លោកម៉ាក្រុងចេញដំណើរទៅបញ្ជាក់ជំហររបស់បារាំង នៅទឹកដីអាហ្វ្រិក
ប្រធានាធិបតីបារាំង លោកអេម៉ានុយអែល ម៉ាក្រុងបានទៅដល់ប្រទេសកាមេរូន កាលពីយប់ថ្ងៃចន្ទទី ២៥កក្កដា ដើម្បីបំពេញទស្សនកិច្ចផ្លូវរដ្ឋនៅប្រទេសអាហ្វ្រិកបី គឺ កាមេរូន បេណាំង និងហ្គីណេប៊ីស្សូ។ ទស្សនកិច្ចមួយជុំរបស់លោកម៉ាក្រុងនៅអាហ្វ្រិកខាងលិច (ពីថ្ងៃទី ២៥ ដល់ថ្ងៃទី ២៨ កក្កដា) មានគោលដៅពង្រឹងវត្តមានរបស់បារាំង ក្នុងផ្នែកសេដ្ឋកិច្ច និងសន្តិសុខនៅតាមបណ្តាប្រទេសនៅអាហ្រ្វិក ជាទីដែល មហាអំណាចយោធា ជាពិសេស រុស្ស៊ីកំពុងតែសកម្មខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
នៅក្នុងដំណើរទស្សនកិច្ចផ្លូវរដ្ឋ ក្រៅទឹកដីអឺរ៉ុប លោកប្រធានាធិបតីបារាំងអេម៉ានុយអែល ម៉ាក្រុងបានជ្រើសរើសប្រទេសបី នៅអាហ្វ្រិកខាងលិច គឺ កាមេរូន បេណាំង និងហ្គីណេប៊ីស្សូ។
ទៅដល់ទីក្រុងយ៉ាអ៊ូនដេ កាលពីយប់ថ្ងៃចន្ទ ប្រមុខរដ្ឋបារាំងត្រូវជួបពិភាក្សាជាមួយ ប្រធានាធិបតីកាមេរូន លោកប៉ូល ប៊ីយ៉ា នៅថ្ងៃអង្គារនេះ។ ជាមួយ លោកប៉ូល ប៊ីយ៉ា អាយុ ៨៩ឆ្នាំ ដែលដឹកនាំប្រទេសកាមេរូន ជិត ៤០ឆ្នាំ ដោយប្រើកណ្តាប់ដៃដែក លោកប្រធានាធិបតីបារាំង ម៉ាក្រុងគ្រោងនឹងពិភាក្សាពីបញ្ហាសន្តិសុខនៅកាមេរូន ដែលរួបរឹតដោយជម្លោះជាតិពិន្ធុ និងការងើបបះបោររបស់ក្រុមប្រដាប់អាវុធទាមទារផ្តាច់ទឹកដី តាំងពីឆ្នាំ២០១៧។ ម្យ៉ាងតំបន់ខាងជើងរបស់កាមេរូនកំពុងរងការវាយប្រហារមិនឈប់ពីសំណាក់ក្រុមជីហាតបូកូហារ៉ាំ។
ដោយពិតទៅ លោកម៉ាក្រុងធ្លាប់បានធ្វើឲ្យប្រធានាធិបតីកាមេរូន ខឹងអាក់អន់ចិត្តម្តងហើយកាលពីឆ្នាំ ២០២០ នៅពេលលោកប្រកាសថា បារាំងនឹងដាក់សម្ពាធលើរដ្ឋាភិបាលកាមេរូន លោកប្រធានាធិបតីប៉ូល ប៊ីយ៉ា ក្នុងរឿងប្រព្រឹត្តអំពើហិង្សានៅកាមេរូន។ នៅមុនទស្សនកិច្ច នៅកាមេរូន ក្រុមអង្គការការពារសិទ្ធិមនុស្សបានអំពាវនាវសុំឲ្យលោកម៉ាក្រុងជំរុញដាក់សម្ពាធឲ្យប្រធានាធិបតីប៉ូល ប៊ីយ៉ាដោះលែងអ្នកទោសនយោបាយ និងសកម្មជននានា ដែលត្រូវបានចាប់ខ្លួន នៅក្នុងអំឡុងប្រតិបត្តិការប្រយុទ្ធប្រឆាំងក្រុមទាមទារបំបែកទឹកដី។
បន្ទាប់ពីកាមេរូន ប្រធានាធិបតីបារាំងធ្វើដំណើរទៅប្រទេសបេណាំងនៅថ្ងៃពុធ មុននឹងបញ្ចប់ទស្សនកិច្ចរបស់លោកនៅប្រទេសហ្គីណេប៊ីស្សូ។ ទាំងបេណាំង និងហ្គីណេប៊ីស្សូ រងការរិះគន់ថា កំពុងរបូតលទ្ធិប្រជាធិបតេយ្យដោយសន្សឹមៗ នៅក្រោមការដឹកនាំរបស់រដ្ឋាភិបាលសព្វថ្ងៃ។
មន្រ្តីរបស់វិមានប្រធានាធិបតីបារាំងបាននិយាយប្រាប់ទីភ្នាក់ងារព័ត៌មានបារាំង AFP ថា ប្រធានាធិបតីបារាំងនឹងអាចនិយាយពីបញ្ហារំលោភសិទ្ធិមនុស្ស នៅក្នុងអំឡុងទស្សនកិច្ចរបស់លោកនៅប្រទេសអាហ្វ្រិក ប៉ុន្តែ ការពិភាក្សា ជាមួយសមភាគី ធ្វើឡើងដោយបិទទ្វារ ដោយមិនចាំបាច់ត្រូវប្រកាសជាសាធារណៈ ដែលនឹងអាចធ្វើឲ្យភាគីពាក់ព័ន្ធមិនសប្បាយចិត្តនោះទេ។ មិនចង់ឲ្យប្រទេសដៃគូអាហ្វ្រិក អាក់អន់ចិត្ត ព្រោះប្រធានាធិបតីបារាំង ទៅតំបន់អាហ្វ្រិកខាងលិចលើកនេះ ដើម្បីចង់បានការសហការដើម្បីពង្រឹងវត្តមានរបស់បារាំង ទាំងផ្នែកសេដ្ឋកិច្ច និងយុទ្ធសាស្រ្តយោធា នៅទឹកដីអាហ្រ្វិក
ការពង្រឹងភាពជាដៃគូយុទ្ធសាស្រ្តជាមួយ បណ្តាប្រទេសនៅអាហ្វ្រិក សំខាន់ណាស់សម្រាប់បារាំង ដែលមិនចង់បាត់បង់ផលប្រយោជន៍ សេដ្ឋកិច្ច និងយោធា នៅចំពោះមុខការពង្រីកដែនឥទ្ធិពលរបស់មហាអំណាចនានានៅទឹកដីអាហ្វ្រិក ដែលមានតាំងពីចិន ឥណ្ឌា អាមេរិក និងសំខាន់ជាងគេគឺរុស្ស៊ី ដែលជាដើមហេតុធ្វើឲ្យកងទ័ពបារាំងខ្ទាតចេញពីប្រទេសម៉ាលី។ ម្យ៉ាងការជួយថែរក្សាស្ថិរភាពនយោបាយ សេដ្ឋកិច្ច និងសន្តិសុខនៅទឹកដីអាហ្រ្វិក នៅចំពោះមុខការគំរាមកំហែងរបស់ក្រុមជីហាត ក្រុមភេរវនិយមអាល់កៃដា សំខាន់ផងដែរសម្រាប់ដោះស្រាយវិបត្តិលំហូរជនអន្តោប្រវេសន៍អាហ្វ្រិក ដែលអឺរ៉ុប បារាំងកំពុងប្រឈមសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ