អនុប្រធានហ្រ្វង់កូហ្វូនី៖កន្លែងរបស់អង្គការហ្រ្វង់កូហ្វូនីនៅក្នុងតំបន់អាស៊ីប៉ាស៊ីហ្វិកជាបញ្ហាប្រឈម
ថ្ងៃអាទិត្យ ទី២០ វិច្ឆិកាជាថ្ងៃទី២ និងថ្ងៃចុងក្រោយនៃកិច្ចប្រជុំកំពូលលើកទី១៨ របស់អង្គការអន្តរជាតិនៃក្រុមប្រទេសនិយាយភាសាបារាំងរៀបចំក្នុងប្រទេសទុយនីស៊ី។ នាឱកាសនៃកិច្ចប្រជុំកំពូល វិទ្យុបារាំងអន្តរជាតិ RFI ជាភាសាបារាំងបានសុំសម្ភាសន៍អនុប្រធានអង្គការហ្រ្វង់កូហ្វូនី លោកយ៉ុសហ្រ្វ័រ ម៉ុងប៉ឺទី។ អ្នកកាសែតរបស់យើង គួច គន្ធារ៉ា ដែលកំពុងមានវត្តមាននៅទីនោះក៏បានឆ្លៀតសួរលោកម៉ុងប៉ឺទីទាក់ទងនឹងកន្លែងរបស់អង្គការហ្រ្វង់កូហ្វូនីនៅក្នុងតំបន់អាស៊ីប៉ាស៊ីហ្វិក លោកម៉ុងប៉ឺទីបានសារភាពថា កន្លែងរបស់អង្គការហ្រ្វង់កូហ្វូនីនៅក្នុងតំបន់អាស៊ីប៉ាស៊ីហ្វិកជាបញ្ហាប្រឈម និងថា អង្គការហ្រ្វង់កូហ្វូនីមានសមត្ថភាព និងធនធានដើម្បីជួយលើកស្ទួយការរៀនភាសាបារាំងនៅក្នុងតំបន់អាស៊ីប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០១:៣២
« បាទ យើងបានដឹងថានៅក្នុងតំបន់អាស៊ីប៉ាស៊ីហ្វិក ការសិក្សាភាសាបារាំងជាបញ្ហាប្រឈមមួយ។ អ៊ីចឹងហើយបានជាយើងមានមជ្ឈមណ្ឌលសិក្សាភាសាបារាំងមួយនៅក្នុងតំបន់ដែលមានមូលដ្ឋាននៅក្នុងទីក្រុងហាណូយ ប្រទេសវៀតណាម។ មានមូលដ្ឋាននៅលើទឹកដីវៀតណាមមែន តែមជ្ឈមណ្ឌលមួយនេះតំណាងឲ្យតំបន់ទាំងមូល។
កម្លាំងវាយប្រហាររបស់ហ្រ្វង់កូហ្វូនីមិនមែនមានត្រឹមអង្គការអន្តរជាតិហ្រ្វង់កូហ្វូនីប៉ុណ្ណោះទេ តែក៏មានផងដែរនូវទីភ្នាក់ងារសាកលវិទ្យាល័យហ្រ្វង់កូហ្វូនី។ អង្គការអន្តរជាតិហ្រ្វង់កូហ្វូនីមានលទ្ធភាពកែនប្រមូលគ្រប់តួអង្គទាំងអស់នៅក្នុងវិស័យអប់រំ។ ទន្ទឹមគ្នានេះ យើងក៏កំពុងធ្វើការដើម្បីបង្កើតនូវកម្មវិធីសិក្សាភាសាបារាំងតាមអនឡាញ ឬតាមអ៊ីនធឺណែតដោយមិនបង់ថ្លៃសម្រាប់អ្នកដែលចង់រៀនភាសាបារាំង។
ដូច្នេះ យើងនឹងប្រឹងប្រែងប្រើធនធានដែលយើងមានដើម្បីឲ្យការរៀនភាសាបារាំងជាភាសាទី២ ឬភាសាបរទេស។ ខ្ញុំចង់បញ្ជាក់ប្រាប់លោកដោយមិនលាក់បាំងថា វាជាបញ្ហាប្រឈម ហើយខ្ញុំក៏យល់ស្របតាមលោកដែលថា កន្លែងហ្រ្វង់កូហ្វូនីនៅក្នុងតំបន់អាស៊ីប៉ាស៊ីហ្វិកមិនមែនជារឿងងាយស្រួលទេ។ តែទោះជាយ៉ាងនេះក្តី អង្គការអន្តរជាតិហ្រ្វង់កូហ្វូនីបានខ្នះខ្នែងដើម្បីគាំទ្រ និងរួមចំណែកដល់ការរៀនភាសាបារាំងឱ្យកាន់តែប្រសើរនៅក្នុងតំបន់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ