អ.ស.ប. ថាពិភពលោកបរាជ័យក្នុងការទប់ស្កាត់សង្គ្រាមនៅស៊ូដង់ដែលអាចប៉ះពាល់ដល់សន្តិសុខតំបន់
លោកអគ្គលេខាធិការអង្គការសហប្រជាជាតិ អង់តូនីញ៉ូ ហ្គូទែរក៍ បានអះអាងនៅថ្ងៃពុធទី ៣ ឧសភា ថា ពិភពលោកបរាជ័យក្នុងការទប់ស្កាត់សង្គ្រាមរវាងពួកឧត្តមសេនីយ៍ដែល ហែកហួរប្រទេសស៊ូដង់។ ជាមួយនឹងការអំពាវនាវឱ្យគោរពបទឈប់បាញ់ លោកអគ្គលេខាធិការអង្គការសហប្រជាជាតិបានព្រមានពីគ្រោះហានិភ័យនៃការរីករាលជម្លោះនៅស៊ូដង់ ទៅលើស្ថិរភាពតំបន់ទាំងមូល។
ចុះផ្សាយនៅថ្ងៃ៖
ស្តាប់ - ០១:៥០
ទោះបីមានកិច្ចព្រមព្រៀង ពន្យារពេលឈប់បាញ់ជាគោលការណ៍ រហូតដល់ថ្ងៃទី ១១ឧសភាមែន ប៉ុន្តែគ្មានភាគីណាគោរពទេ។ ស្នូរផ្ទុះ ការវាយប្រហារគ្នានៅតែលាន់ឮនៅក្រុងខាទុំ។ ចំណែកការចែកចាយជំនួយមនុស្សធម៌វិញ ជាការងារដ៏ស្មុគស្មាញបំផុត និងមានការលួចប្រមូលជំនួយអស់ជាច្រើនពាន់តោន។ អង្គការសហប្រជាជាតិបានជំរុញឱ្យភាគីជម្លោះស៊ូដង់ បើកផ្លូវធានាសុវត្ថិភាពជំនួយមនុស្សធម៌។
ប្រឈមនឹងស្ថានភាពបែបនេះ លោក អគ្គលេខាធិការអង្គការសហប្រជាជាតិបានសម្តែងការព្រួយបារម្ភយ៉ាងខ្លាំង ខ្លាចក្រែងតែជម្លោះនៅស៊ូដង់ រាលដាលប៉ះពាល់ដល់សន្តិសុខតំបន់។
លោកហ្គូទែរក៍ ៖ “ត្រូវបញ្ឈប់ការប្រយុទ្ធគ្នា ! ដើម្បីកុំឱ្យមានមនុស្សស្លាប់ច្រើនជាងនេះ និងដើម្បីកុំឱ្យជម្លោះរីករាលដាលទៅជាសង្គ្រាមទូទៅ ដែលអាចប៉ះពាល់ដល់តំបន់ទាំងមូលនៅឆ្នាំខាងមុខ។ ផ្តើមដំបូងគឺប្រទេសឆាដ។ ទោះបីហេតុការណ៍ផ្ទុះឡើងនៅក្រុងខាទុំមែន តែស្នូលនៃជម្លោះអាចមានពាក់ព័ន្ធដល់តំបន់ដាហ្វួរ។ ឆាដ ជាប្រទេសដែលកំពុងស្ថិតក្នុងអន្តរកាលប្រជាធិបតេយ្យនិងរងការគំរាមកំហែងពីសំណាក់កងប្រដាប់អាវុធនៅលីប៊ី។ ដូច្នេះក្នុងស្ថានភាពបច្ចុប្បន្ននេះគេចាំបាច់ត្រូវតែជួយគាំទ្រឆាដ។ នៅក្នុងតំបន់ មានប្រទេសផ្សេងទៀតកំពុងជាប់ក្នុងដំណើរស្វែងរកកិច្ចព្រមព្រៀងសន្តិភាពផ្ទាល់ខ្លួនដែរ។ ជាក់ស្តែង អេត្យូពី។ ក្នុងពេលអេត្យូពីកំពុងអនុវត្តដំណើរបែបបទសន្តិភាព គេចាំបាច់ត្រូវតែបញ្ជៀសកុំឱ្យជម្លោះនៅស៊ូដង់រាលដាលទៅអេត្យូពី។ ស៊ូដង់ខាងត្បូង ក៏កំពុងស្វែងរកសន្តិភាពដែរ តែដំណើរការអនុវត្តកិច្ចព្រមព្រៀងសន្តិភាព ប្រព្រឹត្តទៅយ៉ាងយឺតនិងដោយពិបាកបំផុត។ ដូច្នេះបើជម្លោះស៊ូដង់ជន់ជោរប៉ះស៊ូដង់ខាងត្បូងតែបន្តិច នោះពិតជាគ្រោះថ្នាក់ខ្លាំងណាស់សម្រាប់ស៊ូដង់ខាងត្បូង"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ