាទង្វើភេរវកម្ម។
Barometre Securitaire Nord Kivu ដែលជាកម្មវិធីកិច្ចសហប្រតិបត្តិការរវាងក្រុមសិក្សាពីកុងហ្គោ និងអង្គការការពារសិទ្ធិមនុស្សHRW ក៏សង្ស័យថាអាចជាទង្វើរបស់ពួកឧទ្ទាមរវ៉ាន់ដាដែរ ប៉ុន្តែអង្គការយល់ថាគេនៅមិនទាន់អាចអះអាងបញ្ជាក់អ្វីបានទេ ព្រោះនៅតំបន់នេះមិនមែនមានតែពួកឧទ្ទាមរវ៉ាន់ដាតែមួយក្រុមទេដែលកំពុងចល័តធ្វើសកម្មភាព។
នៅថ្ងៃអង្គារនេះ ពួកឧទ្ទាមហ៊ូទូ នៃកងកម្លាំងរំដោះរវ៉ាន់ដា បានចេញសេចក្តីថ្លែងការណ៍ បដិសេធថាខ្លួនគ្មានពាក់ព័ន្ធនឹងហេតុការណ៍វាយប្រហារសម្លាប់ឯកអគ្គរដ្ឋទូតអ៊ីតាលីទេ និងបានស្នើសុំឱ្យអាជ្ញាធរកុងហ្គោ និងអាជ្ញាធរអង្គការសហប្រជាជាតិនៅកុងហ្គោ អង្កេតវែករកមុខអ្នកបង្កហេតុ និងកុំប្រញាប់ប្រញាលើធ្វើការចោទប្រកាន់យ៉ាងដូច្នេះ។ បើតាមពួកឧទ្ទាមរវ៉ាន់ដានេះ ក្បូនរថយន្តរបស់ឯកអគ្គរដ្ឋទូតអ៊ីតាលី រងការវាយប្រហារត្រង់ចំណុច “អង់តែនបី” ជិតច្រកGoma ប៉ុស្តិ៍ត្រួតពិនិត្យព្រំដែនរវាងកុងហ្កោនិងប្រទេសរវ៉ាន់ដា ហើយមិនឆ្ងាយប៉ុន្មានពីទីតាំងឈរជើងរបស់កងកម្លាំងយោធានៃសាធារណរដ្ឋកុងហ្គោ និង យោធារវ៉ាន់ដា។
សូមបញ្ជាក់ថាផ្លូវជាតិលេខ២ ដែលក្បួនរថយន្តរបស់ឯកអគ្គរដ្ឋទូតអ៊ីតាលីរងការវាយប្រហារនេះ ជាផ្លូវស្របតាមខ្សែព្រំដែនជាមួយរវ៉ាន់ដា ក្នុងតំបន់ព្រៃភ្នំក្រាសឃ្នឹក ហើយគ្មានគំនូសព្រំដែនខ័ណ្ឌចែកប្រទេសទាំងពីរឱ្យបានច្បាស់លាស់ទេ។ ហើយអាជ្ញាធរទាំងពីរគឺកុងហ្កោ និងរវ៉ាន់ដាបានបដិសេធជាស្វ័យប្រវត្តិដូចគ្នាថាគ្មានវត្តមានកងទ័ពក្នុងតំបន់នេះទេ។
យ៉ាងណាក៏ដោយ ក៏នៅមានចំណុចឆ្គងជាច្រើន ដែលកំពុងខ្ទាស់ភ្នែករដ្ឋាភិបាលលោកខាងលិច។ អគ្គលេខាធិការអង្គការសហប្រជាជាតិ លោក Antonio Guterres បានជំរុញឱ្យរដ្ឋាភិបាលកុងហ្គោបើកអង្កេតឱ្យបានឆាប់រហ័សដើម្បីនាំជន/ក្រុមដៃដល់មកកាត់ទោស។ តក់ស្លុតនឹងការបាត់បង់ជីវិតឯកអគ្គរដ្ឋទូត សហភាពអឺរ៉ុបនឹងនៅក្បែរកុងហ្គោ ប្រជាពលរដ្ឋកុងហ្គោ ដើម្បីសន្តិសុខនិងសន្តិភាព។ នេះជាសារទ្វីតរបស់ប្រធានក្រុមប្រឹក្សាអឺរ៉ុប Charles Michel៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ