អង្គការសហប្រជាជាតិសាទរលើកិច្ចព្រមព្រៀងបែងចែកចំណូលបានពីការលក់ប្រេងរវាងគូប្រជែងនៅលីប៊ី
នៅក្នុងប្រទេសលីប៊ី គូប្រជែងបានឯកភាពគ្នាលើយន្តការនៃការគ្រប់គ្រង និងការចែកចំណូលបានពីការលក់ប្រេង។ បេសកកម្មរបស់អង្គការសហប្រជាជាតិនៅលីប៊ីហៅកាត់ Manul បានសាទរលើយន្តការមួយនេះ និងបានមើលឃើញថា នេះអាចជាសញ្ញានៃការឈានមួយជំហានឆ្ពោះទៅរកការស្រុះស្រួលខាងនយោបាយ។ គួរបញ្ជាក់ថា តាំងពីការធ្លាក់ពីអំណាចរបស់មេដឹកនាំផ្តាច់ការកាដាហ្វីក្នុងឆ្នាំ ២០១១ លីប៊ីកំពុងបន្តអូសជើងនៅក្នុងវិបត្តិផ្ទៃក្នុងដោយការពុះចែកប្រទេសជាពីររវាងតំបន់ប៉ែកខាងកើត និងប៉ែកខាងលិច។
ចុះផ្សាយនៅថ្ងៃ៖
ស្តាប់ - ០២:០៩
យោងតាមក្រឹត្យដែលផ្សព្វផ្សាយដោយបណ្តាញសារព័ត៌មានក្នុងស្រុក យន្តការដែលគូប្រជែងលីប៊ីបានបង្កើតឡើងមានឈ្មោះ « គណៈកម្មការជាន់ខ្ពស់ហិរញ្ញវត្ថុ »។ គណៈកម្មការនេះមានតួនាទីគ្រប់គ្រងចំណូលបានពីការលក់ប្រេង គ្រប់គ្រងលើការចំណាយថវិកាសាធារណៈ និងគ្រប់គ្រងលើការបែងចែកចំណូលបានពីការលក់ប្រេងដោយសមភាព។ គួរបញ្ជាក់ថា លីប៊ីជាប្រទេសអាហ្រ្វិកដែលកំពុងមានបរិមាណស្តុកប្រេងឆៅយ៉ាងច្រើនសម្បើមនៅក្រោមដីរបស់ខ្លួន។ តែតាំងពីក្រោយការដួលរលំរបបផ្តាច់ការកាដាហ្វីក្នុងឆ្នាំ ២០១១ មក លីប៊ីកំពុងបន្តអូសជើងនៅក្នុងវិបត្តិផ្ទៃក្នុងនៃការពុះចែកប្រទេសជាពីររវាងតំបន់ប៉ែកខាងកើត និងតំបន់ប៉ែកខាងលិច។
តាំងពីជាង ១ឆ្នាំកន្លងទៅនេះ រដ្ឋាភិបាលនៅប៉ែកខាងកើតក្នុងទីក្រុងទ្រីប៉ូលីដែលទទួលស្គាល់ដោយអង្គការសហប្រជាជាតិកំពុងឈ្លោះជាមួយរដ្ឋាភិបាលនៅប៉ែកខាងលិចដែលគាំទ្រដោយសេនាប្រមុខខាលីហ្វា ហាហ្វតាដ៏មានឥទ្ធិពល។ ប្រាក់ចំណូលពីការលក់ប្រេងដែលជាប្រភពចំណូលសំខាន់របស់ប្រទេសតែងជាដើមចមនៃជម្លោះរវាងគូប្រជែងទាំងពីរ។ សព្វថ្ងៃ ប្រាក់ចំណូលពីការលក់ប្រេងនេះបានគ្រប់គ្រងដោយក្រុមហ៊ុនប្រេងឥន្ធនៈជាតិ និងធនាគារកណ្តាលដែលមានមូលដ្ឋានក្នុងទីក្រុងទ្រីប៉ូលី។ តែចាប់ពីពេលនេះទៅ គឺជាតួនាទីរបស់ « គណៈកម្មការជាន់ខ្ពស់ហិរញ្ញវត្ថុ »។
គណៈកម្មការជាន់ខ្ពស់ហិរញ្ញវត្ថុនេះមានសមាជិកចំនួន ១៨រូបក្នុងនោះ មានអ្នកតំណាងមកពីរដ្ឋាភិបាលនៅប៉ែកខាងលិច អ្នកតំណាងមកពីរដ្ឋាភិបាលនៅប៉ែកខាងកើត អ្នកតំណាងមកពីទ័ពរបស់សេនាប្រមុខខាលីហ្វា ហាហ្វតា អ្នកតំណាងមកពីសភា ព្រឹទ្ធសភា និងអ្នកតំណាងមកពីរដ្ឋអំណាចគ្រប់គ្រងរដ្ឋបាល។ បេសកកម្មរបស់អង្គការសហប្រជាជាតិនៅលីប៊ីហៅកាត់ Manul បានសាទរលើការបង្កើតគណៈកម្មការជាន់ខ្ពស់ហិរញ្ញវត្ថុពេលនេះ និងមើលឃើញរួចជាស្រេចនូវកុងសង់ស៊ុសនយោបាយរវាងស្ថាប័ន និងតួអង្គនយោបាយគូប្រជែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ