៤ថ្ងៃនៅអាហ្វ្រិក ប្រមុខរដ្ឋបារាំង ចង់បើកទំព័រទំនាក់ទំនងថ្មីជាមួយប្រទេសតំបន់អាហ្វ្រិក
ថ្ងៃពុធ ប្រធានាធិបតីបារាំង លោក អេម៉ានុយអែល ម៉ាក្រុង អញ្ជើញទៅតំបន់អាហ្វ្រិក ជាទីដែលបារាំងហាក់កំពុងតែបាត់បង់«ឥទ្ធិពល»បន្តិចម្តងៗ នៅលើដែនដីអតីតអាណានិគម។ ដំណើរ ៤ ថ្ងៃនៅទ្វីបអាហ្វ្រិក ប្រមុខរដ្ឋបារាំង គ្រោងនឹងធ្វើទស្សនកិច្ច ៤ ប្រទេស ដើម្បី«សាកល្បងបើកទំព័រទំនាក់ទំនងថ្មី»ជាមួយប្រទេសទាំងនោះ។
ចុះផ្សាយនៅថ្ងៃ៖
ស្តាប់ - ០១:៥៩
ប្រធានាធិបតីបារាំង ផ្តើមទស្សនកិច្ច ថ្ងៃទី១ នៅ ហ្កាប៉ុង មុននឹងបន្តទៅ អង់ហ្កូឡា កុងហ្គោប្រាហ្សាវីល និង សាធារណរដ្ឋប្រជាធិបតីកុងហ្កូ។ នេះជាដំណើរទស្សនកិច្ចទៅទ្វីបអាហ្វ្រិក លើកទី ១៨ ហើយ តាំងតែលោក អេម៉ានុយអែល ម៉ាក្រុង ឡើងកាន់អំណាចដឹកនាំប្រទេសបារាំង នៅឆ្នាំ២០១៧។
២ថ្ងៃ មុននឹងឡើងយន្តហោះ ប្រមុខរដ្ឋបារាំងបានលាតត្រដាងផែនការយុទ្ធសាស្ត្រនៅតំបន់អាហ្វ្រិកសម្រាប់៤ឆ្នាំទៅមុខ និងបានថ្លែងក្តីអំពាវនាវឲ្យប្រឹងប្រែងកសាងទំព័រទំនាក់ទំនងថ្មី រវាងបារាំង និង អាហ្វ្រិក។ របៀបទាក់ទងថ្មី ដែលឈរលើទំនុកចិត្ត ស្មើភាពគ្នា ជួយគ្នាទៅវិញទៅវិញ ហើយនិងការទទួលខុសត្រូវ ។
ដំណើរទស្សនកិច្ចរបស់លោក ម៉ាក្រុង ទៅអាហ្វ្រិកលើកនេះ ក៏ជាការសាកល្បងស្ទង់ទំនុកចិត្តរបស់ពលរដ្ឋនិងបណ្តាប្រទេសអាហ្វ្រិកដែរ គឺ បន្ទាប់ពី ទ័ពបារាំង ត្រូវបណ្តេញចេញពីប្រទេសម៉ាលី និងបួរគីណាហ្វាសូ នៅខែតុលាឆ្នាំទៅមិញ ហើយ យោធាបារាំង ក៏បង្ខំចិត្តចាកចេញពីអាហ្វ្រិកកណ្តាលដែរ នៅខែធ្នូ២០២២។ ការដកវត្តមានកងទ័ពបារាំងនេះ គឺត្រូវអ្នកជំនាញមើលឃើញថា វាជាចំណែកផលវិបាកមួយ ដែលដចេញពីការបញ្ឆេះកំហឹងរបស់ក្រុមហ៊ុនទាហានស៊ីឈ្នួលច្បាំង វ៉ាក់នែរ (Wagner) របស់រុស្ស៊ី។ វ៉ាក់នែរ ប្រឹងប្រែងធ្វើយុទ្ធនាការផ្សេងប្លែកៗ ដើម្បីឲ្យប្រជាជនអាហ្វ្រិកឲ្យស្អប់រើសអើងបារាំង និងធ្វើបាតុកម្មប្រឆាំងបារាំង ដែលធ្លាប់ធ្វើជាម្ចាស់អាណានិគម។
កាលពីថ្ងៃច័ន្ទ នៅចំពោះមុខបណ្តាក្រុមហ៊ុនឯកជននិងអង្គការសង្គមស៊ីវិលធ្វើសកម្មភាពនៅអាហ្វ្រិក លោក អេម៉ានុយអែល ម៉ាក្រុង បានប្រឹងព្យាយាមពន្យល់ថា «វត្តមានបារាំងនៅអាហ្វ្រិក គឺជាសំខាន់ បឋមបំផុត ដើម្បីលទ្ធិប្រជាធិបតេយ្យ »។ ក្រៅពីនេះ ប្រមុខរដ្ឋបារាំង សន្យាការពារផលប្រយោជន៍សេដ្ឋកិច្ចបារាំងនៅអាហ្វ្រិក ដែលទីនេះ មាន តួកគី រុស្ស៊ី និងចិន ក៏កំពុងវិនិយោគទុនសម្បើមដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ