អង្គការសហប្រជាជាតិសាកល្បងចរចាដើម្បីបើកច្រកមនុស្សធម៌ជួយស៊ូដង់
ជំនួប រវាងក្រុមយោធា ស៊ូដង់ និងក្រុមប្រដាប់អាវុធ ប៉ារ៉ាយោធា ដែលកំពុងប្រយុទ្ធគ្នាធ្វើឱ្យប្រទេសស៊ូដង់ធ្លាក់ក្នុងវិបត្តិពេលនេះ ពុំទទួលបានលទ្ធផលអ្វីជាដុំកំភួនទេ។ នេះបើតាមការអះអាងរបស់អារ៉ាប៊ីសាអូឌីតដែលជាអ្នកផ្តួចផ្តើមឱ្យមានការជួបចរចាគ្នា។ ប្រធានគ្រប់គ្រងកិច្ចការមនុស្សធម៌ អ.ស.ប. ក៏បានអញ្ជើញទៅអារ៉ាប៊ីសាអូឌីតដែរ ដើម្បីសាកល្បងចូលរួមចរចាជាមួយភាគីប្រយុទ្ធ រកវិធីបើកច្រកមនុស្សធម៌ជួយពលរដ្ឋស៊ូដង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ស្ថានភាពនៅរដ្ឋធានីខាទុំ ធ្លាក់ដុនដាបជាលំដាប់ ពីមួយថ្ងៃទៅមួយថ្ងៃ។ គ្មានទឹក គ្មានភ្លើងរួចទៅហើយ បន្តិចទៀត ខាទុំនឹងខ្វះស្បៀង ខ្វះលុយទៀត។ ឯការប្រយុទ្ធគ្នានៅតែបន្តឥតឈប់ រហូតមកទល់នឹងថ្ងៃអាទិត្យម្សិលមិញ បើទោះបីជាមានការចរចា និងការព្រមព្រៀងឈប់បាញ់ក៏ដោយ។ មានជនស៊ូដង់៣៣៥០០០នាក់ ធ្វើបំលាស់ទី និងជាង១១៧០០០នាក់រត់ភៀសខ្លួន ... នេះជាស្ថានភាពប្រឈមដ៏បន្ទាន់ ដែលអង្គការសហប្រជាជាតិចាំបាច់ត្រូវ រកវិធីបើកច្រកជំនួយមនុស្សធម៌និងជួយជនស៊ីវិលឱ្យបានចេញពីតំបន់ជម្លោះ។
ហេតុដូច្នេះហើយបានជា ប្រធានគ្រប់គ្រងកិច្ចការមនុស្សធម៌អង្គការសហប្រជាជាតិ លោក Martin Griffiths បានរួសរាន់ធ្វើដំណើរទៅអារ៉ាប៊ីសាអូឌីតដែរ ដើម្បីបានជួបចរចាជាមួយភាគីប្រយុទ្ធស៊ូដង់ ដែលកំពុងជួបគ្នានៅក្រុងJeddah ក្រោមគំនិតផ្តួចផ្តើមរបស់អារ៉ាប៊ីសាអូឌីត។ ប៉ុន្តែបើតាមមន្ត្រីអង្គការសហប្រជាជាតិសុំមិនបញ្ចេញឈ្មោះ សំណើចុះចូលចរចានេះបានសម្រេចទេ។ លោកMartin Griffiths ធ្លាប់បានអំពាវនាវកាលពីថ្ងៃពុធទី ៣ឧសភាម្តងរួចហើយ ឱ្យភាគីប្រយុទ្ធ ធ្វើយ៉ាងណាទុកចន្លោះឱ្យអង្គការសហប្រជាជាតិចូលទៅចែកចាយជំនួយមនុស្សធម៌ដល់ពលរដ្ឋស៊ីវិល។
ក្រោយជំនួប ទាំងឧត្តមសេនីយ៍ al-Burhan តំណាងក្រុមយោធាស៊ូដង់ និងឧត្តមសេនីយ៍Mohamed Hamdame Daglo ជាគូប្រជែងតំណាងឱ្យក្រុមប៉ារ៉ាយោធា គ្មានចេញសេចក្តីថ្លែងការណ៍អ្វីទាំងអស់។ ខាងយោធា បានត្រឹមព្រលយថា គ្មានទេការចរចាសន្តិភាព គឺអាចមានត្រឹមការផ្តោះប្តូរយោបល់ជុំវិញបទឈប់បាញ់ប៉ុណ្ណោះ។
ក្រសួងការបរទេសអារ៉ាប៊ីសាអូឌីត បានចេញសេចក្តីថ្លែងការណ៍ អះអាងនៅថ្ងៃចន្ទនេះថា ជំនួបចរចាមានកម្មវត្ថុបញ្ឈប់ការប្រយុទ្ធគ្នា រយៈពេលខ្លីមួយ ដើម្បីសម្រួលការចែកចាយជំនួយមនុស្សធម៌ និងរៀបចំឱ្យមានសេវាកម្មសំខាន់ៗ ព្រមទាំង កាលវិភាគបើកកិច្ចចរចា បិទបញ្ចប់ជម្លោះ ប៉ុន្តែគ្មានលទ្ធផលទៅមុខប្រសូតចេញពីជំនួបម្សិលមិញឡើយ។ សម្រាប់ពេលនេះ គ្មានភាគីណានិយាយអំពីការឈប់បាញ់ទេ និងគិតថាសុទ្ធតែយកឈ្នះគ្នាតាមការផ្លូវអាវុធទាំងអស់។ នេះបើតាមអ្នកការទូតអាប៊ីសាអូឌីតសុំមិនបញ្ចេញឈ្មោះដែរ។
អង្គការសហប្រជាជាតិ បានព្រមានថា ប្រសិនបើសង្គ្រាមនៅតែបន្ត នោះនឹងមានប្រជាពលរដ្ឋប្រមាណ២លានកន្លះបន្ថែមទៀត ត្រូវរងគ្រោះទុរ្ភិក្ស អត់ឃ្លាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ